1 Mürin än Apimelek mäla a ütä Tola nöün Pua we mwän, nge Pua nöün Toto mwän, pwe epwe angasa Israel. Tola eman mwän seni ewe ainangen Isakar a nom lon Samir won chukuchukutän ewe fanü Efraim. 2 Iwe, a soukapwüng lon Israel lon ükükün rüe me ülüngat ier. Mürin a mäla, nge ra peiaseni lon Samir.

3 Nge mürin än Tola mäla a ütä Jair ewe re Kiliat. Iwe, a soukapwüng lon Israel lon ükükün rüe me ruu ier. 4 A wor ilik nöün mwän mi wawa ilik aas, a pwal wor ilik ar telinimw lon ewe fanü Kiliat mi chüen iteni Hawot-jair *wewen Hawot-jair telinimwen Jair tori ikenai. 5 Iwe, Jair a mäla, nge ra peiaseni lon Kamon.

6 Iwe, ekewe aramasen Israel ra pwal förisefäli mine a ngau me fän mesen ewe Samol mi Lapalap, pwe ra angang ngeni ekewe anü Paal me Astarot, ngeni ekewe koten Siria me Siton, ekewe koten Moap me än chon Amon pwal än chon Filistia kewe kot. Ra likitala ewe Samol mi Lapalap o ükütiu le angang ngeni. 7 Iei mine ewe Samol mi Lapalap a fokun song ngeni chon Israel o asechirela ngeni chon Filistia me chon Amon 8 mi aweiresiir o ariaföüür lon ena fansoun. Iwe, lon ükükün engol me walu ier ra ariaföüü ekewe aramasen Israel meinisin mi nom ötiuen ewe chapupu Jortan lon Kiliat ewe fanüen chon Amor. 9 Iwe, ekewe chon Amon ra pwal pwereto pekiton ewe chanpupu Jortan, pwe repwe pwal maun ngeni chon ekewe ainangen Juta, Peniamin me Efraim. Iei mine chon Israel ra fokun riaföü.

10 Mürin, ekewe aramasen Israel ra siö ngeni ewe Samol mi Lapalap o apasa, “Äm aia tipis ngonuk, pun aia likitukela, en äm Kot, o angang ngeni ekewe anü Paal.” 11 Nge ewe Samol mi Lapalap a üreni ekewe aramasen Israel, “Lupwen ekewe chon Isip me chon Amor, ekewe chon Amon me chon Filistia, 12 pwal ekewe chon Siton, chon Amalek me chon Maon ra ariaföüükemi me lom, oua siö ngeniei. Ifa usun, ngang üsap angasakemiiwu seni fän nemenier?” 13 Nge oua chök likitieila o angang ngeni pwal ekoch kot. Iei mine üsap chüen amanauakemi. 14 Oupwe feila o siö ngeni ekewe kot oua filiretä. Ir repwe amanauakemi lon fansoun ämi riaföü.” 15 Nge ekewe aramasen Israel ra üreni ewe Samol mi Lapalap, “Äm aia tipis. Kopwe chök föri ngenikem mine a mürina ngonuk. Nge äm aia tüngor ngonuk pwe kopwe chök amanauakem ikenai.” 16 Mürin, ra pöütala ar kewe koten ekis mi nom rer o angang ngeni ewe Samol mi Lapalap. Iwe, Kot a chüngüw ekewe chon Israel lon ar riaföü.

17 Lupwen chon Amon ra amolätä ngeni maun o nonom lon Kiliat, ekewe aramasen Israel ra pwal chufengen o nonom lon Mispa. 18 Iwe, ekewe aramasen Kiliat me nöür kewe souemwen ra kapasfengen lefiler, “Iö epwe popuetä le maun ngeni ekewe chon Amon, i epwe nemeni chon Kiliat meinisin.”