“Oupwe aüselingaei, ämi mi mochen küna manau,

ämi mi feito rei pwe üpwe alisikemi.

Oupwe nenengeni ewe achau oua fal seni,

pwal ewe lenien föüföü oua tu seni.

2 Oupwe nenengeni ämi we lewo Apraham,

pwal Sara inelapemi we.

Lupwen üa köri Apraham, esap wor nöün.

Nge ngang üa afeiöchü pwe a wor nöün,

üa pwal achomonga mwirimwirin kana.

3 Ngang ewe Samol mi Lapalap üpwe achipa Jerusalem

o eäni tong ngeni meinisin mi imweimw lon ekewe imw mi tala.

Üpwe föri pwe fanüan mi pön epwe wewe ngeni Eten,

nge fanüan mi pwas epwe wewe ngeni ai tanipi.

Pwapwa me mwänek epwe fis lon,

pwal kilisou me kölün mwareitiei.

4 Oupwe aüselingaei, ämi nei aramas,

oupwe rongorong ai kapas, ämi nei chon Israel.

Eu allük epwe towu seniei,

nge ai pwüng epwe eu saram ngeni chon ekewe mwü won fanüfan.

5 Iwe, ai pwüng epwe müttir kaneto,

fansoun ai amanaueer a fefeito.

Püsin ngang üpwe nemeni chon ekewe mwü won fanüfan.

Iwe, ekewe fanüen lematau ra witiwitiei,

ra apilükülükü ai üpwe amanaueer.

6 Oupwe netä läng, oupwe pwal nenela won fanüfan.

Iwe, läng epwe morola usun ötüöt,

fanüfan epwe mesingauala usun echö katup,

nge chokewe mi manau won repwe mäla usun chök nikken.

Nge ai angangen amanaua aramas epwe nonom fochofoch,

ai pwüng esap fokun müchüla.

7 Oupwe aüselingaei, ämi mi silei mine a pwüng,

ämi aramas mi amwöchü ai allük lon lelukemi.

Ousap niueiti kapasen esit me ren aramas,

ousap pwal apilükingau ren ar aitengauakemi.

8 Pun repwe rosola usun echö katup pwötür ra eni,

repwe pwal wewe ngeni mangaku seni ülen man mi eniman.

Nge ai pwüng epwe nonom fochofoch,

ai manau epwe tori ekewe täppin aramas meinisin.”

9 Kopwe pwätä, kopwe pwätä, äm Samol mi Lapalap,

kopwe aea om pöchökül o amanauakem.

Kopwe pwätä o alisikem usun chök me lom lon ekewe fansoun ra la.

Ifa usun, sap en ätewe a posu o atatakisi Rahap *Rahap a aliosunätä Isip ewe trakon?

10 Ifa usun, sap en ka apwasa ewe matau mi alolol o föri efoch al

epin, pwe chokewe ka angaseer repwe fetal won?

11 Iwe, chokewe mi manau me reöm repwe liwinsefäl ngeni Jerusalem fän köl.

Pwapwa esemüch epwe nonom rer,

chengel me mwänek repwe etiir,

nge letipeta me ngüngüres repwe sü seniir.

12 Iwe, ewe Samol mi Lapalap a apasa,

“Ngang ewe üa achipok.

Pwota ka niueiti aramas mi mäkai,

ir upun won aramas mi wewe ngeni fetil?

13 Pwota ka manlükala ewe Samol mi Lapalap ewe Chon Föruk,

ewe a ameresala läng o föri longolongun fanüfan?

Pwota ka niuokus fochofoch ren än ewe chon ariaföüuk song,

lupwen a amolätä an epwe ataok?

Ia a nom ie än ewe chon ariaföüuk song?

14 Iwe, ekewe chon fötek repwe müttir ngasala,

resap mäla o feitiu lon lenien sotup,

resap pwal osupwang ren mongö.

15 Pun ngang ewe Samol mi Lapalap om Kot,

itei Samol mi Unusen Manaman.

Üa amwökütü nonoon lematau

pwe repwe ngüngü.

16 Ngang ewe üa ameresala läng

o föri longolongun fanüfan,

üa üreni ekewe aramasen Jerusalem,

‘Ämi nei aramas kana.

Üa ngenikemi ai kapas o aopakemi fän nürün pei.’ ”

17 Kopwe nela o pwätä, en Jerusalem,

en mi ün seni än ewe Samol mi Lapalap kapen apwüng,

a aünü ngonuk fän an song.

Ka pwal apöla lölön ewe kap, iwe, ka mwäliel ren. ✡Pwär 14.10; 16.19

18 Esap wor eman lein noum kewe mwän a emwenuk,

esap pwal wor eman lein noum kewe ka foleni

a amwöchü poum.

19 Ekei ruu feiengau ra feitiu womw:

Fanüom a tatakis o pöla ren maun,

a pwal toruk lengita.

Iö epwe tongeek o achipok?

20 Noum kewe mwän ra aiemämä,

ra konola lepwokukun ekewe al meinisin

usun eman chia mi tup lon eu sär.

Iwe, a fokun toriir pöchökülen än ewe Samol mi Lapalap song,

pwal än om we Kot apwüng.

21 Iei mine kopwe rongorong ei kapas, en mi riaföü,

ka puchala, nge sap ren wain.

22 Iei alon ewe Samol mi Lapalap om Kot, ewe mi peni nöün aramas,

“Nengeni, üa angei seni lepoum ewe kap ka mwäliel ren.

Kosap chüen ünümi seni ewe kapen ai song.

23 Üpwe isenalong ewe kap lepöün chon ariaföüuk,

lepöün chokewe mi ürenuk, ‘Kopwe chapala pwe aipwe fetal womw.’

Ina usun ka awenala sökürum won pwül,

pwe epwe usun chök efoch al ra tongeni fetal won.”