1 Kot a apasa,

“Oupwe aüselingaei fän mosonoson, ämi fanü mi nom lematau.

Chon ekewe mwü repwe angei ar pöchökül mi fö.

Repwe kaneto pwe repwe fos.

Ousipwe chufengen pwe sipwe kapwüngfengen.

2 Iö a apwökü ewe aramas seni ötiu,

ätewe mi win ekis meinisin?

Iö a mwütätä pwe epwe akufu ekewe mwü o puri ekewe king fän pechen.

Iwe, nöün ketilas epwe atatakisiir pwe repwe usun chök pwül moromor,

nge an likapich epwe ässirela usun asepwäl a ässala chöpwasapwas.

3 Iwe, a tapweriir o fetal won ekewe al esamwo fetal won me mwan,

nge esap wor eman a epeti.

4 Iö a föri ei föför?

Iö a köri ekewe pilon aramas seni lepopun?

Ngang, ewe Samol mi Lapalap, üa nom me lepoputan,

üpwe pwal nom ren ekewe pilon lesopolan, ngang chök.

5 Iwe, chon ekewe fanü mi nom aroset ra küna mine üa föri

o niuokus ren, nge chokewe mi nom lesopun fanüfan ra chechech.

Ir meinisin ra feito o chufengen.

6 Iteiten eman me eman a alisi chon arun o üreni pwin, ‘Kopwe apöchökulok!’

7 Iwe, ewe chon falafal a pesei ngeni ewe mi angang ngeni kolt pwe epwe chök sopwela an angang,

ätewe mi achöpöpü mächä a pesei ätewe mi amaani o apasa usun an angang, ‘A mürina.’

Iwe, a anüküchara förier uluulun anümwäl ren chüföl pwe esap mwökütüküt.

8 Nge en Israel nei chon angang,

en mwirimwirin Apraham,

chiechiei we üa filuketä, ✡2.Kron 20.7; Jas 2.23

9 üa uweeketo seni leamüchün fanüfan,

üa pwal köruk seni lesopun fanüfan o ürenuk,

‘En nei chon angang, üa filuketä,

nge üsap pöütukela.’

10 Iwe, kosap niuokus, pun ngang üa etuk,

kosap pwal apilüküngau, pun ngang om Kot.

Üpwe apöchökülok, üpwe pwal alisuk.

Üpwe fokun tümwünuk o amanauok.

11 Chokewe ra songeituk

repwe itengau me säw,

nge chokewe mi fiu ngonuk repwe mäfeiengau o rosola.

12 Iwe, kopwe kütta chokewe mi oputok, nge kosap chüen küneer,

pwal chokewe mi maun ngonuk repwe moela.

13 Pun ngang om Kot ewe Samol mi Lapalap üa amwöchü pöüifichum,

pwal ngang ätewe mi ürenuk,

‘Kosap niuokus, ngang üpwe alisuk.’ ”

“Kosap niuokus, en Israel mi

kükün o apwangapwang usun chök eman moso,

pun ngang üpwe alisuk.

Ngang Ewe mi Pin lon Israel om Chon Amanau.

15 Nengeni, üpwe föri senuk eu pisekin wichiwich umwun wiich,

epwe minefö o ken, epwe pwal wor fölün.

Kopwe wichi ekewe chukutekia o atatakisiir,

kopwe pwal awili ekewe chukutekison ngeni pön wiich.

16 Iwe, kopwe söfölüretä pwe asepwäl epwe ässirela,

nge mölümöl epwe atoropaseer.

Nge en kopwe pwapwa rei, pun ngang om Samol mi Lapalap,

kopwe pwal mwareitiei ngang Ewe mi Pin lon Israel.

17 Iwe, lupwen chon wöüngau me osupwang ra kütta koluk, nge resap küna,

lupwen ra kaka pwe chönawer a pwasapwas,

ngang ewe Samol mi Lapalap üpwe pälüeni ar iotek o alisiir.

Ngang ewe Koten Israel üsap likitirela.

18 Iwe, üpwe apupuetä chanpupu won ekewe chuk mi amassawa

o emichätä puächen koluk lon ekewe lemol.

Üpwe awili fanüapö ngeni nomun koluk,

nge fanüpwas ngeni puächen koluk.

19 Üpwe ämärätä lon fanüapö ekewe irä setar me akasia,

pwal ekewe mwoosor me irä olif.

Üpwe pwal fotukätiu lon fanüpwas

ekewe irä saipires me akürang me irä pain.

20 Iwe, aramas repwe küna ei

o silei pwe ngang ewe Samol mi Lapalap üa föri ekei föför,

repwe pwal ekieki usun o weweiti

pwe ngang Ewe mi Pin lon Israel üa afisätä ei.”

21 Ewe Samol mi Lapalap ewe kingen Israel a apasa,

“Ämi koten ekewe mwü, oupwe feito o fos,

oupwe uwato ämi pisekin pwärätä.

22 Oupwe uwato meinisin,

oupwe pwal pwärätä mine epwe fis lon kan fansoun mwach.

Oupwe aiti ngenikem lapalapen ekewe mettochun lom,

pwe aipwe ekieki usur o silei sopolar.

23 Iwe, oupwe pwäri ngenikem mine epwe fis lon kan fansoun repwe feito,

pwe aipwe silei pwe ämi oua kot.

Oupwe föri sokun föför mi öch ika mi ngau,

pwe aipwe mairü o weitifengenikem.

24 Nge esap fokun wor aücheami,

oua wesewesen lipwäkingau lon ämi angang.

Chokewe meinisin mi fel ngenikemi ra anioput.

25 Üa amwökütü eman seni efeng, iwe, a feito.

Üa kökköri seni ötiu, iwe, epwe köri itei.

Epwe puri fän pechen ekewe samol usun eman a puri pwül,

ika usun eman chon föri sepi a puri ewe pwül epwe föri sepi seni.

26 Iö leimi a pwärätä ei me lepopun pwe aipwe silei,

nge iö a osuni usun me mwan, pwe aipwe tongeni apasa pwe a pwüng an kapas?

Iwe, esap wor eman a pwärätä, esap wor eman a apworausa,

esap pwal wor eman a rongorong och kapas senikemi.

27 Iwe, ngang aemanün mi asile ngeni Sion ewe pworaus mi mürina.

Üa tinala ren Jerusalem eman chon künö mi üra,

‘Nengeni, noum aramas ra liwinsefäliti fanüer.’

28 Nge lupwen üa nenengeni koten ekewe mwü,

üsap küna eman mi tongeni apasa och,

esap pwal wor eman leir a tongeni pälüeni ai kapas ais.

29 Nengeni, ir meinisin anümwäl chök,

esap wor och mine ra tongeni föri.

Ekei uluulun anümwäl ra asepwäl chök.”