1 Iwe, Setekia a rüe me eu lupwen a tolong lon wisan wisen king. A nom lon Jerusalem o nemeni Juta lon ükükün engol me eu ier. Iten inan Hamutal nöün Jeremaia we fefin seni Lipna. 2 Nge Setekia a föri mine a ngau me fän mesen ewe Samol mi Lapalap usun chök mine Jehoiakim a föri. 3 Iwe, ewe Samol mi Lapalap a song ngeni ekewe chon Jerusalem me chon Juta, iei popun a asürela seni fän mesan. Nge Setekia a ü ngeni ewe kingen Papilon.

4 Iwe, lon atiuen ierin mwün Setekia lon aengolun ränin ewe aengolun maram, Nepukatnesar ewe kingen Papilon a feito me an mwichen sounfiu meinisin, pwe epwe maun ngeni Jerusalem. Iwe, ra pwelifeili Jerusalem fän pisekin maun o senätä eu ororen maun ngeni pwelin ünükün. ✡Is 24.2 5 Iwe, ra pwelifeili ewe telinimw fän pisekin maun tori engol me euin ierin mwün ewe king Setekia. 6 Iwe, lon atiuen ränin ewe arüanün maram ewe lengita lon ewe telinimw a fokun watte, pwe esap chüen wor mongö fän iten aramasen lon. 7 Mürin, ekewe sounfiu ra pwangenalong tittin ewe telinimw. Iwe mwo än ekewe chon Papilon nom pwelin ünükün ewe telinimw, ekewe sounfiu meinisin ra süwu seni ewe telinimw lepwin won ewe al ngeni ewe asamalap lefilen ekewe ruu tit ren tanipin ewe king. Iwe, ra süla ngeni akawenewenen ewe lemolun Jortan. ✡Is 33.21 8 Nge ekewe sounfiun Papilon ra tapweri ewe king Setekia o tori me lon ewe maasiesin Jeriko. Iwe, nöün Setekia sounfiu meinisin ra sü seni. 9 Mürin ar liapeni Setekia ra emwenala ren ewe kingen Papilon mi nom Ripla lon ewe fanü Hamat. Iwe, ewe kingen Papilon a apwüngala mine epwe fis ngeni. 10 Iwe, a niela nöün Setekia kewe mwän me fän mesan, a pwal niela ekewe nöüwisen Juta meinisin me lon Ripla. 11 Mürin, ewe kingen Papilon a alusawu föün mesen Setekia o föti ngeni sein. A uwala Papilon o anomu lon imwen fötek tori ränin an mäla. ✡Is 12.13

12 Iwe, lon ewe aengolun ränin ewe alimuen maram, iei ewe engol me tiuen ierin mwün Nepukatnesar ewe kingen Papilon, Nepusaratan ewe meilapen chon tümwünü ewe king, i eman nöün ewe kingen Papilon nöüwis, a tolong Jerusalem. 13 Iwe, a kenala imwen ewe Samol mi Lapalap me imwen ewe king, pwal ekewe imw meinisin lon Jerusalem. Iteiten imw mi aüchea a kenala. ✡1.King 9.8 14 Nge an mwichen sounfiu meinisin seni Papilon ra ataela ewe tit mi pwelifeili Jerusalem. 15 Mürin, Nepusaratan ewe meilapen chon tümwünü ewe king a uweela Papilon ekoch lein ekewe aramas mi mwelele, pwal chokewe mi chüen manau me lon ewe telinimw, me chokewe mi süla ren ewe kingen Papilon me mwan, fitifengen me ekewe lusun aramas mi sipeöch le angang. 16 Nge Nepusaratan a likiti lon ewe fanü ekoch aramas mi fokun mwelele, pwe repwe chon angang lon tanipin wain me chon tuw pwül.

17 Iwe, ekewe chon Papilon ra atatakisi ekewe ür seni piras, ekewe kürüma me ewe sepien koluk mi watte seni piras mi nom lon imwen ewe Samol mi Lapalap. Nge ekewe piras meinisin ra uweela Papilon. 18 Iwe, ra angeala ekewe nape, söföl, fich, sepi fän iten apach mi pwokus me sokopaten sepi seni piras ekewe souasor ra aea le angang lon ewe imwenfel. 19 Iwe, ewe meilapen chon tümwünü ewe king a uweela meinisin mine a för seni kolt me silifer: ekewe kükün sepi, ekewe sepi fän iten mwolien ekkei, ekewe sepi me nape, ekewe lenien etittin, ekewe sepi fän iten apach mi pwokus me ekewe sepi fän iten asoren ün. 20 Nge pirasen ekewe ruwofoch ür, ewe sepien koluk mi watte, ekewe engol me ruoman uluulun ätemwänin kow mi nom fän ewe sepi me ekewe kürüma Salomon a föriir fän iten imwen ewe Samol mi Lapalap a kon senukula chour. 21 Iwe, ükükün tekian efoch me efoch kewe ür rüe me fisu fiit, nge ükükün öün engol me walu fiit. Iwe, malülün ükükün ülüngat inis, nge lon a pwang. 22 Nge mi pwal wor letonan seni piras ükükün tekian fisu esop fiit. A pwal wor sein mi nut me uluulun apel won pwelin ünükün ewe leton, nge meinisin seni piras. Iwe, ewe aruofochun ür a wewe ngeni ewe aefochun fiti ekewe uluulun apel. 23 Iwe, mi wor tiue me wonoföü uluulun apel mi pwä, nge iteiten uluulun apel meinisin ükükün ipükü, ra nom won pwelin ewe sein mi nut. ✡1.King 7.15-47 24 Iwe, Nepusaratan ewe meilapen chon tümwünü ewe king a angei Seraia ewe souasor mi lap me Sefania ewe aruomanün souasor, pwal ekewe ülüman chon mamasa ewe asamalap. 25 A pwal angei seni lon ewe telinimw ewe meilap mi nemeni ekewe sounfiu, füman nöün ewe king chon öüröür mi chüen nom lon ewe telinimw, ewe seketerin ewe meilapen sounfiu mi wisen makei iteiten ekewe aramas me wone mwän mi iteföüla ra nom lon ewe telinimw. 26 Iwe, Nepusaratan a angeer o uweerela ren ewe kingen Papilon mi nom Ripla. 27 Iwe, ewe kingen Papilon a awateer o nirela me lon Ripla lon ewe fanü Hamat. Iei usun chon Juta ra oola seni fanüer. 28 Iwe, iei iteiten ekewe aramas Nepukatnesar a uweerela: Lon afisuen ierin mwün Nepukatnesar a uweela ükükün ülüngeröü rüe me ülüman chon Juta. 29 Nge lon ewe engol me waluen ierin mwün, a uweela seni Jerusalem ükükün walüpükü ilik me ruoman aramas. 30 Iwe, lon rüe me ülüngatin ierin mwün Nepukatnesar, Nepusaratan a uweela ükükün füpükü faik me limman chon Juta. Iwe, iteiter meinisin rüanüngeröü wonopükü.

31 Iwe, lon ewe ier, lupwen Ewil-merotak ewe kingen Papilon a popuetä le nemeni Papilon, a kirikiröch ngeni Jehoiachin ewe kingen Juta o atowu seni imwen fötek. Ei a fis lon rüe me limuen ränin ewe engol me ruuen maram lon ilik me fisuen ierin än Jehoiachin oola. 32 Iwe, Ewil-merotak a kirikiröch ngeni o seikätä asen ekewe king mi pwal oola o nom ren lon Papilon. 33 Iwe, Jehoiachin a pwilitawu üfan üföüfen fötek o üföüf och sokun üf. Nge lon ränin manauan meinisin a chök mongö seni än ewe king chepel. 34 Jehoiachin a pwal angei alilisin seni ewe king pwe atufichin an osupwang iteiten rän lon unusen manauan tori an mäla.