56
Chon tümwünü än Kot pwon ra feiöch
56.1-8
Iei alon ewe Samol mi Lapalap, “Oupwe eäni pwüng o föri mine a let, pun üpwe müttir amanauakemi, nge ai angasakemi epwe pwä. Üpwe afeiöchü ewe aramas a pinini ewe ränin sapat pwe esap angang lon, üpwe pwal afeiöchü ätewe esap föri mine a ngau.”
Iwe, eman chon ekis mi chiechi ngeni nöün ewe Samol mi Lapalap aramas esap apasa, “Ewe Samol mi Lapalap esap mwüt ngeniei ai üpwe choni nöün kewe aramas.” Nge eman mwän esap tongeni nöünöü esap pwal apasa, “Ngang üa chök wewe ngeni efoch irä pwas.” Pun iei alon ewe Samol mi Lapalap, “Ekewe mwän resap tongeni nöünöü, nge ra pinini ai kewe ränin sapat, ra pwal föri mine üa efich o tümwünü ai we pwon, ngang üpwe ngeniir eu lenien achem me eu it me lon imwei, pwal me lon telinimwei. Nge ewe it repwe iteni epwe mürina seni ewe it nei mwän me nei fefin ra iteni. Iwe, üpwe ngeniir eu it esap mola tori feilfeilachök.”
Nge iei alon ewe Samol mi Lapalap usun ekewe chon ekis mi chiechi ngeni nöün aramas, pwe repwe angang ngeni o acheni itan o fel ngeni, ir meinisin mi pinini ewe ränin sapat, pwe resap angang lon, ra pwal tümwünü an we pwon, “Üpwe emwenireto ren chuki mi pin o apwapwaar lon imwei imwen iotek. Iwe, üpwe etiwa ar asoren kek me sokun asor ra uwato won ai rongen asor, pun imwei epwe iteni imwen iotek fän iten aramasen fanüfan meinisin.” Mat 21.13; Mark 11.17; Luk 19.46 Iei alon Kot ewe Samol mi Lapalap, a achufengeni ekewe aramasen Israel mi oola, “Üpwe achu ngeni chon Israel pwal ekoch lükün chokewe ra fen chu ngeni.”
Kot a apwüngü chon Israel pokiten ar angang ngeni anümwäl
56.9–57.13
Ämi mönün lemäl pwal ämi mönün lein wöllap, oupwe feito o mongö. 10 Nöün Israel kewe chon mas ra chun, esap wor eman leir a mefi och. Ir meinisin ra usun chök kolak resap tongeni wörüwör, ra chök kon, ra tan o sani annut chök. 11 Iwe, ra usun chök kolak ra mochen mongömong, nge resap fokun möt. Ekei chon mas resap weweiti och, ra chök en me püsin föri letipan o kütta en me winnan. 12 Iwe, ra apasa, “Ou etto, sipwe kütta ünümach wain me sakau pwe sipwe puchula ren. Mine sa föri ikenai, sipwe pwal alapala le föri lesor.”

56:7: Mat 21.13; Mark 11.17; Luk 19.46