Sowel
Kapas akom
I. Iten ei puk: Sowel, pun mine a mak lon, an kapasen osuni. Wewen ei it Sowel: Ewe Samol mi Lapalap i Kot.
II. Chon makei ei puk: Sowel
III. Itelapemongen ei puk: Are a fis ekieksefäl, Kot epwe siwili an ekiekin apwüngükich ngeni feiöch.
IV. Kapas aüchean ei puk: Ränin ewe Samol mi Lapalap, ewe ränin apwüng a arapeto. Epwe pwal war eu fansoun feiöch, lupwen Kot epwe tinato Ngünün.
V. Masouen ei puk Sowel: Ese kon nien wor pworaus usun manauen ewe soufos Sowel. Sowel a osuni pwe epwe war eu mwichemongen lifichimas mi ataela ewe fanü, epwe pwal fis eu fansoun pwasapwas. Sowel a mefi asisilen waren ränin ewe Samol mi Lapalap me lon ekei mettoch repwe fis, ewe fansoun Kot epwe apwüngü chokewe mi ü ngeni. Ewe soufos a uwei än Kot kapas ngeni ekewe aramas, pwe repwe ekieksefäl, pwal an pwon, pwe epwe aöchüsefäli ewe fanü o afeiöchü nöün aramas. Nge mine a kon aüchea, än Kot pwon pwe epwe tinato Ngünün ren aramas meinisin, ren mwän me fefin, säräfö me chinlap.
VI. Tettelin masouen ei puk:
Ewe feiengau ren ekewe lifichimas 1.1–2.17
Ewe pwon pwe ewe fanü epwe öchsefäl 2.18-27
Ränin we Samol mi Lapalap 2.28–3.21
1
Ewe fanü epwe tala ren lifichimas
1.1–2.11
1 Iei alon ewe Samol mi Lapalap ngeni Sowel nöün Petuel we mwän:
2 Oupwe rongorong, ämi ätemirit,
oupwe aü selingemi, ämi meinisin mi nonom lon ei fanü Juta.
Ifa usun, ei sokun mettoch a fen fis
lon fansoun manauemi ika lon fansoun manauen semelapemi kewe?
3 Oupwe asile ngeni nöümi usun,
nge ir repwe asile ngeni nöür
seni eu täppin aramas tori eu täppin.
4 Mine ekewe muunen lifichimas ra likitala seni uän ämi ira,
ekewe lifichimas mi äsfeil ra eni.
Nge mine ekewe lifichimas mi äsfeil ra likitala,
ekewe lifichimas mi mwetemwet ra eni.
Nge mine ekewe lifichimas mi mwetemwet ra likitala,
ekewe lifichimas mi atai meinisin ra eni.
5 Oupwe nenela o kechü, ämi chon pulas,
oupwe ngüngüres, ämi meinisin mi ünümi wain,
pun esap chüen wor ünümemi wain mi arar.
6 Iwe, epwi pwiin lifichimas a feito o ataela fanüach.
Ra pöchökül o chocho pwe esap wor eman a tongeni aleaniir.
Ngir ra ken usun chök ngin eman laion. ✡Pwär 9.8
7 Ra ataela ach tanipin wain,
ra pwal enala ach irä fiik
o atikala silir,
pwe paler ra pwechepwech.
8 Oupwe kechü usun eman föpwül
mi kechüeiti kofotun mi mäla.
9 Esap chüen fis asoren mongö me asoren ün lon ewe imwenfel.
Iei mine ekewe souasor mi angang ngeni ewe Samol mi Lapalap ra letipeta.
10 Iwe, ekewe tanipi ra tala,
nge ewe pwül a masua.
Ekewe irän wiich ra tala,
ewe wain me ewe apüra seni föün olif ra morola.
11 Oupwe rükö, ämi chon tu pwül,
oupwe pwal kechü, ämi chon tanipini irän wain.
Oupwe kechüeiti ekewe irän wiich me parli,
pun esap chüen wor resin fanüemi.
12 Iwe, ewe irän wain a pwasala, ewe irä fiik a mäla.
Ekewe irä palm, ekewe irä apel me ringo,
pwal ekewe lusun irän lemäl meinisin ra pwasala.
Iwe, esap chüen wor än aramas pwapwa.
13 Oupwe üföüf üf seni tuk o kechü,
ämi souasor mi angang ngeni ewe rongen asor.
Oupwe feito o ngüngüres lon üfemi seni tuk lon unusen pwin,
ämi nöün ai we Kot chon angang.
Pun asoren mongö me asoren ün esap chüen fis lon imwenfelin ämi we Kot.
14 Oupwe apini eu rän pwe oupwe echikefel lon,
oupwe pwal körato aramas pwe epwe wor eu mwich mi pin.
Oupwe achufengeni ekewe ätemirit
me chon Juta meinisin,
pwe repwe feito lon imwenfelin ewe Samol mi Lapalap ämi we Kot o siö ngeni.
15 Eniwokusun lon ewe rän.
Pun ränin ewe Samol mi Lapalap a arap.
Ewe rän a war, eu ränin afeiengau
me ren ewe Kot mi Unusen Manaman. ✡Ais 13.6
16 Ifa usun, ousap küna pwe a rosola enemi mongö?
Esap pwal chüen wor pwapwa me mweireir lon imwenfelin ach we Kot.
17 Iwe, ekewe föün irä mi fot lon pwül ra pwasala.
Esap wor föün wiich lon ekewe lenien iseis,
iei mine ekewe imwen iseis föün wiich ra pöla o tala.
18 Iwe, ekewe kow ra wörüwör ren ar echik,
pun esap chüen wor ener fetil,
ekewe pwiin sip ra pwal riaföü.
19 Ai Samol mi Lapalap, üa siö ngonuk,
pun ekewe lenien fetil me ekewe irän lemäl meinisin ra pwasala,
ra usun chök nge ekkei a kenirela.
20 Pwal ekewe manmwacho ra siö ngonuk,
pun esap chüen wor kolukun lon ekewe chanpupu.