21
Hiop a apwüngü pwe ekewe aramasangau ra feiöch
21.1-34
Mürin, Hiop a üreni chiechian kewe,
“Oupwe aüselingafichi ai kei kapas.
Ren ei oupwe achipaei.
Oupwe mwüt ngeniei pwe üpwe kapas.
Nge wesin ai kapas oua tongeni sopwela le turunufaseei.
Ifa usun, üa siö ngeni aramas?
Pwota üpwe chök engila?
Oupwe nenengeniei o mairü,
oupwe pwölüela awemi ren pöümi.
Lupwen üa ekieki usun mine a fis ngeniei,
üa rükö, chechech a toriei.
Pwota ekewe aramasangau ra manau o tori chinlap,
nge ar nemenem a wattela?
Nöür kewe me nöün nöür kewe ra nonomöch me fän meser.
A wor kinamwe lon imwer kewe, nge esap wor niuokus lor.
Kot esap awarato wor feiengau.
10 Nöür ätemwänin kow ra tufichin apwopwofochofoch,
nöür kewe kow ra nöünöütiu, nge esap mwetela nöür.
11 Ra tinawu nöür semirit pwe repwe urumwotfeil usun chök epwi pwin sip.
12 Ra köl fiti pisekin kaktai me ükülele,
ra mweireir ren tikin aangün.
13 Ra pisekisek lon ränin manauer meinisin,
ra mäla o feitiu lon ewe lenien sotup fän kinamwe.
14 Ra üreni Kot, ‘Kopwe feila senikem.
Äm aisap mochen silei letipom fän iten manauem.
15 Iö Ewe mi Unusen Manaman pwe sipwe angang ngeni?
Met feiöchüch are sia iotek ngeni?’
16 Nge ar feiöch esap nom lon püsin pöür.
Iei mine ngang üpwe atoauala seniei än ekewe aramasangau öüröür.
 
17 Ifa usun, fän fitu a fis pwe än ekewe aramasangau lamp a kunula?
Ifa usun, fän fitu a toriir feiengau?
Ifa usun, Kot a apwüngüür lon an song?
18 Ifa usun, ra wewe ngeni fetilipwas mi ässila ren asepwäl,
ika ngeni ekewe pön wiich mi ässila ren mölümöl?
19 Ämi oua apasa, ‘Kot a anomu liwinin tipisin eman aramas won nöün kana.’
Apwi, epwe ngeni püsin liwinin an föför,
pwe epwe silei pwe iei liwinin an tipis.
20 Eman chon tipsis epwe püsin küna an feiengau,
epwe püsin ün seni ewe kapen lingeringer än Ewe mi Unusen Manaman.
21 Ifa usun, epwe ekieki usun chon leimwan mi manau me mürin,
lupwen manauan a wesila?
22 Ifa usun, mi wor eman epwe tongeni aiti ngeni Kot silelap,
ngeni ewe Kot mi apwüngü chokewe mi nom pekitä lon läng?
23 Eman a mäla lon an fokun pöchökül,
a fokun kinamwe o nonomöch.
24 Inisin a fokun kitinup,
nge minen lon chün esap pwasapwas.
25 Nge pwal eman a mäla fän weiresin letipan,
esap fokun küna feiöch.
26 Ir me ruoman repwe konopök fän pwül,
nge moso repwe pwölürela.
 
27 Üa fokun silei ämi ekiekingau,
pwe oua ekiekin föri ngeniei mine esepwüng.
28 Pun oua ais, ‘Ia a nom ie imwen ewe samol?
Ia a nom ie imwen ekewe aramasangau?’
29 Ifa usun, ousap aisini mwo ekewe chon sai?
Ifa usun, ousap aüseling ngeni mine ra apworausa,
30 pwe ewe aramasangau esap feiengau lon ewe ränin feiengau,
pwe a ngasala lon ewe ränin än Kot song?
31 Iö a tongeni atipisi ewe aramasangau nge newenewen ngeni?
Iö a tongeni liwini ngeni an föför?
32 Lupwen ra uwei ngeni ewe lenien peias,
chon mas ra mamasa.
33 Chomong aramas ra tapwela mürin,
nge chokewe mi akom mwan resap lea.
Epwe peias lon eu lemol a sani lupwen a manau.
34 Pwota oua mochen achipaei ren kapas lomotongau?
Esap chüen wor och lusun ämi kapas pälüen, nge kapas chofana chök.”