1 Mürin, Jerupaal, iei i Kition me ekewe aramas meinisin mi eti, ra pwätä lesosorusich, ra feila o nonom ünükün ewe puächen koluk lon Harot. Nge lenien chon Mitian a nom peliefengir ren ewe chukuchukutän More lon ewe lemol.

2 Iwe, ewe Samol mi Lapalap a üreni Kition, “Ekei aramas mi etuk ra kon chomong me rei, pwe üpwe föri pwe ekewe chon Mitian repwe kuf rer. Pun chon Israel repwe tunosikesik ngeniei o üra pwe ra püsin amanaueer ren ar pöchökül. 3 Iei mine kopwe asilefeili ei pworaus lein ekewe aramas, ‘Iö me leimi a niuokus o chechech epwe liwin me won ei chuk Kiliat o liwiniti lenian.’ ” Iwe, rüe me ruungeröü mwän ra liwin, nge engol ngeröü ra chüen nom. ✡Tut 20.8

4 Nge ewe Samol mi Lapalap a üreni Kition, “Ekei aramas ra chüen kon chomong. Kopwe emweniretiu ren ewe koluk, nge ngang üpwe aimwürela fän itom ikenan. Are üpwe ürenuk, ‘Ei mwän epwe etuk,’ ätewe epwe etuk. Nge are üpwe ürenuk, ‘Ei mwän esap etuk,’ ätewe esap etuk.” 5 Iei mine Kition a emwenätiu ekewe aramas ren ewe koluk. Nge ewe Samol mi Lapalap a üreni, “Iteiten eman me eman mi üfi koluk ngeni pöün o mitiri usun eman kolak a mitiri koluk, kopwe aimwüela. Nge ekewe mi fotopwäsuk le ün, repwe pwal imwüla.” 6 Iwe, iteiten chokewe mi mitiri koluk seni lepöür ükükün ülüpükü mwän. Nge ekewe lusun meinisin ra fotopwäsuk le ün. 7 Iwe, ewe Samol mi Lapalap a üreni Kition, “Ren ekewe ülüpükü mwän mi mitiri ewe koluk üpwe amanauakemi o föri pwe ekewe chon Mitian repwe kuf rer. Nge ekewe lusun meinisin repwe en me liwiniti lenian.” 8 Iwe, Kition a tinala ekewe lusun chon Israel ngeni en me lenian, nge ekewe ülüpükü mwän a amwöchüretiu. Ir ätekewe mi angei seni chiener kewe mi liwin pisekir me nöür kewe rappwa. Iwe, lenien ekewe chon Mitian a nom fan lon ewe lemol.

9 Lon ewe chök pwinin ewe Samol mi Lapalap a üreni Kition, “Kopwe pwätä o feitiu lon lenien chon Mitian pwe kopwe maun ngeniir, pun üpwe föri met kopwe akufuur ren. 10 Nge are ka niuokus le feitiu, Pura noum we chon angang epwe etuketiu. 11 Iwe, kopwe rongorong mine repwe üra, mürin kopwe pwora le feitiu o maun ngeni ewe leni.” Mürin, Kition me Pura nöün chon angang ra feitiu ren ewe lenien mamas än ekewe sounfiu. 12 Iwe, ekewe chon Mitian me chon Amalek, pwal ekewe aramas meinisin seni ötiu ra nom lon ewe lemol, usun epwi pwiin lifichimas ren chomongur. Nge nöür kamel ese lea, pun ra usun chök föün pien aroset. 13 Lupwen Kition a feito, a rong pwe eman mwän a apworausa ngeni chienan we an tan. A üreni, “Üa eäni eu tan pwe üa küna eföü pilawa seni parli a sokopenelong lon leniach. A küw eu imw mangaku pwe a turutiu o tala.” 14 Nge chienan a üreni, “Ei a pwärätä pwe iei fokun nöün Kition we ketilas, i nöün Joas we mwän, eman re Israel. Esor och wewen lükün. Kot a mwüt ngeni Kition pwe epwe akufu ewe mwicheichen sounfiun Mitian meinisin.”

15 Iwe, lupwen Kition a rong ei tan me wewen, a fel ngeni Kot. Iwe, a liwinla ren lenien chon Israel o üreniir, “Oupwe pwätä, pun ewe Samol mi Lapalap a mwüt ngenikich pwe sipwe akufu ewe mwicheichen sounfiun Mitian.” 16 Iwe, a ineti ekewe ülüpükü mwän lon ülüngat mwich, a pwal ngeniir meinisin rappwa me pör mi pön, nge a wor töl lon ekewe pör. 17 Iwe, a üreniir, “Oupwe nenengeniei o föri usun mine üa föri. Lupwen üpwe tori ororun lenier, oupwe chök föri usun mine üa föri. 18 Lupwen aipwe ettiki nöüm rappwa, äm me chokewe mi etiei, pwal ämi oupwe ettiki nöümi kewe rappwa pwelin ünükün ewe lenien sounfiu o arukak, ‘Fän iten ewe Samol mi Lapalap, pwal fän iten Kition.’ ” 19 Iwe, Kition me ekewe ipükü mwän mi eti ra tori ororun ewes leni, lupwen fansoun lepoputän aruuen akasiwilin chon mas lukenipwin. Ekewe sounfiu ra chök kärän popuetä le mas. Mürin, ra ettiki nöür kewe rappwa o amökkü ekewe pör mi nom lepöür. 20 Iwe, ekewe ruu mwich ra pwal ettiki nöür kewe rappwa o amökkü ekewe pör. Lon pöüimöngür ra amwöchü ekewe töl, nge lon pöüifichir ra amwöchü nöür kewe rappwa o kökkö, “Ewe ketilas fän iten ewe Samol mi Lapalap, pwal fän iten Kition.” 21 Ra ütä eman me eman lon pwelin ünükün lenien ekewe sounfiun Mitian. Nge ekewe sounfiun Mitian meinisin ra ssä, ra puchör o süla. 22 Nge lupwen ekewe re Israel ra ettiki nöür kewe ülüpükü rappwa, ewe Samol mi Lapalap a föri pwe iteiten eman me eman sounfiun Mitian a fiu ngeni püsin chienan. Iwe, ewe mwichen sounfiu a süla tori Petsita sasape ngeni Serera, pwal tori ewe kiännin Apel-mehola arun Tappat. 23 Mürin, ra enieto ekewe re Israel seni ekewe ainangen Naftali me Aser, pwal unusen ewe ainangen Manasa. Iwe, ra feito o tapweri ekewe chon Mitian.

24 Iwe, Kition a tinala chon künö ren ekewe aramas mi nom lemenen ewe chukuchukutän Efraim, pwe repwe üreniir, “Oupwe feitiu o maun ngeni ekewe chon Mitian. Oupwe tokumweer o elliapa ekewe koluk tori Pet-para, pwal ewe chanpupu Jortan, pwe chon Mitian resap tongeni pwerela pekila.” Iei mine ekewe re Efraim meinisin mi kököto ngeni ewe maun ra feito o liapeni ekewe koluk tori Pet-para, pwal ewe chanpupu Jortan. 25 Ra pwal liapeni ekewe ruoman samolun Mitian iter Orep me Seep. Iwe, ra niela Orep me ren ewe achau lon Orep, nge Seep ra niela me ren ewe lenien üchüch wain lon Seep. Mürin ra tapweri ekewe chon Mitian, o uwato möküren Orep me Seep ren Kition ötiuen ewe chanpupu Jortan.