15
Elifas a apwüngü Hiop
15.1-35
Mürin, Elifas ewe re Teman a pälüeni Hiop,
“Ifa usun, eman mwän mi tipachem epwe eäni kapasen pälüen mi pöön chök
o püsin aura ren asepwälin ötiu?
Ifa usun, epwe anini won kapas esap wor lomotan,
ika won fos resap alisi eman?
Nge en ka pinei än ekewe aramas repwe niuokusiti Kot
o apeti ar iotek ngeni.
Pun om föföringau a pwä ren mine ka apasa,
ka filätä kapasen atuputup.
Kapasen awom a atipisuk, sap ngang,
püsin om kapas a pwärätä pwe ka tipis.
 
Ifa usun, en aemanün aramas mi uputiu?
Ika ka fen nom, lupwen Kot a föri ekewe chuk?
Ifa usun, ka nom lon än Kot mwichen pwüngüwüng o aüselinga mine ra pwüngüpwüng won?
Ifa usun, en echök ka eäni tipachem?
Ifa usun, met en ka silei, nge äm aisap silei?
Ifa usun, met en ka weweiti, nge esap fat ngenikem?
10 Äm aia kaiö seni ekewe mwän mi pwech mökürer me ekewe chinlap,
ir ra uputiu mwen semom.
11 Ifa usun, kosap menemen ren än Kot kewe kapasen achipachip,
ika ren ekewe kapas pwetete äm aia ürenuk?
12 Met a kupeti lelukom? Nge pwota mesom a afochofoch ngenikem?
13 Ka song ngeni Kot o tipimwäl ngeni ren ena sokun kapas?
14 Ifa usun, eman aramas a tongeni limöch?
Ika eman mi uputiu seni eman fefin a tongeni pwüng?
15 Ika Kot esap lükü nöün kewe mi pin,
nge ekewe läng resap limöch me fän mesan,
16 epwe fen ifan eman aramas mi kon anioput o fokun ingau,
a ünümi föföringau usun an ünümi koluk? Hiop 25.4-6
17 Hiop, kopwe aüseling mine üpwe ürenuk,
üpwe pwäri ngonuk mine üa küna.
18 Üpwe ürenuk mine chon tipachem ra apworausa,
nge resap aopala och mine semelaper kewe ra aiti ngeniir.
19 (Ir echök ra fanüeni ewe fanü,
nge esap wor eman chon ekis a nom lefiler.)
20 Eman aramasangau mi ariaföüü aramas epwe chök riaföü fochofoch lon unusen ränin manauan.
21 A rongorong sokopaten ngingi mi fokun aniuokus,
nge lon fansoun kinamwe ewe chon kata epwe feitiu won.
22 Esap wor an apilüköch pwe epwe tongeni sü seni rochopwak,
a chök sousou ngeni an epwe mäla ren ketilas.
23 A fetalfeil pwe epwe kütta anan mongö o ais, ‘Ia a nom ie enei mongö?’
A silei pwe ewe ränin rochopwak a arapoto.
24 Riaföü me eniweniw ra aniuokusu ewe aramasangau,
ra pworaiti usun eman king mi amol ngeni maun,
25 pun a aitietä pöün o pälüeni Kot,
a ü ngeni Ewe mi Unusen Manaman
26 o säpuropur ngeni fän an tittin maun mi malül.
27 A kinupunup won mesan o kitinup won wänükün.
28 Nge epwe imweimw lon telinimw mi tala
o nom lon imw esap wor eman epwe asoi,
pun repwe wiliti ioien mettoch mi tala.
29 Ätei esap nonomotam lon an pisekisek,
wöün esap nonomola,
esap pwal mwo nge chüen wor ngünüwan won fanüfan.
30 Esap tongeni süla seni rochopwak.
A wewe ngeni efoch irä ekkei a kenala palan,
nge asepwäl a amorätiu sawitin.
31 Amwo esap püsin atupu i ren an anomu an lükülük won mine a lomotongau.
Pun mine a lomotongau epwe ina liwinin.
32 Epwe angei unusen liwinin me mwen epwe tori an fansoun.
Palan kewe resap manau.
33 Epwe wewe ngeni efoch irän wain mi amorätiu föün resamwo nup,
pwal ngeni efoch irä olif mi amorätiu sawitin.
34 Esap wor mwirimwirin ewe mwichen chon resap aleasochisi Kot,
imwer kewe ra aüetä ren lifangen amichimich repwe karala.
35 Ir ekewe aramas mi chök ekiekietä mine esepwüng o föri föför mi ngau,
leluker a uren atuputup.”

15:16: Hiop 25.4-6