6
Chon fanüfan ra ngauala
6.1-8
1 Iwe, lupwen aramas ra popuetä chomongola won fanüfan, a pwal wor nöür föpwül. 2 Nge nöün Kot kewe chon läng mi ngauala ra nenengeni liöchün nöün aramas föpwül. Iwe, ra pwülüeni chokewe ra efich. 3 Mürin, ewe Samol mi Lapalap a apasa, “Ngüni esap nonom lon aramas tori feilfeilachök, pun aramas fituk chök. Iwe, ränin manauan epwe ipükü rüe ier chök.” 4 Lon ena fansoun, pwal lon fansoun mürin a wor mwänämong won fanüfan, ir chokewe nöün aramas föpwül ra nöünöü me won nöün Kot kewe chon läng mi ngauala. Nge ekei mwänämong ra iteföüla lon ar nemenem me pwora lon ewe fansoun lomlom. ✡Num 13.33
5 Iwe, ewe Samol mi Lapalap a küna pwe än aramas föföringau a fokun wattela won fanüfan, nge ekiekin leluker a chök ngauala fansoun meinisin. 6 Iwe, ewe Samol mi Lapalap a lamalamala ren an föri aramas won fanüfan, letipan a pwal fokun weires ren. 7 Iei mine a apasa, “Üpwe arosala föriei aramas me won fanüfan, pwal manfetal me mantötö me ekewe mansüsü. Pun üa lamalamala ren ai föriir.” 8 Nge Noa a küna ümöümöch me ren Kot. ✡Mat 24.37; Luk 17.26; 1.Pet 3.20
Noa a föri ewe waimw
6.9-22
9 Iei uruwon Noa. Noa eman chon pwüng, i chök a föföröch lein pilon kana, a pwal chiechifengen me Kot. ✡2.Pet 2.5 10 Iwe, a wor ülüman nöün Noa mwän iter Säm, Ham me Jafet.
11 Nge chon fanüfan ra fokun föföringau fän mesen Kot o eäni föförün mwäneson ekis meinisin. 12 Iwe, Kot a nengeni fanüfan o küna pwe a unusen ngau, pun ekewe aramas meinisin ra chök alapala ar föför mi ngau. 13 Nge Kot a üreni Noa, “Üpwe fokun arosala ekewe aramas meinisin, pun fanüfan a uren föförün mwäneson me rer. Üpwe fokun aroserela o ataala fanüfan. 14 Kopwe föri efoch waimw seni ewe irä itan kofer. Kopwe refi lon, kopwe pwal apacha ngeni apach lon me lükün. 15 Iei usun om kopwe föri: langataman epwe ükükün föpükü lime fiit, chölapan fik me limu fiit, nge tekian faik me limu fiit. 16 Kopwe föri osun ewe waimw o likiti eu leni fan lefilen ewe os me etippan ükükün engol me walü inis. Kopwe pwal föri asamalapan lepekin. Epwe wor sässärin fan, sässärin lukalapan me sässärin won. 17 Ngang üpwe awarato eu noter won fanüfan pwe epwe arosala mönümanau meinisin won fanüfan. Meinisin mine a manau won fanüfan epwe mäla. 18 Nge ngang üpwe föri ai pwon ngonuk. Oupwe tolong lon ewe waimw, ämi me noum kewe mwän, pwal pwülüom me pwülüer kewe. 19 Iwe, kopwe pwal uwalong lon ewe waimw akaruoman man seni man meinisin, eman ätemwän me eman liefefin, pwe repwe etuk le manau. 20 Akaruoman seni iteiten sokun mansüsü me manfetal me mantötö repwe feilong reöm pwe repwe manau. 21 Iwe, kopwe pwal uwalong sokun mongö meinisin o iseni pwe amötümi me amötür.” 22 Iwe, Noa a föri meinisin mine Kot a allük ngeni. ✡Ipr 11.7