16
“Ngang üa fen ürenikemi ekei kapas, pwe ämi ousap tok seni ämi lükülük. Repwe atowukemi seni ar mwich lon ar kewe imwen felikis. Nge epwe war ewe fansoun lupwen chokewe mi nikemi repwe ekieki, pwe ar föför eu angang ngeni Kot. Aramas repwe föri ekei sokun föför ngenikemi, pun resap mwo silei Semei, resap pwal sileei. Nge üa fen ürenikemi ekei kapas, pwe lupwen epwe war ewe fansoun ar repwe föri ngenikemi ekei mettoch, ämi oupwe chemeni mine üa fen ürenikemi. Üsap ürenikemi ekei mettoch seni lepoputän, pun ngang üa nom remi.
Än ewe Ngünmifel angang
16.5-15
“Iwe, iei üpwe feila ren ewe mi tiniei, nge esap wor eman leimi a aisiniei ia üpwe feila ie. Nge pokiten üa ürenikemi ekei kapas, oua uren lolilen. Nge üpwe ürenikemi mine a let: Oupwe feiöch ren ai üpwe feila. Pun are ngang üsap feila, ewe Soualilis esap feito remi. Nge are üpwe feila, üpwe tinato remi ewe Soualilis. Iwe, lupwen epwe war, epwe amefi ngeni chon fanüfan usun ar tipis, usun pwüng pwal usun än Kot apwüng. Epwe amefi ngeniir usun ar tipis, pun resap lüküei. 10 Epwe amefi ngeniir usun pwüng, pun ngang üpwe feila ren Semei o ämi ousap chüen künaei. 11 Epwe pwal amefi ngeniir usun apwüng, pun ewe samolun ei fanüfan a fen küna apwüng.
12 Mi chüen wor chomong mettoch üpwe ürenikemi, nge epwe fokun weires ngenikemi iei. 13 Nge lupwen epwe war ewe Ngünmifel mi pwärätä mine a let usun Kot, i epwe emwenikemiilong lon ewe let mi unusöch. Esap kapas fän püsin itan, nge epwe kapas usun met a rongorong o ürenikemi usun ekewe mettoch repwe feito. 14 Epwe alingaei, pun epwe angei seni mine ai o aronga ngenikemi. 15 Mettoch meinisin mine än Semei, iei pwal ai. Iei popun üpwe ürenikemi pwe ewe Ngünmifel epwe angei seni mine ai o aronga ngenikemi.
Lolilen me pwapwa
16.16-24
16 “Lon ekis chök fansoun ämi ousap chüen künaei, nge pwal ekis chök fansoun mürin oupwe künaei.” 17 Iwe, ekoch me lein nöün kewe chon kaiö ra aisfengen lefiler, “Met wewen ekei kapas a ürenikich, ‘Lon ekis chök fansoun ämi ousap chüen künaei, nge pwal ekis chök fansoun mürin oupwe künaei?’ A pwal apasa, ‘Ei epwe fis, pun üa feila ren Semei.’ 18 Met chök wewen ‘ekis chök fansoun?’ Kich sisap silei mine a kapas usun!” 19 Jesus a silei pwe ra mochen kapas ais ngeni usun ei mettoch, iei mine a üreniir, “Ifa usun, oua aisfengen lefilemi met wewen ai apasa, ‘Ekis chök fansoun ämi ousap chüen künaei, nge pwal ekis chök fansoun mürin oupwe künaei’? 20 Enlet, üpwe wesewesen ürenikemi: Ämi oupwe kechü o ngüngüres, nge fanüfan epwe fokun pwapwa. Ämi oupwe lolilen, nge ämi lolilen epwe wiliti pwapwa. 21 Lupwen eman fefin a arap ngeni fansoun an epwe nöünöü, a metek. Nge lupwen a wes me nöünätiu nöün we, a manlükala an we metek mi weires, pun a pwapwa pwe eman mönükol a uputiu won fanüfan. 22 Ina usun pwal ämi: Iei oua lolilen, nge üpwe pwal künasefälikemi, mürin lelukemi epwe ur ren pwapwa, nge ei pwapwa esap wor eman epwe tongeni angei senikemi. 23 Lon ena rän ämi ousap chüen aisiniei och. Enlet, üpwe wesewesen ürenikemi: Semei epwe ngenikemi meinisin mine oua tüngor fän itei. 24 Tori iei ousap tüngor mwo och fän itei. Oupwe tütüngor, iwe, oupwe angei pwe ämi pwapwa epwe unusöch.
Jesus a akufu fanüfan
16.25-33
25 “Iwe, üa fen kapas ngenikemi usun ekei mettoch lon kapas monomon. Nge epwe war ewe fansoun lupwen üsap chüen kapas ngenikemi lon kapas monomon, nge üpwe kapas ngenikemi usun Semei lon kapas mi fat. 26 Lupwen epwe tori ena rän, ämi oupwe tüngor ngeni Semei fän itei. Üsap apasa, pwe ngang üpwe tüngor och fän itemi, 27 pun Semei a püsin echenikemi. A echenikemi, pun ämi oua echeniei o lükü pwe üa feito seni Kot. 28 Üa feito seni Semei o feitiu fanüfan. Nge iei üpwe towu seni fanüfan o liwinsefälila ren Semei.”
29 Mürin nöün kewe chon kaiö ra üreni, “Iei a fat om kapas ngenikem, nge kosap chüen aea kapas monomon. 30 Iei äm aia silei, pwe en ka silei mettoch meinisin. Kosap osun än eman epwe kapas ais ngonuk, iei popun äm aia lükü, pwe en ka feito seni Kot.” 31 Jesus a üreniir, “Oua wesewesen lüküei? 32 Nengeni, epwe war ewe fansoun, nge a fen tori, lupwen ämi meinisin oupwe toropasfeil lon en me lenian o ngang üpwe chök emanüla. Nge ngang üsap wesewesen emanüla, pun Semei a nom rei fansoun meinisin. 33 Ngang üa fen ürenikemi usun ekei mettoch, pwe oupwe eäni kinamwe loi. Lon fanüfan ämi oupwe riaföü, nge oupwe apilükülük, pun ngang üa akufu fanüfan.”