26
Hiop a pwärätä usun än Kot manaman
26.1-14
1 Mürin, Hiop a pälüeni Piltat,
2 “Ka fokun alisi ätewe esap wor manan.
Ka fokun apöchöküla ätewe esap wor an pöchökül.
3 Ka fokun öüröüraei ngang ätewe esap wor ai tipachem
o achomongala ngeniei ekewe kapasen silelap.
4 Iö a alisuk pwe kopwe eäni ekei kapas,
ngünün iö ka ngününi?
5 Ngünün ekewe mi mäla ra chechech
me lon ekewe koluk mi nom fän pwül.
6 Ewe lenien sotup a pwäla me fän mesen Kot,
ewe leni mi alolol esap wor pwölüpwölün.
7 Kot a ameresala ewe längin efeng ia esap wor och ie, o
emeitiuätä fanüfan won eu leni mi pön.
8 A achufengeni ekewe koluk lon an kewe kuchuchol,
nge ekewe kuchu resap sangfesen ren chour.
9 A pwölüela ewe maram, lupwen a unus,
ren an ameresala an kewe kuchu won.
10 A föri eu kukumos won ekewe koluk,
pun epwe wor eu kiä lefilen saram me rochopwak.
11 Ekewe üren läng ra chechech,
ra mairü ren an kapasen apwüng.
12 A anonoi ewe matau ren an manaman
o atatakisi Rahap *Rahap eman mönün leset mi mwacho o fokun watte lon än ekewe aramasen lom tutulap, a aliosunätä manaman mi ngau. ren an tipachem.
13 Ekewe läng ra kurufat ren an ngasangas,
pöün a posuw ewe serepenit mi süla.
14 Nengeni, ekei lapalap ra chök eu kükün kinikinin an kewe föför.
A chök eu kükün ngüngü mine sia rongorong seni Kot.
Nge iö a tongeni weweiti pöchökülen an manaman?”
*26:12: Rahap eman mönün leset mi mwacho o fokun watte lon än ekewe aramasen lom tutulap, a aliosunätä manaman mi ngau.