1 Hiop, kopwe kökkö iei. Ifa usun, epwe wor eman mi pälüenuk?

Iö me lein ekewe chon pin kopwe kul ngeni?

2 Ellet, song a niela eman chon umwes,

nge lolowo a niela eman chon wewemang.

3 Üa küna pwe eman chon umwes a fefeitä lon an feiöch,

nge mürin a müttir fis ngeni anümamau pwe an feiöch a tala.

4 Nöün kana resap nonom fän kinamwe.

Esap wor eman a peniir lon kapwüng.

5 Ekewe chon echik ra eni kinien ewe chon umwes ua,

ra fen mwo nge angei mine a mär lein ekewe irafölüföl,

nge ekewe chon kaka ra otumwala wöün.

6 Pun riaföü esap feito seni pwül moromor,

nge weires esap pwükütä seni pwül.

7 Nge eman aramas a püsin atolonga lon weires,

usun chök ngetengeten ekkei a püsin ngetetä.

8 Nge ika ngang en, üpwe kul ngeni Kot

o pwärätä ngeni ai weires.

9 I ewe Kot mi föri föför mi tekia esap wor aükükün,

pwal föför mi amwarar rese lea:

10 I a apüngätiu üt won fanüfan

o apuala koluk lon ekewe mälämäl.

11 I a atekiatä chokewe mi tekison

o ekietä ekewe chon letipeta ngeni pwapwa.

12 Nge a ataela än chokewe mi tipachemsolä ekiek,

pwe angangen pöür esap fisitä.

13 A liapeni ekewe chon tipachem lon püsin ar tipachemsolä,

nge än ekewe chon atuputup öüröür esap fis. ✡1.Kor 3.19

14 Ra tolong lon rochopwak lupwen fansoun lerän,

ra atapfeil leoloas usun chök fansoun lepwin.

15 Nge a amanaua ekewe chon wöüngau seni mään ketilas,

pwal ekewe chon mwelele seni ekewe chon ariaföüür.

16 Iei mine ekewe chon wöüngau ra apilükülüköch,

nge ekewe chon pwüngingau ra fanafanala.

17 A feiöch eman aramas Kot a apwüngü.

Iei mine kosap aücheangaua än Ewe mi Unusen Manaman amirit. ✡SalF 3.11-12; Ipr 12.5-6

18 Pun a akinasa eman, nge a pwal filitisefäli.

A awata eman, nge a pwal apöchöküla. ✡Os 6.1

19 Kot epwe angasok seni wonu weires,

nge lon fisu weires esap wor och feiengau epwe toruk.

20 Lupwen fansoun lengita i epwe amanauok seni mäla,

nge lupwen fansoun maun i epwe amanauok seni mään ketilas.

21 Kot epwe aopok seni kapasen itengau, nge kosap niuokus,

lupwen feiengau epwe war.

22 Kopwe takir ngeni feiengau me lengita,

nge kosap niuokusiti ekewe manmwachon fanüfan.

23 Repwe märöch fotom kewe irä lon om tanipi, pun esap wor föüföü lon,

nge ekewe manmwachon lemäl repwe kinamwe ngonuk.

24 Mürin kopwe nonnom lon imwomw imw mangaku fän kinamwe,

nge lupwen kopwe ouwasacha om lenien sip, kopwe küna pwe esap wor eman a pöüt senuk.

25 Kopwe silei pwe noum kana repwe chomong,

nge mwirimwirum kana repwe usun chök chomongun fetil won fanüfan.

26 Kopwe mäla o peias lupwen ka fokun chinlap,

kopwe usun chök eu pilükün wiich a nom lon ewe lenien wichiwich

umwun föün wiich lupwen fansoun kinikin.

27 Nengeni, aia küküttaöchü usun ekei lapalap o küna pwe ra pwüng.

Kopwe aüselinga ekei kapas pwe kopwe feiöch.”