49
Nöün Kot chon angang epwe eu saram ngeni chon ekewe mwü
49.1-7
1 Oupwe aüselingaei, ämi kewe fanüen lematau,
oupwe rongorong, ämi chon ekewe mwü mi nom toau.
Ewe Samol mi Lapalap a filiei seni lon letipen inei o ngeniei itei,
lupwen üa uputiu. ✡Jer 1.5
2 Iwe, Kot a akeni kapasen awei pwe ra ken usun efoch ketilas
o aopaei fän nürün pöün.
A amisiei usun efoch föün likapich,
a iseniei o aopaei lon an lenien föün likapich. ✡Ipr 4.12; Pwär 1.16
3 Iwe, a üreniei, “Israel en nei chon angang,
en ätewe üpwe küna ling ren.”
4 Nge ngang üa apasa, “Üa resin angang, nge üsap küna lomotan.
Üa fangala ai pöchökül, nge a lusmwälila.
Ellet, ai pwüng a nom ren ewe Samol mi Lapalap,
nge liwini a nom ren ai we Kot.”
5 Iei alon ewe Samol mi Lapalap, a afisiei lon letipen inei
pwe üpwe nöün chon angang,
a awisaei pwe üpwe aliwinato nöün aramasen Israel
o achufengeniir ren,
pun üa iteüöch fän mesen ewe Samol mi Lapalap,
nge ai Kot i popun ai pöchökül.
6 Iwe, a apasa,
“Kosap nei chök chon angang mi wisen achufengeni chon ekewe ainangen Israel
o aliwinato chokewe mi chüen manau me leir.
Nge üpwe pwal föri pwe kopwe eu saram fän iten chon ekewe mwü,
pwe chon fanüfan meinisin repwe küna manau.” ✡Ais 42.6; Luk 2.32; Föf 26.23; Föf 13.47
7 Iwe, ewe Samol mi Lapalap ewe Chon Amanau, Ewe mi Pin lon Israel,
a üreni ätewe a fokun küna itengau o koput me ren chon ekewe mwün fanüfan,
ätewe mi angang ngeni ekewe chon nemenem,
“King kana repwe ütä o asamoluk, lupwen repwe künok,
nge samol kana repwe chapetiu mwom.”
Ei epwe fis pokiten ewe Samol mi Lapalap a afili nöün chon angang.
Ewe mi Pin lon Israel a apwönüetä an kewe pwon.
Kot a pwon pwe chon Israel repwe liwinsefäliti fanüer
49.8–50.3
8 Iei alon ewe Samol mi Lapalap ngeni nöün kewe aramas,
“Lon fansoun öch üa aüselinga ämi siö,
lon ränin küna manau üa pwal alisikemi.
Üpwe tümwünükemi
o föri remi eu pwon ngeni aramasen fanüfan meinisin.
Ei üpwe föri pwe oupwe tongeni fanüenisefäli fanüemi mi tala iei. ✡2.Kor 6.2
9 Üpwe pwal üreni ekewe chon fötek, ‘Oupwe ngasala,’
nge ekewe mi nom lon rochopwak üpwe üreniir,
‘Oupwe tolong lon saram.’
Iwe, repwe mongö ünükün ekewe al usun sip,
repwe pwal küna ener mongö me won ekewe chuk mi amassawa.
10 Resap echik are kaka,
nge pwichikaren lon fanüapö me akkar resap pwichitiir,
pun ätewe mi tongeer epwe emwenirela ngeni puächen koluk. ✡Pwär 7.16-17
11 Iwe, üpwe föri efoch alalap won chuki kewe meinisin
o amolätä efoch al fän iten nei aramas pwe repwe fetal won.
12 Nengeni, nei aramas repwe feito seni toau,
ekoch seni efeng me lotou,
nge ekoch seni ewe telinimw Aswan mi nom ör.”
13 Oupwe köl fän pwapwa, ämi läng, kopwe mwänek, en fanüfan,
oupwe chietä köl, ämi chuk kana.
Pun ewe Samol mi Lapalap epwe echipa nöün aramas
o tongei nöün kewe mi riaföü.
14 Iwe, Sion a apasa,
“Ewe Samol mi Lapalap a likitieila,
ai Samol a manlükieila.”
15 Nge ewe Samol mi Lapalap a üreni,
“Ifa usun, eman fefin epwe tongeni manlükala nöün mönükol,
pwe esap tongeäsini nöün won inisin?
Nge are epwe fen manlükala,
ngang üsap manlukuk.
16 Nengeni, üa makei itom lon pei me ruofoch.
Om kewe tit, Sion, ra nonom fochofoch fän mesei.
17 Ekewe chon aüsefäliik ra müttir le angang seni chokewe mi ataokola,
nge ir mi atatakisiik ra feila senuk.
18 Kopwe nenefeil o küna mine a fis.
Noum kewe aramas meinisin ra chufengen o feito reöm.
Mwo manauei, ngang ewe Samol mi Lapalap üa kapas,
ir afoutom, kopwe pwal ling rer
usun eman fin apwüpwülü söfö a ling ren foutan.
19 Iwe, fanüom we mi tala o pön
iei esap chüen naf ngeni ekewe aramas repwe choni.
Nge chokewe mi atai fanüom
repwe toau senuk.
20 Iwe, noum kewe mi uputiu lupwen fansoun om oola
repwe kapas ngonuk,
‘Ei leni esap naf ngenikem.
Kopwe awora leniem pwe aipwe nonom won.’
21 Mürin kopwe ekieki lon letipom,
‘Iö a oupwätiu chokana ngeniei?
Üa mwelele o rit, üa pwal oola o pöütüla.
Iö a foleniir?
Nengeni, ngang chök üa lusun!
Nge ia chokei ra feito me ie?’ ”
22 Iei alon Kot ewe Samol mi Lapalap,
“Nengeni, üpwe äkänipöü chon ekewe mwün lükün Israel,
üpwe pwal aüetä ai asisil fän iten ekewe aramasen fanüfan.
Iwe, repwe ekieto noum mwän lemolur, pwal noum fefin won afarer.
23 King kana repwe tümwünuk usun eman sam,
nge kiwiin repwe oupwu noum usun eman in.
Repwe chapetiu fän mesom o chönmongöni pwülün pecheöm. Mürin kopwe silei pwe ngang ewe Samol mi Lapalap. Iwe, chokewe mi apilükülüküei resap lichipüng.
24 Ifa usun, eman a tongeni angei seni eman sounfiu mi pwora liapan,
ika angasa chon fötek seni lepöün eman chon mwänewüs? 25 Nge iei mine ewe Samol mi Lapalap a apasa,
“Ewer, ekewe chon fötek repwe ngasala seni lepöün eman sounfiu mi pwora,
nge eman a tongeni angei seni eman chon mwänewüs mine a liapeni.
Pun ngang üpwe fiu ngeni chokewe ra fiu ngonuk,
üpwe pwal amanaua noum kana.
26 Üpwe föri pwe ekewe chon ariaföüuk repwe ochefengeni fituker,
repwe pwal puch ren püsin char usun ar puch ren wain.
Mürin aramas meinisin repwe silei pwe ngang ewe Samol mi Lapalap
om Chon Amanau pwal om Chon Angasa.
Ngang än chon Israel we Kot mi manaman.”