1 A wor eman mwän a samau itan Lasarus seni Petania. Petania ewe telinimw ia Maria me pwiin we Marta ra nom ie. ✡Luk 10.38-39 2 Ei fefin Maria fefinen Lasarus, ätewe mi samau. Iei i neminewe a epiti pechen Jesus ren löpwokus o talüpwasei ren meten möküran. ✡Joh 12.3 3 Iwe, ekewe ruoman pwipwi ra tinala pworaus ren Jesus, “Äm Samol, ätewe ka fokun echeni a samau.” 4 Lupwen Jesus a rong ei pworaus, a apasa, “Ei samau, esap sopolan mäla. Nge popun an fis ei samau, pwe Kot epwe küna ling ren, pwal Nöün Kot epwe küna ling ren.”

5 Iwe, Jesus a echeni Marta me pwiin we me Lasarus. 6 Nge lupwen a rongorong pwe Lasarus a samau, a chök nonometiu lon ewe leni ia a nom ie pwal lon ükükün ruu rän. 7 Mürin a üreni nöün kewe chon kaiö, “Ousipwe liwinsefäliti Jutea.” 8 Nge ekewe chon kaiö ra üreni, “Sense, pollon kewe chök ekewe aramas ikenan ra mochen mone ngonuk fau. Nge iei ka pwal mochen liwinsefäliti ikenan?” 9 Jesus a pölüeniir, “Ifa usun, esap wor engol me ruu awa lon eu rän? Eman aramas mi fetal lerän esap chepetek, pun a küna saramen ei fanüfan. 10 Nge eman mi fetal lepwin a chepetek, pun esap wor saram ren.”

11 Mürin än Jesus apasatä ekei kapas, a pwal üreniir, “Chiechiach we Lasarus a möürüla, nge ngang üpwe feila pwe üpwe föngünätä.” 12 Ekewe chon kaiö ra pölüeni, “Äm Samol, are a möürüla, iwe, epwe pöchökületä.” 13 Jesus a fen kapas usun än Lasarus mäla, nge ekewe chon kaiö ra ekieki pwe a chök kapas usun an möür. 14 Iei mine Jesus a afata ngeniir, “Lasarus a mäla, 15 nge fänäsengesimi üa pwapwa pwe üsap nom ren, pwe ämi oupwe kaiö ngeni ämi oupwe lüküei. Ousipwe feila ren.” 16 Tomas, a pwal iteni Lippwe, a üreni chiechian kewe chon kaiö, “Ousipwe feila meinisin fiti ewe Sense, pwe sipwe eti i le mäla!”

17 Iwe, lupwen Jesus a tori ewe leni, a rongorong pwe Lasarus a fen nom lon peias lon ükükün rüanü rän. 18 Toauen lefilen Petania me Jerusalem ina epwe kis seni ruu mail, 19 nge chomong chon Juta ra feila ren Marta me Maria pwe repwe aururur ren mongeer we a mäla.

20 Lupwen Marta a rong pwe Jesus a feito, a feila lükün ewe sopw pwe epwe souni, nge Maria a chök nom leimw. 21 Iwe, Marta a üreni Jesus, “Ai Samol, are en kopwe nom ikei, mongeei we esap mäla. 22 Nge üa pwal silei pwe iei mwo nge Kot epwe ngonuk meinisin mine ka tüngor.” 23 Jesus a üreni neminewe, “Mongeom we epwe manausefälitä.” 24 Marta a pölüeni, “Ngang üa silei pwe epwe manausefälitä lon ewe ränin manausefäl lesopolan fanüfan.” 25 Iwe, Jesus a üreni, “Ngang ewe manausefäl me ewe manau. Iö a lüküei epwe manau inamwo are epwe fen mäla. 26 Nge iö a manau o lüküei esap fokun mäla feilfeilachök. Ifa usun, ka lükü ei?” 27 Marta a pölüeni, “Ewer, ai Samol, üa lükü pwe en ewe Kraist, Nöün Kot, ätewe Kot a pwon pwe epwe feito fanüfan.”

28 Mürin än Marta apasa ekei kapas, a liwinsefälila le imwan o köri Maria pwiin we o möngününgün ngeni, “Ewe Sense a war, nge a mochen churuk.” 29 Nge lupwen Maria a rongorong ekei kapas, a müttir ütä o feila ren Jesus. 30 Iwe, Jesus esamwo tolong lon ewe sopw, nge a chök nom lon ewe leni ia Marta a churi ie. 31 Ekewe aramas mi nom lon ewe imw ren Maria ar repwe aururu ra küna, pwe a müttir ütä o towu lükün. Iwe, ra tapwela mürin, pun ra ekieki pwe Maria a feila ren ewe peias pwe epwe kechü ikenan. 32 Maria a tori ewe leni ia Jesus a nom ie. Lon ewe chök otun a tori Jesus, a chapetiu arun pechen o üreni, “Ai Samol, are en kopwe nom ikei, mongeei we esap mäla.” 33 Iwe, Jesus a küna Maria pwe a kechü, pwal ekewe aramas mi tapwela mürin, letipan a fokun mwökütüküt o weires. 34 Iwe, a aisiniir, “Ia oua peiaseni Lasarus ie?” Ra pölüeni, “Äm Samol, kopwe feito o nenengeni.” 35 Iwe, Jesus a kechü. 36 Mürin ekewe aramas ra apasa, “Nengeni usun an tongei!” 37 Nge pwal ekoch ra apasa, “Esap ätei ätewe mi aneneloi mesen ewe mwän mi chun? Pwota esap tongeni amwöchü manauen Lasarus pwe esap mäla?”

38 Iwe, lupwen Jesus a feiliti ewe peias, a pwal mwökütükütsefäl letipan lon an weires. Ewe peias a nom lon eu achau, nge eföü fau mi watte a öpwönütiu me won. 39 Jesus a üra, “Oupwe ekiela ewe fau seni won ewe peias!” Nge Marta, fefinen ewe mi mäla a üreni, “Ai Samol, ei otun ewe somä epwe le fen pomach, pun a fen nom lon peias lon ükükün rüanü rän.” 40 Mürin Jesus a pölüeni, “Ifa usun, üsap ürenuk pwe are kopwe lükü kopwe küna lingen Kot?” 41 Iei mine ra ekiela ewe fau seni won ewe peias. Iwe, Jesus a netä läng o apasa, “Semei, üa kilisou ngonuk pwe ka aüselingaei. 42 Ngang üa silei pwe ka aüselingaei fansoun meinisin. Nge iei üa apasa ei fänäsengesin ekewe aramas mi ü ikei, pwe repwe lükü pwe en ka tinieito.” 43 Mürin an apasa ekei kapas, a kökkö fän mwelian mi leüömong, “Lasarus, kopwe towu!” 44 Iwe, Lasarus a towu, nge pöün me pechen ra finifin ngeni mangaku, won mesan a pwal finifin ngeni echö mangaku. Iwe, Jesus a üreniir, “Oupwe apichala ekewe finifin pwe epwe tongeni fetal.”

45 Iwe, chomong aramas mi feito pwe repwe churi Maria, ra küna mine Jesus a föri, iwe, ra lükü i. 46 Nge ekoch me leir ra feila ren ekewe Farisi o üreniir mine Jesus a föri. 47 Iei mine ekewe souasor mi lap me ekewe Farisi ra chufengen me ewe mwichen souapwüng o ra üreniir, “Met sipwe föri. Nengeni ekei manaman meinisin ei mwän a föri! 48 Are sipwe mwüt ngeni an epwe sopwela lon ei sokun lapalap, aramas meinisin repwe lükü i. Mürin repwe feito o atai ach imwenfel o angeala aramasach.” 49 Iwe, eman me leir itan Kaifas, i ewe Souasor mi Lap lon ena ier, a apasa, “Ämi ousap silei och. 50 Ousap mefi pwe a mürina än eman aramas epwe mäla fänäsengesin ekewe aramas meinisin, lap seni unusen aramasen fanüach repwe rosola.” 51 Nge Kaifas esap apasa ei ititin kapas won püsin mefian, nge pokiten i ewe Souasor mi Lap lon ena ier, a osuni pwe Jesus epwe mäla fän iten chon Juta meinisin. 52 Nge sap fän iter chök, pwe pwal fän iten ekewe aramasen Kot mi toropasfeil ar repwe chufengen lon eu chök mwich. 53 Seni ena ränin ekewe nöüwisen chon Juta ra rawei Jesus pwe repwe niela. 54 Iei mine Jesus esap chüen saifetal lon Jutea le pwäpwäla lein ekewe chon Juta, nge a feila ngeni eu leni arap ngeni ewe fanüapö lon eu telinimw itan Efraim. A nonom ikenan fiti nöün kewe chon kaiö.

55 Iwe, lupwen a arap fansoun än ekewe chon Juta we chulapen Pasofer, chomong aramas ra feitä Jerusalem seni ekewe fanü pwe repwe föri ewe angangen limelim me mwen ewe chulap. 56 Iwe, ra küttafetalei Jesus, nge lupwen ar chufengen lon ewe imwenfel ra aisfengen lefiler, “Met oua ekieki? Epwe feito ngeni ach ei chulap, are esap feito?” 57 Ekewe souasor mi lap me ekewe Farisi ra atowu eu allük ngeni aramas, pwe are eman epwe silei ia Jesus a nom ie, epwe asile ngeniir, pwe repwe turufi o fötekini.