1 Iwe, ewe Samol mi Lapalap a kapas ngeni Jeremaia mürin än Nepusaratan ewe meilapen chon tümwünü ewe king a angasala i me lon Rama. Nepusaratan a küna Jeremaia me ikenan, pwe a föfö ngeni sein o nom lein ekewe chon oola seni Jerusalem me Juta, ir chokewe repwe feila Papilon. 2 Iwe, ewe meilapen chon tümwünü ewe king a angei Jeremaia o üreni, “Ewe Samol mi Lapalap om we Kot a apwüngala ei feiengau mi fis ngeni ei leni. 3 Iei a apwönüetä o föri usun mine a apasa. Pun ämi oua tipis ngeni ewe Samol mi Lapalap, pwe ousap aleasochisi, iei mine ekei feiengau ra torikemi. 4 Nengeni, üpwe angasok ikenai seni föfön poum. Are ka mochen etiei le feila Papilon, kopwe etiei, nge ngang üpwe tümwünüöchuk. Nge are kosap mochen etiei le feila Papilon, kosap etiei. Nengeni, unusen ei fanü a nom mwom, kopwe püsin filätä ia ka mochen feila ie. 5 Nge are kopwe nonomotiu, kopwe liwinla ren Ketalia nöün Aikam we mwän, nge Aikam nöün Safan. Ketalia i ätewe ewe kingen Papilon a awisa pwe epwe kepinan ekewe telinimwen Juta. Kopwe nom ren lein ekewe aramas, ika kopwe feila ia ka mochen feila ie.” Mürin, ewe meilapen chon tümwünü ewe king a ngeni Jeremaia mongö me lifang o afeiloi. 6 Iwe, Jeremaia a feila ren Ketalia nöün Aikam we lon Mispa o nom ren ekewe aramas mi chüen nom lon ewe fanü.

7 Nge ekewe meilapen ekewe sounfiun Juta mi nom lemäl fiti nöür sounfiu ra rong, pwe ewe kingen Papilon a awisa Ketalia nöün Aikam we pwe epwe kepinan ewe fanü, a pwal awisa pwe epwe nemeni ekewe mwän, fefin me semirit, chokewe mi fokun wöüngau me lon ewe fanü resap oola Papilon. 8 Ikkei iten ekewe meilap: Ismael nöün Netania we mwän, Johanan nöün Karea we, Seraia nöün Tanumet, nöün Efai kewe ewe re Netofa me Jesania nöün eman re Maka. Irfengen me nöür kewe sounfiu ra feila ren Ketalia mi nom Mispa. 9 Iwe, Ketalia a pwon fän akapel ngeniir me nöür kewe sounfiu o üreniir, “Ousap niuokus, oupwe fangatä ngeni ekewe chon Papilon. Oupwe nonom lon ei fanü o angang ngeni ewe kingen Papilon, mürin meinisin epwe öch fän itemi. ✡2.King 25.22-24 10 Nge ngang üpwe nonom Mispa, pwe üpwe tupunikemi ren ekewe chon Papilon repwe feito rech. Nge ämi oupwe kini föün irän wain, föün irän leres me föün olif o iseniir lon ämi kewe pör. Oupwe pwal imweimw lon ekewe telinimw oua angeesefäliir.” 11 Pwal ekewe chon Juta meinisin mi nom Moap, Amon, Etom me pwal ekoch fanü ra rongorong pwe ewe kingen Papilon a likitala ekoch aramas lon Juta o awisa Ketalia, pwe epwe nöür kepina. 12 Mürin, ekewe chon Juta meinisin ra liwin seni ekewe leni meinisin ia ra toropas ie, o feila lon ewe fanü Juta ren Ketalia lon Mispa. Iwe, ra ionifengeni chomong, chomong föün irän wain me föün irän leres.

13 Iwe, Johanan nöün Karea we mwän me ekewe souemwenin ekewe mwichen sounfiu meinisin mi nom lemäl ra feito ren Ketalia lon Mispa. 14 Iwe, ra üreni, “Ka silei pwe Paalis ewe kingen chon Amon a tinato Ismael nöün Netania we mwän, pwe epwe niikela?” Nge Ketalia nöün Aikam we esap lüküür. 15 Mürin, Johanan a kapas ngeni Ketalia le monomon me lon Mispa, “Kopwe mwüt ngeniei pwe üpwe feila o niela Ismael nöün Netania we, nge esap wor eman epwe silei. Pwota epwe niikela, pwe ekewe chon Juta meinisin mi chufengen reöm repwe toropas, nge ekewe lusun aramas mi chüen nom lon Juta repwe rosola?” 16 Nge Ketalia a üreni Johanan, “Kosap föri ei föför, pun esap pwüng om kapas fän iten Ismael.”