1 Iwe, lon ena fansoun, lupwen esap wor eman king lon Israel, eman mwän seni ewe ainangen Lefi a wasöla won chukuchukutän ewe fanü Efraim mi toauala. Ätewe a angei eman ülüpwülüan seni Petleem lon Juta. 2 Iwe, ülüpwülüan a song ngeni, a sü seni o liwiniti imwen seman mi nom Petleem lon Juta. A nom ikenan lon ükükün rüanü maram. 3 Mürin, pwülüan we a ütä o feila mürin, pwe epwe fos pwetete ngeni o aliwinisefäli. Nge eman nöün chon angang me ruoman aas ra eti. Iwe, neminewe a emwenalong lon imwen saman, nge lupwen semen ewe föpwül a küna, a etiwa fän pwapwa. 4 Mürin, semen ülüpwülüan we a pesei pwe epwe nom ren lon ükükün ülüngat rän. Ra mongö o ün, ra pwal pwinipwin ikenan. 5 Iwe, lon arüanün rän ra pwätä lesosorusich, nge ewe mwän seni ewe ainangen Lefi a amolätä ngeni an epwe feila. Nge semen ewe föpwül a üreni pwülüen nöün we, “Kopwe chunuk me mwen om kopwe feila.” 6 Iei mine ekewe ruoman mwän ra mottiu, ra mongö o ünfengen. Iwe, semen ewe föpwül a üreni ewe mwän, “Kose mochen kopwe pwal pwinini epwin o pwapwa.” 7 Nge lupwen ewe mwän seni ewe ainangen Lefi a ütä pwe epwe feila, semen ülüpwülüan we a pesei tori a pwal pwinipwinsefäl. 8 Iwe, lon alimuen rän ewe mwän seni ewe ainangen Lefi a pwätä lesosorusich pwe epwe feila. Nge semen ewe föpwül a üreni, “Kopwe chunuk o witiwit tori leolopal.” Iwe, ra mongöfengen. 9 Nge lupwen ewe mwän me ülüpwülüan we pwal nöün chon angang ra ütä pwe repwe feila, semen ülüpwülüan we a üreni, “Nengeni, a arapakan epwe le lekuniol, kose mochen kopwe nonom rei pwal lon ei pwin. A arapakan epwe le pwinila. Kopwe pwinipwin ikei o pwapwa. Iwe, lesor kopwe pwätä lesosorusich o sai ngeni leniom.”

10 Nge ewe mwän esap mochen pwinini pwal epwin. Iei mine a ütä, a feila o sai wenewen ngeni Jepus, iei Jerusalem, pwal nöün kewe ruoman aas mi uwou pisek me ülüpwülüan we ra eti. 11 Lupwen ra arap ngeni Jepus, a pwinila. Iwe, ewe chon angang a üreni an samol. “Ousipwe rik ngeni ewe telinimwen chon Jepus o pwinipwin lon.” 12 Nge an we samol a üreni, “Apwi, sisap rik ngeni ewe telinimwen chon ekis, ir resap chon Israel. Nge sipwe feila Kipea.” 13 A pwal üreni nöün we chon angang, “Ousipwe feila pwe sipwe achocho ngeni ach sipwe tori Kipea ika Rama o pwinipwin ie.” 14 Iei mine ra feila won aler, nge ewe akkar a tuputiu, lupwen ra arap ngeni Kipea lon fanüen chon ewe ainangen Peniamin. 15 Iwe, ra rik ngeni Kipea pwe repwe pwinipwin ikenan. Ra tolong lon ewe telinimw o mot lon ewe lenien amwicheich, nge esap wor eman a etiweer lon imwan pwe repwe pwinipwin.

16 Lon ewe chök kuniolun, eman chinlap mwän a liwinto seni an angang lemäl. Wesewesen lenien ewe mwän won chukuchukutän ewe fanü Efraim, nge iei a nom lon Kipea. Nge chon ewe leni chon ewe ainangen Peniamin. 17 Iwe, ewe chinlap mwän a küna ewe chon siamü lon ewe lenien amwicheich o aisini, “Ia ka feito me ie? Nge ia kopwe feila ie?” 18 Nge ewe mwän seni ewe ainangen Lefi a pälüeni, “Äm aia feito seni Petleem lon Juta, pwe aipwe le feila ngeni chukuchukutän ewe fanü Efraim mi toauala, ia üa feito me ie. Üa feila Petleem lon Juta, nge iei üpwe liwiniti leniei. Iwe, esap wor eman a etiwaei lon imwan. 19 A wor rei fetilipwas me enen nöüm aas. A pwal wor pilawa me wain fän itei, fän iten ülüpwülüei me nei we chon angang. Esap wor och am aia osupwang ren. 20 Iwe, ewe chinlap mwän a üreni, “Ngang üpwe pwapwa le etiwook lon imwei. Üpwe tümwünü ngonuk meinisin mine ka osupwang ren. Eu chök, kosap annut lon ei lenien amwicheich.” 21 Iei mine a emwenirela lon imwan, a pwal amongöü nöür kewe aas. Nge ir ra talü pecher, ra mongö o ün.

22 Iwe, lupwen ra pwapwafengen, mwän mi manauangau seni ewe telinimw ra pweli ewe imw o sukuolong asaman. Ra üreni ewe chinlap mwän mine imwan we, “Kopwe atowu ewe mwän mi tolong lon imwomw pwe äm aipwe pwülüeni.” 23 Nge ewe chinlap a towu rer o üreniir, “Apwi, pwii, ouse mochen ousap föri ei sokun lapalap mi fokun ngau. Ei mwän nei wasöla, ousap fokun föri ei sokun föför mi anioput. 24 Nengeni, iei i nei föpwül esamwo tori mwän me ülüpwülüen ei mwän, üpwe emwenirewu remi. Oupwe föri ngeniir mine oua mochen, nge ousap föri ei sokun föför mi anioput ngeni ewe mwän.” ✡Ken 19.5-8 25 Nge ekewe mwän resap mochen aüselinga. Iei mine ewe mwän seni ewe ainangen Lefi a angei ülüpwülüan we o tinawu rer. Iwe, ra achomanauei o turunufasei lon unusen ewe pwin. Nge lupwen a tö mallen rän, ra likitala. 26 Lupwen a arap ngeni an epwe le rän, ewe fefin a feito o turula lükün asamalapen imwen ewe chinlap mwän, ia pwülüan we a nom ie. A nom ikenan tori a ränila.

27 Iwe, pwülüen neminewe a pwätä lesosor, nge lupwen a suki asamalapen ewe imw o towu pwe epwe sopwela an sai, a küna ülüpwülüan we mi kon ünükün asamalapen ewe imw, nge pöün a itila won penkasamen ewe imw me fan. 28 Iwe, a üreni, “Kopwe pwätä, pun sipwe feila.” Nge neminewe esap kapas. Iei mine ewe mwän a ekietä neminewe won ewe aas o sopwela an sai. 29 Nge lupwen a tori imwan, a angei efoch naif, a kamwöch ülüpwülüan we o kinikisietiu inisin lon engol me ruu kinikin. Mürin, a tinala ekewe kinikin ren ekewe engol me ruu ainangen Israel. ✡1.Sam 11.7 30 Iwe, meinisin mi küna ei ra apasa, “Ei sokun mettoch esamwo fis. Esamwo pwä ei sokun föför seni ewe fansoun ekewe aramasen Israel ra towu seni Isip tori ikenai. Oupwe ekieki usun, oupwe pwüngüpwüngfengen o apasätä mefiemi won.”