1 Mürin ei pworaus, Jesus a pwal pwä ngeni nöün kewe chon kaiö arun ewe nomun Tiperias. Iei usun mine a fis: 2 Simon Petrus, Tomas a pwal iteni Lippwe, Nataniel seni Kana lon Kalilea, nöün Sepeti kewe ruoman mwän pwal ruoman nöün Jesus kewe chon kaiö ra chufengen. 3 Iwe, Simon Petrus a üreni chiechian kewe, “Ngang üpwe feila attau.” Ra üreni, “Äm aipwe etuk.” Iei mine ra feila o tötä won efoch wa. Nge lon unusen ewe pwin resap liapeni eman. ✡Luk 5.5

4 Iwe, lupwen akkar a tötä, Jesus a ütä lepi, nge ekewe chon kaiö resap silleni pwe i Jesus. 5 Mürin Jesus a kökköla rer, “Chiechiei kanan, ifa usun, ousap liap?” Ra pölüeni, “Apw.” 6 Jesus a üreniir, “Oupwe aturätiu nöümi we chew lepelifichin wami na, iwe, oupwe liap.” Iei mine ra aturätiu nöür we chew, nge resap chüen tongeni atekinatä won waar we, pun a chomong ik ra tup lon. ✡Luk 5.6 7 Mürin ewe chon kaiö Jesus a echeni a üreni Petrus, “Inan i ach Samol.” Lupwen Simon Petrus a rong pwe iwe i ar we Samol, a üföüfolong üfan sekit (pun a fen pwilitawu üfan we lupwen a attau) o aturatiu lon ewe koluk. 8 Nge chiechian kewe chon kaiö ra fötül ngeni lepi o nukielong ewe chew mi ur ren ik. Resap toau seni wilifanü, pwe ina epwe ükükün ipükü iach chök. 9 Lupwen ra tiwelong wilifanü, ra küna eu ekkei mi kü, a wor ik won, pwal ekoch pilawa. 10 Jesus a üreniir, “Oupwe uwato ekoch liapemi kewe ik.” 11 Simon Petrus a tötä won ewe wa, a atekinalong ewe chew mi ur ren ik mi watte o a ürätä lepi. Ükükün liaper ipükü lime me ülüman. Iei mwo ükükün chomongun ekewe ik, nge ewe chew esap kam. 12 Iwe, Jesus a üreniir, “Ou etto, oupwe le mongön lesosor.” Esap wor eman me lein ekewe chon kaiö a tongeni ais, “En iö?” pun ra silei pwe i ewe Samol. 13 Mürin Jesus a kaneto, a angei ewe pilawa o ineti ngeniir, pwal ina chök usun mine a föri ngeni ekewe ik. 14 Iei aülüngatin fansoun än Jesus pwä ngeni ekewe chon kaiö mürin an manausefäl seni mäla.

15 Wesin ar mongön lesosor, Jesus a üreni Simon Petrus, “Simon, nöün Sona, ka echeniei lap seni ätekei?” Petrus a pölüeni, “Ewer, ai Samol, en ka silei pwe üa echenuk.” Jesus a üreni, “Kopwe amongöni nei kewe apanen sip.” 16 Jesus a aisini fän aruuan, “Simon, nöün Sona, ka echeniei?” Petrus a pölüeni, “Ewer, ai Samol, en ka silei pwe üa echenuk.” Jesus a üreni, “Kopwe tümwünü nei kewe sip.” 17 Jesus a aisini fän aülüngatin, “Simon, nöün Sona, ka echeniei?” Petrus a letipeta, pun Jesus a aisini fän aülüngatin, “Ka echeniei?” Iei mine a üreni, “Ai Samol, en ka silei mettoch meinisin, ka silei pwe ngang üa echenuk.” Jesus a üreni, “Kopwe amongöü nei kewe sip. 18 Enlet, üpwe wesewesen ürenuk: Lupwen om alüal ka soun ri lukalapom o feila ia ka mochen feila ie. Nge lupwen kopwe chinlap, kopwe aitiela poumw, nge eman epwe ri lukalapom o emwenukela ia kosap mochen feila ie.” 19 Jesus a apasatä ekei kapas pwe epwe pwärätä met sokun mäla Petrus epwe mäli o alingala Kot ren. Mürin Jesus a üreni, “Kopwe tapweto müri.”

20 Iwe, Petrus a kul o küna ewe eman chon kaiö Jesus a echeni, pwe a tapwela mürir. Iei i ätewe mi roongeni Jesus lupwen ra mongön lekuniol o aisini, “Ai Samol, iö ewe epwe afangamä en?” 21 Lupwen Petrus a küna ätewe, a aisini Jesus, “Ai Samol, met epwe fis ngeni ätena?” 22 Jesus a pölüeni, “Are ngang üa mochen pwe epwe nonom tori ai üpwe liwinto, pwal met wewen ngonuk? Kopwe chök tapweto müri!” 23 Iei mine a chöfeil ewe kapas lein ekewe chon kaiö, pwe ei eman chon kaiö esap mäla. Nge Jesus esap apasa pwe ätewe esap mäla, pwe a chök apasa, “Are üa mochen an epwe nonom tori ai üpwe liwinto, met pwal wewen ngonuk?” 24 Iei i ewe chon kaiö mi pwärätä ekei mettoch, a pwal makkeetiu ekei mettoch. Iwe, kich sia silei pwe mine a pwärätä a let.

25 Iwe, Jesus a pwal föri chomong föför lükün ekei. Are iteiten eu me eu kewe föför repwe mak lon puk, üa ekieki pwe ekewe puk resap mwo nge fen kuch won unusen fanüfan.