1 Iwe, lupwen Jesus a fetalela, a küna eman mwän mi upuchun. 2 Nöün kewe chon kaiö ra aisini, “Sense, tipisin iö pwe ei mwän a upuchun? Püsin tipisin ika tipisin saman me inan?” 3 Jesus a pölüeniir, “Esap tipisin ei mwän, esap pwal tipisin saman me inan, nge ei a fis pwe manamanen Kot epwe pwä lon manauan. 4 Lupwen a chüen rän, üpwe fokun föri angangen ewe mi tinieito. Pwin epwe war lupwen esap wor eman a tongeni angang lon. 5 Lupwen üa nom won fanüfan, ngang saramen fanüfan.” ✡Mat 5.14; Joh 8.12 6 Mürin än Jesus apasa ei, a atufetiu lepwül, a ölölü ewe pwül ren atufan o tofätä ewe pwakak won mesen ewe mwän. 7 Iwe, a üreni, “Kopwe feila ores lon ewe koluk Siloam.” (Wewen Siloam ‘tinala’) Iei mine ewe mwän a feila o oresi mesan, iwe, a liwinto o küna mwan. 8 Mürin chon arun me chokewe mi küküna ei mwän me mwan lon an tütüngor lifangan, ra ais, “Ifa usun, sap iei i ewe mwän mi momot o tütüngor lifangan?” 9 Ekoch ra apasa, “Ewer, iei i,” nge pwal ekoch ra apasa, “Apwi, sap i, a chök wewe ngeni.” Iei mine ewe mwän a püsin üra, “Ngang ätewe.” 10 Iwe, ra aisini, “Met a fis pwe ka tongeni küna mwomw?” 11 A pölüeniir, “Ewe mwän itan Jesus a ölölü och pwül, iwe, a tofätä ewe pwakak won mesei o üreniei pwe üpwe feila Siloam o oresi mesei ie. Iei mine üa feila, nge lon ewe chök otun üa ores, üa küna mwei.” 12 Iwe, ra aisini, “Ia a nom ie ätewe?” Ewe mwän a pölüeni, “Üse silei.”

13 Mürin ra emwenala ewe mi mesechun me mwan ren ekewe Farisi. 14 Lon ewe rän Jesus a ölölü och pwül o tofätä ewe pwakak won mesen ewe mwän pwe a nenela, iei eu ränin sapat. 15 Iwe, ekewe Farisi ra aisinisefäli ewe mwän usun an küna mwan. A üreniir, “A tofätä och pwakak won mesei, iwe, üa oresiei, nge iei üa tongeni küna mwei.” 16 Ekoch lein ekewe Farisi ra apasa, “Ewe mwän mi föri ei esap tongeni feito seni Kot, pun esap aleasochisi ewe allükün sapat.” Nge pwal ekoch ra apasa, “Epwe ifa usun än eman chon tipis epwe tongeni föri ei sokun manaman?” A wor kinikinfesen lefiler. 17 Iei mine ekewe Farisi ra aisinisefäli ewe mwän, “Met en ka apasa usun i, pun i a aneneloi mesom?” Iwe, ewe mwän a pölüeni, “I eman soufos.”

18 Nge ekewe nöüwisen chon Juta resap mochen lükü, pwe ewe mwän a chun me mwan o künasefäli, tori ra titi saman me inan. 19 Iwe, ra aisiniir, “Nöümi ei mwän oua apasa pwe a upuchun? Ifa usun an fis pwe a tongeni küna mwan iei?” 20 Saman me inan ra pölüeni, “Äm aia silei pwe ätena nöüm, aia pwal silei pwe a upuchun. 21 Nge äm aisap silei ifa usun an a tongeni küna mwan, aisap pwal silei ika iö a aneneloi mesan. Oupwe püsin aisini, a tongeni püsin pölüeni, pun a watte ierin.” 22 Saman me inan ra apasa ei ititin kapas, pun ra niuokusiti ekewe nöüwisen chon Juta. Pun ekewe nöüwis ra fen tipeeufengen, pwe iö mi pwärätä pwe Jesus ewe Kraist epwe katowu seni ar we mwich lon ewe imwen felikis. 23 Iei popun saman me inan ra apasa, “A watte ierin, oupwe püsin aisini.”

24 Iwe, ra kökkörato ewe mwän mi mesechun me mwan fän aruuan o üreni, “Kopwe pwon fän mesen Kot pwe kopwe pwärätä mine a let! Äm aia silei pwe ei mwän mi anenelok i eman chon tipis.” 25 Ewe mwän a pölüeni, “Üsap silei ika i eman chon tipis ika esap. Nge eu chök üa silei, pwe üa mesechun, nge iei üa küna mwei.” 26 Mürin ra aisini, “Met a föri ngonuk? Ifa usun an aneneloi mesom?” 27 Iwe, a pölüeniir, “Üa fen ürenikemi, nge ämi ousap aüselinga. Pwota oua mochen rongorongsefäl? Ifa usun, ämi oua pwal mochen nöün chon kaiö?” 28 Iwe, ra eäni kapas turunufas ngeni o üreni, “En nöün enan mwän chon kaiö, nge äm nöün Moses chon kaiö. 29 Äm aia silei pwe Kot a kapas ngeni Moses me lom, nge enan mwän äm aise fen mwo nge silei ia a feito me ie.” 30 Ewe mwän a pölüeniir, “Mwa met me amairün ei mettoch! Ämi ousap silei ia a feito me ie, nge i a aneneloi mesei. 31 Kich sia silei pwe Kot esap aüseling ngeni än ekewe chon tipis tüngor, nge a aüseling ngeni eman mi meniniti i o föri letipan. 32 Seni lepoputän fanüfan, esap wor eman a aneneloi mesen eman aramas mi upuchun. 33 Ika pwe ei mwän mi aneneloi mesei esap feito seni Kot, esap tongeni föri och mettoch.” 34 Iwe, ra üreni, “En ka uputiu lon tipis o märitä lon tipis, pwota ka ekiekin afalafalakem?” Iwe, ra atowu ewe mwän seni ewe imwen felikis.

35 Iwe, Jesus a rong pwe ra atowu ewe mwän seni ar we imwen felikis. Lupwen a küna i, a aisini, “Ifa usun, ka lükü ewe Nöün Kot?” 36 Ewe mwän a pölüeni, “Ai samol, iö ätewe, kopwe aiti ngeniei, pwe ngang üpwe tongeni lükü i.” 37 Jesus a üreni, “Ka fen küna i, ina i ätewe mi kapas ngonuk.” 38 Mürin ewe mwän a apasa, “Ai Samol, üa lükü!” Iwe, a fotopwäsuketiu mwan o fel ngeni. 39 Iwe, Jesus a üreni, “Üa feito lon fanüfan pwe üpwe eäni apwüng, pwe chokewe mi chun repwe küna mwer, nge chokewe mi küna mwer repwe chun.” 40 Iwe, ekoch Farisi mi nom ren ra rongorong met a apasa o ra aisini, “Met, äm aia pwal chun?” 41 Jesus a pölüeniir, “Are ämi oupwe chun, esap wor ämi tipis. Nge iei ämi oua apasa pwe oua tongeni küna mwemi, iei popun ämi tipis a chök nonom womi.”