50
Kapasen osuni fänäsengesin Papilon
50.1-46
1 Ikkei ekewe kapas ewe soufos Jeremaia a apasa fän alon ewe Samol mi Lapalap fänäsengesin Papilon me aramasen lon,
2 “Oupwe asilefeili ekei kapas me lein chon ekewe mwü o arongafeiliir,
oupwe aürätä eu asisil o arongafeili ei pworaus.
Ousap tükümala, nge oupwe apasa,
‘Papilon a oo.
Ewe anü Pel a itengau, ewe anü Merotak a rükö.
An kewe uluulun anümwäl ra itengau,
an kewe uluulun anümwäl mi anioput ra tatakis.’ 3 Pun chon eu mwü ra feito seni efeng pwe repwe maun ngeni Papilon. Repwe ataala ewe fanü pwe esap wor eman epwe nonom lon. Aramas me man repwe sü seni ewe fanü.”
4 Iei alon ewe Samol mi Lapalap, “Lon ena fansoun ekewe aramasen Israel me Juta repwe feitopök nge kechü, repwe küttaei ngang ewe Samol mi Lapalap ar we Kot. 5 Repwe ais ewe al mi ale ngeni Sion o feila ngeni. Iwe, repwe apasa, ‘Ousipwe achufengenikich me ewe Samol mi Lapalap fän eu pwon mi nom tori feilfeilachök, eu pwon esap manlüküla.’
6 Nei aramas ra usun chök sip mi malechela. Nöür kewe chon mas ra atokeer o emwenirela won ekewe chuk. Ra feila seni eu chuk tori pwal eu, resap chüen chechemeni ar lenien asösö. 7 Meinisin mi küneer ra ocheer. Chon oputer ra apasa, ‘Esap wor ach tipis ren mine sia föri, pun ir ra tipis ngeni ewe Samol mi Lapalap. Ar kewe lewo ra apilükülükü ewe Samol mi Lapalap, nge itä pwal ir repwe allükülük ngeni.’
8 Ämi chon Israel, oupwe sü seni Papilon, oupwe towu seni ewe fanü. Oupwe wewe ngeni ekewe ätemwänin kuch mi akom mwen ewe pwiin man. ✡Pwär 18.4 9 Pun nengeni, üpwe äpwächa o awarato eu mwichen aramas seni ekewe mwü watte mi nom efeng, pwe repwe maun ngeni Papilon. Repwe atetteliir pwe repwe maun ngeni ewe fanü o liapeni. Nöür kewe sounfiu mi sipeöch le esefich ra fokun föüen. 10 Aramas repwe angei pisekin chon Papilon fän pöchökül, nge repwe fokun angei ükükün ar mochen. Ngang ewe Samol mi Lapalap üa kapas.”
11 Iei alon ewe Samol mi Lapalap, “Ämi chon Papilon, oua angei pisekin lon fanüei fän pöchökül. Oua meseik o pwapwa, oua pwal mwetemwet usun eman nienifön kow mi wichiwich umwun wiich o tikitik usun oris mi pöchökül. 12 Nge püsin ämi we telinimw mi watte epwe küna tekison o itengau. Papilon epwe wiliti eu mwü mi kis seni ekewe mwü meinisin, epwe eu fanüapö, eu fanü mi pwasapwas o pön. 13 Pokiten ai lingeringer, Papilon esap so, nge epwe eu fanü mi fokun pönüla. Aramas meinisin mi pwerela ünükün repwe rükö, repwe turunufasei pokiten an tatakis. 14 Oupwe atettelikemi pwelin ünükün Papilon pwe oupwe maun ngeni, ämi meinisin mi emeia nöümi esefich. Oupwe änna Papilon, nge ousap achika nöümi föün esefich, pun i a tipis ngeniei ngang ewe Samol mi Lapalap. 15 Oupwe alapätä ewe akürangen maun pwelin ünükün ewe telinimw. Papilon a fangatä, an kewe imw tekia ra turutiu, nge tittin kewe ra tatiu. Pun iei ngang ewe Samol mi Lapalap üa ngeni chon Papilon chappen ar föför. Oupwe ngeniir chappen ar föför, oupwe föri ngeniir usun mine ra fen föri ngeni aramas. 16 Oupwe ärala seni Papilon ätewe mi amwora pwükil, pwal ätewe mi kinikin uän irä lon fansoun kinikin. Ekewe chon siamü repwe en me liwiniti püsin aramasan o süla ngeni poputän fanüan, pokiten ra niuokusiti ekewe chon maun.”
17 Iei alon ewe Samol mi Lapalap, “Chon Israel ra usun chök sip mi toropas, ekewe laion ra cherela. Ewe kingen Asiria a akomwen ocheer, mürin Nepukatnesar ewe kingen Papilon a ineei chüür. 18 Iei mine ngang ewe Samol mi Unusen Manaman ewe Koten Israel üa apasa, ‘Üpwe apwüngü ewe kingen Papilon pwal fanüan, usun üa apwüngü ewe kingen Asiria. 19 Üpwe aliwinisefäli chon Israel ngeni fanüer. Repwe mongö seni ewe chuk Karmel me ewe fanü Pasan. Repwe fokun mötüla ren ar mongö seni ewe chukun Efraimw me ewe fanü Kiliat. 20 Lon ena fansoun repwe kütta än Israel föföringau, nge esap wor. Repwe kütta än Juta tipis, nge resap küna. Pun ngang üpwe amusala än ekewe aramas tipis, ir chokewe üa amanaueer. Ngang ewe Samol mi Lapalap üa kapas.’ ”
21 Iei alon ewe Samol mi Lapalap, “Oupwe feila o maun ngeni ewe fanü Merataimw, pwal ngeni chon Pekot. Oupwe nirela o fokun aroserela, oupwe föri meinisin mine üa allük ngenikemi. 22 Akürangen maun epwe fis lon ewe fanü, pwal watten feiengau. 23 Papilon ewe ama mi pöchökül ngeni unusen fanüfan a fokun tala o mökküla. Chon ekewe mwü meinisin ra rükö ren mine a fis ngeni ewe fanü. 24 Ngang üa anomu eu sär fän itom, en Papilon, ka tup lon mwen kosamwo mefi. Ka oo, pun ka ü ngeniei. 25 Ngang ewe Samol mi Lapalap üa suki ai lenien iseis pisekin maun o atowu ekewe pisekin afeiengau fän ai lingeringer. Pun ngang Kot ewe Samol mi Unusen Manaman a wor ai angang üpwe föri lon fanüen chon Papilon. 26 Ou etto seni ekewe pelien fanüfan o maun ngeni Papilon. Oupwe suki an lenien iseis föün wiich. Oupwe ionifengeni liapemi usun ioien föün wiich o fokun ataela Papilon. Ousap likiti och seni. 27 Oupwe niela nöür kewe sounfiu meinisin. Repwe feitiu lon ewe lenien ninnila. Feiengauen chon Papilon, pun ränir a war, ewe fansoun repwe küna kapwüng lon.”
28 Oupwe rongorong pworausen ekewe choisä me chokewe mi süla seni Papilon. Ra feito Sion o asilefeili usun ewe Samol mi Lapalap ach we Kot a ngeni chon Papilon chappen ar föför ngeni imwan imwenfel
29 “Oupwe körifengeni ekewe chon esefich, chokewe meinisin mi emeia nöür esefich pwe repwe maun ngeni Papilon. Oupwe nom pwelin ünükün ewe telinimw pwe esap wor eman epwe tongeni sü seni. Oupwe liwini ngeni won ükükün an föför, oupwe föri ngeni usun mine i a föri ngeni aramas, pun a ü ngeniei fän lamalamtekia, ngang ewe Samol mi Lapalap ewe mi Pin lon Israel. ✡Pwär 18.6 30 Iei mine nöün kewe alüal repwe mäla lon ekewe alen ewe telinimw, nge nöün kewe sounfiu meinisin repwe rosola lon ena ränin. Ngang ewe Samol mi Lapalap üa kapas.”
31 Iei alon Kot ewe Samol mi Unusen Manaman, “Üa ü ngonuk, Papilon, en mi lamalamtekia. A war ränum, ewe fansoun om kopwe küna apwüng lon. 32 En mi lamalamtekia kopwe chepetek o turula, nge esap wor eman epwe aütäsefälik. Ngang üpwe aküw eu ekkei lon om we telinimw, epwe kenala meinisin mi nom pwelin ünükün.”
33 Iei alon ewe Samol mi Unusen Manaman, “Ekewe aramasen Israel me Juta ra küna riaföü. Meinisin mi uweerela pwe repwe oola ra fokun amwöchüür. Resap fokun mwüt ngeniir pwe repwe liwinla ngeni fanüer. 34 Nge ar Chon Amanau a pöchökül, itan ewe Samol mi Unusen Manaman. Epwe fokun peniir, pwe epwe awora kinamwe ngeni fanüfan, nge ngeni ekewe chon Papilon epwe awora osukosuk.”
35 Iei alon ewe Samol mi Lapalap,
“Mäla epwe tori ekewe chon Papilon,
epwe pwal tori chokewe mi imweimw lon Papilon.
Epwe tori nöür kewe nöüwis me nöür kewe mwän mi tipachem.
36 Mäla epwe tori ekewe soupwe,
pwe repwe wiliti chon umwes.
Mäla epwe tori nöür kewe sounfiu,
pwe repwe rükö.
37 Mäla epwe tori nöür kewe oris me war kewe woken,
epwe pwal tori nöür kewe sounfiu chon ekis mi nom leir,
pwe repwe tipeni tipen fefin.
Oupwe atatakisi wöür
o angei pisekir fän pöchökül.
38 Akkaren lefen epwe tumwuri ar kewe koluk
pwe repwe pwasatä.
Pun ei fanü fanüen uluulun anümwäl mi eniweniw,
nge ekewe aramas ra umwesila ren.
39 Iei mine ekewe manmwacho repwe nomopök me ekewe wolif lon Papilon, pwal ekewe machang iter fukuro repwe nonom ie. Ewe fanü esap chüen so tori feilfeilachök, esap fokun wor eman epwe nonom lon seni eu täppin aramas tori eu täppin. ✡Pwär 18.2 40 Usun ngang üa ataela Sotom me Komora me ekewe telinimw ünükür, iei usun üpwe pwal ataela Papilon pwe esap wor eman epwe chüen nonom lon ika siamüfetal ie. Ngang ewe Samol mi Lapalap üa kapas. ✡Ken 19.24-25
41 Nengeni, eu mwichen sounfiu a feito seni efeng.
Chon eu mwü mi watte me chomong king
ra mwöküt seni lesopun fanüfan.
42 Ra uwou esefich me siles,
ra fokun ariaföüü aramas, nge resap sile tong.
Ngüngür a usun chök ngüngün lematau,
lupwen ra sä won nöür kewe oris.
Ra wewe ngeni sounfiu mi tettel pwe repwe maun ngeni Papilon.
43 Ewe kingen Papilon a rong pworauser.
Mürin, pöün ra chök ititiu.
Niuokus watte a feitiu won,
a pwal cheri cheuch usun cheuchen fam a cheri eman fefin.
44 Usun eman laion a towu seni ewe wöllap arun ewe chanpupu Jortan o feila ngeni eu lenien enen sip, iei usun üpwe müttir feito o asüela chon Papilon seni fanüer. Mürin üpwe awisa ätewe üa filätä pwe epwe nemeni Papilon. Iö epwe wewe ngeniei? Iö epwe pälüeniei? Meni souemwen a tongeni ü ngeniei? 45 Iei mine oupwe rongorong usun mine ngang ewe Samol mi Lapalap üa akota ngeni Papilon, pwal mine üa ekiekietä ngeni chon ewe fanü: Ellet, repwe nukiela pwal ekewe semirit, nge aramas meinisin repwe fokun rükö ren. 46 Fanüfan epwe chechech ren akürangen än Papilon turutiu. Chon ekewe mwü repwe rongorong ar puchör.”