Akai
Kapas akom
I. Iten ei puk: Akai, pun mine a mak lon, an afalafal. Wewen ei it Akai: Ai ränin apwapwa. (Eli a iteni ei it, pun aramasan ra ösüküsükü ewe fansoun pwapwa, lupwen repwe liwinsefäl seni ar oola).
II. Chon makei ei puk: Akai
III. Itelapemongen ei puk: Oupwe aüetä imwen ewe Samol mi Lapalap.
IV. Kapas aüchean ei puk: Kot a afeiöchü nöün aramas, are ra akomwen föri an angang.
V. Masouen ei puk Akai: Lon ei puk a chufengen än ewe soufos Akai afalafal a eäni ngeni ekewe aramas fän alon ewe Samol mi Lapalap lon ewe ier 520 mwen Kraist (B.C.). Ekewe chon Juta ra fen liwinto seni ar oola o imweimw lon Jerusalem ekoch ier, nge ewe imwenfel a chüen chök tatakis. Lon än Akai afalafal a pesei ekewe souemwenin aramas pwe repwe aüsefälietä ewe imwenfel. Nge ewe Samol mi Lapalap a pwon ngeni ewe mwichen aramas mi limöch o siwil lon manauer, pwe repwe feiöch o nonom lon ewe fanü fän kinamwe lon ekewe fansoun repwe feito.
VI. Tettelin masouen ei puk:
Ekewe kapasen pesepes pwe aramas repwe aüsefälietä ewe imwenfel 1.1-15
Ekewe kapasen achipachip me apilükülük 2.1-23
1
Ewe soufos a pesei ekewe aramas pwe repwe aüetä ewe Imwenfelin Kot
1.1-15
1 Lon aruuen ierin mwün Tarius ewe kingen Persia, lon aeuin ränin ewe awonuen maram, ewe Samol mi Lapalap a kapas ngeni ewe soufos Akai fän iten Serupapel nöün Sealtiel we mwän ewe kepinan Juta, pwal fän iten Josua nöün Jehosatak we mwän ewe souasor mi lap. ✡Esr 4.24–5.2; 6.14 2 Ewe Samol mi Unusen Manaman a üreni Akai, “Ekei aramas ra apasa pwe esamwo tori fansoun ar repwe aüsefälieta Imwenfelin ewe Samol mi Lapalap.” 3 Mürin, alon ewe Samol mi Lapalap a tori ekewe aramas ren ewe soufos Akai, 4 “Ifa usun, a iei fansoun ämi oupwe imweimw lon imwemi mi lingöch, nge ei Imwenfel a tala? 5 Iei mine oupwe ekieki usun mine a fis ngenikemi. 6 Oua fotuki chomong, nge oua kini chokükün. Oua mongö o ün, nge ousap fokun möt ren. Oua aüföüfakemi, nge ousap mefi kinamwe ren, nge ir mi angei liwinin ar angang ra usun chök nge ra iseni liwinir lon eu lenien iseis mi wor pwang lon.”
7 Iei alon ewe Samol mi Unusen Manaman, “Oupwe ekieki usun mine a fis ngenikemi. 8 Iei oupwe feita won ekewe chukuchukuta o angang irä, pun oupwe aüsefälieta ewe Imwenfel pwe üpwe pwapwa o küna ling ren. 9 Oua apilükülükü eu räs mi watte, nge oua chök angei chokükün. Lupwen oua iseis resin fanüemi lon ämi imwen iseis, üa ataela. Met popun? Pokiten imwei Imwenfel a tala, nge oua chök ekieki usun en me imwan. 10 Iei mine läng a amwöchü amurenipwin, nge fanüfan esap amärätä irä mi ua. 11 Iwe, üa awarato eu fansoun pwasapwas won ewe fanü, won ekewe chukuchukutä me ekewe tanipin wiich, won ekewe tanipin wain me ekewe irä olif, pwal won meinisin mine a märitä won ewe fanü. Üa pwal awarato eu fansoun pwasapwas won aramas me man kana, pwal won ar angang meinisin.”
12 Mürin, Serupapel nöün Sealtiel we me Josua nöün Jehosatak ewe souasor mi lap, pwal ekewe lusun aramas mi chüen manau ra aleasochisi alon ewe Samal mi Lapalap ar we Kot, pwal alon ewe soufos Akai, pun ewe Samol mi Lapalap ar we Kot a tinala rer. Iwe, ekewe aramas meinisin ra meniniti ewe Samol mi Lapalap. 13 Mürin, Akai nöün ewe Samol mi Lapalap we chon künö a asile ngeni ekewe aramas alon ewe Samol mi Lapalap, “Ngang üpwe etikemi.” 14 Iwe, ewe Samol mi Lapalap a apöchökülätä letipen Serupapel ewe kepinan Juta me letipen Josua ewe souasor mi lap, pwal letipen ekewe lusun aramas mi chüen manau, pwe ra feito o angang ngeni Imwenfelin ewe Samol mi Unusen Manaman ar we Kot. 15 Ei a fis lon rüe me rüanün ränin ewe awonuen maram lon aruuen ierin mwün ewe king Tarius.