23
Hiop a mochen silei pwüngün an weires me ren Kot
23.1-17
Mürin, Hiop a apasa,
“Lon ai siö üa chüen ü ngeni Kot ikenai.
Pöün a chou woi lon ai ngüngü.
Amwo üpwe silei ia üpwe küna i me ie,
pwe üpwe tongeni feila ren lon lenian.
Üpwe pwärätä ai weires me fän mesan
o apasawu ai kapasen alellet.
Üa mochen silei mine epwe pälüeni ngeniei
o weweiti mine epwe üreniei.
Ifa usun, epwe anini ngeniei fän watten an manaman?
Apwi! Epwe aüselinga ai kapas.
Mürin, eman aramas mi wenechar epwe pwüngüpwüng ngeni,
nge ngang üpwe ngasala seni ai soukapwüng tori feilfeilachök.
 
Nengeni, üa feila peliötiu, nge Kot esap nom ikenan,
üa pwal feila pelilotou, nge üsap küna i.
Lupwen a föri an angang me peliefeng, ngang üsap küna,
lupwen a kul ngeni peliör, ngang üsap nenengeni.
10 Nge Kot a silei ewe al üa fetal won.
Lupwen a sotuniei, a pwä pwe üa usun kolt.
11 Pechei a ipwelong lon ipwan.
Üa tümwünüfichi an al, nge üsap rik seni.
12 Üa apwönüetä än Kot kewe allük,
üa iseis an kewe kapas lon letipei.
13 Nge Kot esap siwil. Iö a tongeni apälüa?
Meinisin mine a mochen epwe chök föri.
14 Pun epwe awesala mine a akota ngeniei.
Chomong akot usun ekei ra nom lon an ekiek.
15 Iei mine üa fokun chechech me fän mesan.
Lupwen üa ekieki usun, üa niuokusiti i.
16 Kot a föri pwe üa apilükingau,
Ewe mi Unusen Manaman a eniwaei.
17 Nge üsap fanafanala ren ewe rochopwak,
pwal ren ewe rochokichin rochopwak mi pwölüela mesei.”