1 Iwe, mürin ei pworaus Jesus a feila epek ewe nomun Kalilea. (Ei noom a pwal iteni nomun Tiperias.) 2 Chomong aramas ra tapwela mürin, pun ra küna ekewe manaman Jesus a föriir lupwen a apöchökülätä ekewe chon samau. 3 Mürin Jesus me nöün kewe chon kaiö ra feitä won eu chuk o mottiu ikenan. 4 Ei otun a arap fansoun ewe chulapen Pasofer än chon Juta. 5 Iwe, Jesus a nenefetal o a küna pwe chomong aramas ra feito ren, iei mine a aisini Filip, “Ia sipwe tongeni kamö mongö me ie, pwe epwe naf ach sipwe amongöni ekei aramas meinisin?” 6 Jesus a eäni ei kapas ais an epwe sotuni Filip, pun i a fen silei met epwe föri. 7 Filip a pölüeni, “Ruopükü föün moni silifer esap naf ach sipwe kamö pilawa, pwe ina epwe chök ekis met eman me eman ekei aramas epwe angei.” 8 Pwal eman nöün chon kaiö itan Andru, pwiin Simon Petrus, a üra, 9 “A wor eman ät ikei mi wor ren limeföü pilawa seni föün parli me ruoman ik. Nge ifa usun, epwe naf ngeni ekei aramas meinisin?” 10 Jesus a üra, “Oupwe üreni ekewe aramas pwe repwe mottiu.” A wor chomong fetil lon ewe leni, iei mine ekewe aramas meinisin ra mottiu. A wor ina epwe ükükün limungeröü mwän. 11 Mürin Jesus a angei ekewe pilawa, a iotekin kilisou ngeni Kot wor o a ineti ngeni ekewe aramas mi mot ikenan. Pwal ina chök usun mine a föri ngeni ekewe ik. Ir meinisin ra angei ükükün mine ra mochen. 12 Iwe, lupwen ekewe aramas meinisin ra mötüla, Jesus a üreni nöün kewe chon kaiö, “Oupwe ionifengeni lusun ekewe mongö, pwe esap wor och epwe solapala.” 13 Iei mine ra ionifengeni meinisin o amasoua engol me ruu chüük ren lusun ewe mongö seni ekewe limeföü pilawa seni föün parli ekewe aramas ra mongö. 14 Iwe, lupwen ekewe aramas ra küna ewe manaman Jesus a föri, ra apasa, “Enlet, iei i ewe Soufos epwe feito won fanüfan.” 15 Jesus a silei pwe ra ekiekin feito o seikätä fän pöchökül pwe epwe ar king, iei mine a sü seniir o liwinsefälitä won ewe chuk.

16 Iwe, lupwen a tori lekuniol, nöün Jesus kewe chon kaiö ra feitiu ren ewe noom, 17 ra tötä won efoch wa o seresila epek ewe noom pwe repwe sai ngeni Kapernaum. Iwe, a pwinila, nge Jesus esamwo feito rer. 18 Nge mürin eu asepwäl mi pöchökül a enito, pwe nonoon ewe noom a wattela. 19 Lupwen ekewe chon kaiö ra fen fötülei waar we ina epwe ükükün ülüngat ika rüanü mail, ra küna Jesus a fetalela won ewe matau o fetaleto arap ngeni waar we. Iwe, ra fokun rükö. 20 Nge Jesus a üreniir, “Ousap niuokus! Ngang ei!” 21 Iwe, ra pwapwa pwe ra uwei Jesus won ewe wa, nge lon ewe chök otun ewe wa a tori ewe leni ia ra mochen sai ngeni ie.

22 Sorotän ewe rän ewe mwichen aramas mi nometiu epek ewe noom ra küna pwe a chök wor efoch wa a nom ikenan. Ra silei pwe Jesus esap tötä won ewe wa fiti nöün kewe chon kaiö, pwe ir chök ra sai. 23 Nge mi wor ekoch wa seni Tiperias ra il arap ngeni ewe leni ia ra mongö ewe pilawa ie mürin än ewe Samol iotekin kilisou won. 24 Iwe, lupwen ewe mwichen aramas ra küna pwe Jesus me nöün kewe chon kaiö resap nom ikenan, ra tötä won ekewe wa o saila Kapernaum, pwe repwe kütta Jesus.

25 Iwe, lupwen ekewe aramas ra küna Jesus me epek ewe noom, ra aisini, “Sense, inet ka feito ikei?” 26 Jesus a pölüeniir, “Enlet, üpwe wesewesen ürenikemi: Oua küttaei pokiten oua mongö ewe pilawa tori oua mötüla, nge ousap küttaei pokiten oua weweiti ai kewe manaman. 27 Ousap angang fän iten mongö mi tongeni ngauala, nge oupwe angang fän iten mongö mi nonomola tori manau esemüch. Iei ewe mongö Nöün Aramas epwe ngenikemi, pun Kot ewe Sam a fen anomu won asisilen an tipeeu ngeni.” 28 Mürin ra aisini Jesus, “Met äm aipwe föri, pwe aipwe tongeni apwönüetä met Kot a mochen aipwe föri?” 29 Jesus a pölüeniir, “Kot a mochen pwe oupwe lükü ätewe i a tinato.” 30 Iei mine ra aisini, “Met sokun manaman kopwe föri pwe äm aipwe küna o lükuk? Met sokun föför kopwe föri? 31 Äm kewe lewo ra mongö ewe mana lon ewe fanüapö, usun a mak lon ekewe Toropwe mi Pin, ‘A ngeniir ewe mongö seni läng pwe repwe mongö.’ ” ✡Eks 16.4,15; Kölf 78.24 32 Mürin Jesus a üreniir, “Enlet, üpwe wesewesen ürenikemi: Esap Moses ewe mi ngenikemi ewe mongö seni läng, nge Semei i ewe mi ngenikemi ewe enletin mongö seni läng. 33 Pun ewe mongö Kot a ngenikemi ina i ätewe a feitiu seni läng o a fang manau ngeni chon fanüfan.” 34 Iwe, ra üreni, “Äm samol, kopwe ngenikem ei mongö fansoun meinisin.” 35 Mürin Jesus a üreniir, “Ngang ewe mongön manau. Iö a feito rei esap fokun chüen echik, nge iö a lüküei esap fokun chüen kaka. 36 Nge ngang üa ürenikemi pwe oua fen künaei, nge ousap mochen lüküei. 37 Chokewe meinisin Semei a ngeniei, repwe feito rei. Nge iö a feito rei, üsap fokun asüela. 38 Pun üa feitiu seni läng pwe üpwe föri letipen ewe mi tiniei, nge sap püsin letipei. 39 Iwe, iei letipen ewe mi tiniei, pwe esap pöüt seniei eman lein chokewe i a ngeniei, nge üpwe amanaueer lon ewe ränin sopolan. 40 Pun iei letipen Semei, pwe meinisin mi nenengeni ewe Nau o lükü i repwe eäni manau esemüch. Ngang üpwe amanaueer lon ewe ränin sopolan.”

41 Pokiten ekei kapas ekewe chon Juta ra popuetä le ngününgünü Jesus, pun a apasa, “Ngang ewe mongön manau mi feitiu seni läng.” 42 Iwe, ra apasa, “Ifa usun, sap ätei Jesus nöün Josef we mwän? Sia silei saman me inan. Pwota a tongeni apasa pwe i a feitiu seni läng?” 43 Jesus a pölüeni, “Oupwe ükütiu le ngününgün lefilemi! 44 Esap wor eman a tongeni feito rei are ewe Sam mi tinieito esap panato rei. Iwe, üpwe amanaua lon ewe ränin sopolan. 45 A fen mak lon puken ekewe soufos, ‘Aramas meinisin repwe kaiö me ren Kot.’ Chokewe meinisin mi aüseling ngeni alon ewe Sam o kaiö seni repwe feito rei. ✡Ais 54.13 46 Üsap apasa pwe a wor eman a fen küna ewe Sam. Ätewe mi feito seni Kot, i chök ewe eman a küna ewe Sam. 47 Enlet, üpwe wesewesen ürenikemi: Iö a lüküei a eäni manau esemüch. 48 Ngang ewe mongön manau. 49 Ämi kewe lewo ra mongö ewe mana lon ewe fanüapö, nge ra mäla. 50 Nge iei ewe mongö mi feitiu seni läng, are eman a mongö seni esap mäla. 51 Ngang ewe mongön manau mi feitiu seni läng. Are eman a mongö ei mongö epwe manau tori feilfeilachök. Iwe, ei mongö iei fitukei ngang üpwe fangala, pwe chon fanüfan repwe manau ren.”

52 Mürin ekewe chon Juta ra popuetä le aninifengen lefiler. Ra ais, “Epwe ifa usun än ei mwän epwe amongöü ngenikich fitukan?” 53 Iei mine Jesus a üreniir, “Enlet, üpwe wesewesen ürenikemi: Are ousap mongö fituken Nöün Aramas o ünümi chaan, esap wor manau lomi. 54 Iö a mongö fitukei o ünümi chai a eäni manau esemüch, nge ngang üpwe amanauasefäli lon ewe ränin sopolan. 55 Pun fitukei iei wesewesen ewe mongö, nge chai iei wesewesen ewe minen ün. 56 Iö a mongö fitukei o ünümi chai a nonom loi, nge ngang üa nonom lon. 57 Ewe Sam mi manau a tinieito, o pokiten ewe Sam ngang üa pwal manau. Iei usun iö mi mongö fitukei epwe manau pokiten ngang. 58 Iei ewe mongö mi feitiu seni läng. Esap wewe ngeni ewe mongö ämi kewe lewo ra mongö, nge mürin ra mäla. Ätewe mi mongö ei mongö epwe manau tori feilfeilachök.” 59 Jesus a apasa ekei kapas lupwen a afalafal lon ewe imwen felikis lon Kapernaum.

60 Iwe, chomong lein nöün kewe chon kaiö ra rongorong ekei kapas o ra üra, “Ei afalafal a kon pöchökül. Iö a tongeni aüselinga?” 61 Jesus esap rong seni eman mine ra kakapas won, nge a püsin silei pwe ra ngününgün usun an kewe kapas. Iei mine a üreniir, “Ifa usun, oua mochen likitala ämi lükülük ren ekei kapas? 62 Epwe ifa usun are oupwe küna Nöün Aramas lon an liwinsefälitä ngeni ewe leni ia a nom ie me mwan? 63 Ngünün Kot a afisätä manau, nge pöchökülen aramas esap fokun wor aüchean. Ekewe kapas üa fen ürenikemi ra eäni Ngün me manau. 64 Nge ekoch leimi resap lükü.” Pun Jesus a fen silei chök seni lepoputän iö kana resap lükü i, pwal ätewe epwe afangamä i. 65 Iwe, Jesus a sopwela le apasa, “Iei mine üpwe ürenikemi, pwe esap wor eman a tongeni feito rei, are ewe Sam esap atufichi.”

66 Iwe, seni ei fansoun chomong me lein nöün Jesus kewe chon kaiö ra kul seni o resap chüen mochen tapwela mürin. 67 Iei mine Jesus a aisini ekewe engol me ruoman chon kaiö, “Ifa usun, ämi ousap pwal mochen feila?” 68 Simon Petrus a üreni, “Äm Samol, iö aipwe feila ren? En ka eäni kapasen manau esemüch. 69 Äm aia lükü o silei pwe en Ewe mi Pin ka feito seni Kot.” ✡Mat 16.16; Mark 8.29; Luk 9.20 70 Iwe, Jesus a pölüeni, “Ifa usun, üsap filikemiitä engol me ruoman, nge fen eman leimi eman Tefil?” 71 Jesus a kapas usun Jutas nöün Simon Iskariot, pun i eman seni ekewe engol me ruoman epwe afangamä i.