5
Pworausen awewe usun ewe tanipin wain
5.1-7
Üa mochen eäni echö köl
ngeni chienei mi achengicheng usun an tanipin wain.
Chienei mi achengicheng a eäni eu tanipin wain
won eu chuk mi pwülöch.
Iwe, a tuw ewe pwül o ionawu ekewe fau me lon,
a pwal fotuki irän wain mi fokun mürina won.
Nge lukalapan a aüetä eu imwen mamas
o föri eu lenien puri föün wain lon.
Iwe, a witiwiti an epwe afisätä ua mi öch,
nge ewe tanipi a chök afisätä ua mi ngau. Mat 21.33; Mark 12.1; Luk 20.9
Iei mine chienei a apasa: Ämi chon Jerusalem me chon Juta, üa tüngor ngenikemi pwe oupwe filätä iö leim a mwäl, ngang ika ai tanipi. Ifa usun, a chüen wor och angang üsamwo föri fän iten ai tanipin wain? Pwota a chök afisätä ua mi ngau, lupwen üa witiwiti an epwe afisätä ua mi öch?
Iwe, iei üpwe asile ngenikemi mine üpwe föri ngeni ai tanipi. Üpwe ütti ekewe irä mi tii ünükün ewe tanipi o ataela ewe tit pwe ekewe manmwacho repwe tolong. Repwe eni ekewe irän wain o puriretiu. Iwe, üpwe föri mine ewe tanipi epwe pön ren. Esap wor eman epwe fichitolei irän ika tuw pwülün lon, nge pötöwölingau me iräfölüföl repwe märitä lon. Iwe, üpwe allük ngeni ekewe kuchun üt pwe resap püngütiu won.
Iwe, än ewe Samol mi Unusen Manaman tanipin wain ekewe chon Israel,
nge fotukian irä mi mürina ekewe chon Juta.
A awiti pwe aramas repwe föri mine a mürina,
nge ra chök nimanau.
A awiti pwe repwe föri mine a pwüng,
nge a chök rong kechüen riaföü pokiten pwüngingau.
Ewe feiengau epwe tori chon föföringau
5.8-30
Feiengauemi, ämi mi achomonga imwemi me fanüemi tori esap chüen wor lenien ekewe lusun aramas. Mürin, ämi chök oupwe nonom lon ewe fanü. Iwe, üa rongorong än ewe Samol mi Unusen Manaman kapasen akapel, “Ellet, ekei imw watte pwal imweöch repwe tala, nge esap chüen wor aramas lor. 10 Eu tanipin wain ükükün langataman me chölapan walik ngaf epwe chök awora limu kalon wain. Nge ren engol tuk föün wiich ra fotuki, repwe chök kini ükükün eu tuk.”
11 Feiengauemi, ämi mi pwätä lesosorusich pwe oupwe popuetä le ün sakau, ämi mi motmwäl tori lepwin pwe oupwe puch ren wain. 12 A wor nöümi kitar me rappwa, ämi pisekin kaktai me nöümi aangün pwal ünümemi wain, lupwen oua mongöfengen. Nge ousap ekieki usun mine ewe Samol mi Lapalap a föri, ousap pwal ingeiti angangen pöün.
13 Iei mine oupwe oola won fanü toau mwen ämi oupwe mefi. Iwe, chokewe mi iteüöch me leimi repwe mäla ren ar echik, nge ekewe aramas repwe mäla ren ar kaka. 14 Iei mine ewe lenien sotup a fokun sukula pwe epwe oromala meinisin. Iwe, ekewe aramas tekia me lon Jerusalem me ewe mwicheichen aramas mi pwapwa o mwänek repwe turulong lon. 15 Lon ena fansoun aramas meinisin repwe küna tekison, nge ekewe chon lamalamtekia repwe tur, 16 nge ewe Samol mi Unusen Manaman epwe tekiatä ren an eäni apwüng, ewe Kot mi pin a püsin pwärätä an pin ren an föri mine a pwüng. 17 Iwe, nienifön sip repwe mongöfetal lein ekewe telinimw mi tala, nge kuuch me kow repwe kütta ener fetil ikenan.
18 Feiengauemi, ämi mi förätä pwüngingau ren mochenin letipemi, oua pwal föri fän pöchökül mine oupwe tipis ren, 19 ämi mi apasa, “Kot epwe müttir apwönüetä an angangen apwüng pwe sipwe küna. Ewe mi Pin lon Israel epwe awara mine a ekiekin föri pwe sipwe wesewesen silei.” 20 Feiengauemi, ämi mi aita ngeni mürina mine a ngau, nge ngeni ngau mine a mürina. Oua awili rochopwak ngeni saram, nge saram ngeni rochopwak, oua pwal awili ngeni arar mine a maras, nge ngeni maras mine a arar. 21 Feiengauemi, ämi mi lükü püsin ämi mirit, oua pwal ekieki pwe ämi chon tipachem.
22 Feiengauemi, ämi mi iteföüla le apuchakemi ren wain, oua pwal silelap le nofitifengeni ünümemi sakau mi pwichikar. 23 Oua amusa ekewe mi tipis fän iten lifangen amichimich, nge oua atipisimwäli chokewe esap wor ar tipis.
24 Iei mine warer repwe pwasala, nge sotur repwe mworotiu usun pipi. Iwe, repwe müükala usun chök pötöwöl mi pwas lon ngetengeten ekkei, pwal usun chök fetilipwas lon characharen um. Pun ra pöütala än ewe Samol mi Unusen Manaman allük o turunufasei än Ewe mi Pin lon Israel kapas. 25 Iei mine ewe Samol mi Lapalap a fokun song ngeni nöün aramas o aitiela pöün pwe epwe apwüngüür. Iwe, ekewe chuk repwe chechech, nge ekewe somä repwe nonom won ekewe al usun chök pipi. Iei mwo nge än Kot song esamwo kul seniir, pöün a chüen afeiengaueer.
26 Iwe, Kot epwe aürätä eu filaik, pwe chon eu mwü mi toau repwe küna, epwe okowäriir pwe repwe feito seni lesopun fanüfan meinisin. Nge nengeni, ra müttir etto. 27 Esap wor eman leir a malülü ika chepetek, esap pwal wor eman a aiesum ika möür. Iwe, ar pelit ra nükünük, nge ririn ipwer sus resap mwü. 28 Ar kewe likapich ra mei, nge wokur föün esefich ra ken. Iwe, kün nöür oris ra usun chök fau, nge willen war woken ra märäkul usun eu ewiniär. 29 Iwe, ra wörüwör usun chök laion ika usun apanen laion. Ra ngüngü, lupwen ra turufi liaper o uwala ekis, nge esap wor eman a tongeni amanaua liaper kewe. 30 Lon ewe rän repwe ngüngü won Israel usun ngüngün noon lematau. Nge are eman epwe nenengeni ewe fanü, epwe chök küna rochopwak me riaföü. Iwe, saram epwe rochola ren kuchu.

5:2: Mat 21.33; Mark 12.1; Luk 20.9