2 Iwe, a apasa,

3 “Amwo ewe rän üa upulong lon epwe morola,

pwal ewe pwin, lupwen eman a apasa, ‘Eman ät a uputiu.’

4 Amwo ei rän epwe rochopwak,

amwo Kot mi nom läng esap ekieki usun,

nge saram esap tinetiu won.

5 Amwo toputop me rochokichin rochopwak epwe nemeni ei rän,

pwal kuchu repwe nonom won, nge rocholan akkar epwe pwal fis lon.

6 Amwo rochokichin rochopwak epwe turufi ei pwin.

Amwo esap alealong lein ekewe ränin ier,

esap pwal pachelong lein ekewe ränin maram.

7 Iwe, ei pwin epwe pön, esap wor eman epwe rong mweireiren pwapwa lon.

8 Ekewe sourong mi sile pöüt ngeni rän repwe pwal pöüt ngeni ei rän,

ir chokewe mi sip le apwätäi ewe Lefiatan *Lefiatan eman man mi eniweniw usun eman alikitor.

9 Amwo ekewe fün rän repwe rochopwak.

Ei pwin epwe ösüküsükü saram, nge esap war,

esap fokun küna saramen ünümweerän,

10 pun esap pineela letipen inei,

esap pwal aopala riaföü seniei.

11 Pwota üsap mäla le uputiuei?

Pwota üsap mäla, lupwen üa towu seni letipen inei?

12 Pwota inei a anomuei won afön,

nge pwota a aoupuei?

13 Are üpwe mäla lon na fansoun, üpwe kinamwe ikenai. Üpwe annut o asösö

14 fiti ekewe king me souöüröüren fanüfan,

ra aüetä imwer fän iter mi tala ikenai.

15 Üpwe pwal fiti ekewe samol

mi amasoua imwer ren kolt me silifer.

16 Pwota üsap wewe ngeni eman mönükol aramas ra ireela,

pun a uputiu nge esamwo tori fansoun,

ika usun ekewe mönükol resap küna saram.

17 Ikenan lon ewe peias ekewe aramasangau ra ükütiu le föri mine a ngau,

ikenan ekewe mi malülü ren ar angang ra asösö.

18 Ikenan ekewe chon fötek ra nomfengen fän kinamwe,

resap chüen rongorong mwelien chokewe mi nemeniir fän pöchökül.

19 Ekewe aramas kis me aramas tekia ra nom ikenan,

pwal ätewe aramas ra nöüni amanau a ngas seni an samol. ✡Jer 20.14-18

20 Pwota saram a tori ätekewe mi nom lon riaföü,

nge pwota manau a nom ren ätekewe mi letipengau?

21 Ra ösüküsükü mäla, nge esap war.

Ra kütta mäla lap seni ar kütta pisek aüchea mi monola. ✡Pwär 9.6

22 Ra fokun meseik o pwapwa lupwen ra tolong lon peias.

23 Pwota manau a tori eman aramas esap küna alan,

ätewe Kot a epeti pwelin ünükün?

24 Ai ngaselap ina enei mongö,

ai ngüngü a towu seniei usun koluk a puwu seni lenian.

25 Pun ekewe mettoch üa niuokusiti ra feito woi,

nge mine üa niueiti a toriei.

26 Esap wor ai kinamwe, esap pwal wor ai fansoun asösö,

nge üa chök nom lon riaföü.”