1 Nge ekewe chon Israel ra atai allükün ekewe mettoch mi pin repwe kata. Pun Akan nöün Karmi we mwän, nge Karmi nöün Sapti, nge Sapti nöün Sera seni ewe ainangen Juta, a angei ekoch ekewe mettoch repwe kata. Iwe, ewe Samol mi Lapalap a fokun song ngeni ekewe aramasen Israel.

2 Iwe, Josua a tinala ekoch mwän seni Jeriko ngeni Ai mi arap ngeni Pet-awen ötiuen Petel. Iwe, a üreniir, “Oupwe feila o operi ewe fanü.” Nge wesin än ekewe mwän operi ewe fanü, 3 ra liwiniti Josua o üreni, “Kosap tinala ekewe aramas meinisin pwe repwe maun ngeni Ai. Kopwe chök mwütätä ükükün ruu ika ülüngat ngeröü mwän repwe feila o maun ngeni. Kosap aweiresi ekewe aramas meinisin le tinirela ikenan, pun chon Ai ra chokükün.” 4 Iei mine ina epwe ükükün ülüngat ngeröü chök mwän seni lein ekewe aramas ra feila. Nge lupwen ra maun ngeni ekewe chon Ai, ra sü rer. 5 Iwe, ekewe chon Ai ra niela ina epwe ükükün ilik me wonoman mwän me leir. Ra pwal tapweriir seni ewe asamalap tori Separim o nirela me lon ewe pwokur. Iwe, leluken chon Israel a kisikisila o rükö.

6 Mürin, Josua me ekewe souakomwen Israel ra kamwei üfer, ra chapetiu lepwül mwen än ewe Samol mi Lapalap we pworofel tori lekuniol. Ra pwal tukotuketä won mökürer pwül moromor pwe asisilen ar letipeta. 7 Iwe, Josua a apasa, “Ai Samol me ai Kot, pwota chök ka fen emwenikeemito pekiton ewe chanpupu Jortan? Ifa usun, kopwe atokeemilong lepöün chon Amor pwe repwe arosakeemila? Amwo sipwe menemen le nonom pekilan ewe chanpupu Jortan. 8 Ai Samol, met ngang üpwe chüen apasa, nge iei chon Israel ra sü me mwen chon oputeer? 9 Pun ekewe chon Kanaan me chon ewe fanü meinisin repwe rong usun. Iwe, repwe pwelikeemila o nikeemila meinisin. Nge met en kopwe föri pwe epwe wor meninum me ren aramas?”

10 Nge ewe Samol mi Lapalap a üreni Josua, “Kopwe ütä. Pwota ka chapetiu lepwül? 11 Chon Israel ra tipis. Ra atai ai we pwon üa allük ngeniir. Ra angei ekoch ekewe mettoch mi pin repwe kata. Ra solä o chofana, ra pwal achuelong ekewe mettoch lon püsin pisekir. 12 Iei mine ekewe aramasen Israel resap tongeni pwora ngeni chon oputeer. Ra sü me mwer, pun ir ra püsin atoto feiengau wor. Üsap chüen etikemi, tori oupwe ataela ekewe mettoch mi pin ngenikemi. 13 Kopwe ütä o apini ekewe aramas. Kopwe üreniir pwe repwe apiniir o amol ngeni lesor. Pun iei aloi, ngang ewe Samol mi Lapalap ewe Koten Israel, ‘Ämi chon Israel, a wor mettoch leimi mi pin ngenikemi. Ousap tongeni pwora ngeni chon oputakemi, tori oupwe ataela ekewe mettoch mi pin ngenikemi.’ 14 Iei mine lesosorun lesor eu me eu kewe ainang epwe mwicheto, nge ewe ainang ewe Samol mi Lapalap a asilla, eu me eu eterekesin lon epwe mwicheto. Iwe, ewe eterekes ewe Samol mi Lapalap a asilla, eu me eu familien lon epwe mwicheto, nge ewe famili ewe Samol mi Lapalap a asilla, eman me eman mwänin lon epwe feito. 15 Iwe, ätewe mi siil pwe a anomu ekewe mettoch mi pin ngeni epwe kekila, i me chon an famili pwal an mettoch meinisin, pokiten a atai än ewe Samol mi Lapalap we pwon, pwal pokiten a föri eu föför mi äsäw me lon Israel.”

16 Iwe, Josua a pwätä lesosorusich o amwichato chon Israel lon eu me eu ainang, nge ewe ainangen Juta a siil. 17 Mürin a amwichato eu me eu eterekesin Juta, nge ewe eterekesin Sera a siil. Iwe, a amwichato eu me eu familien ewe eterekesin Sera, nge ewe familien Sapti a siil. 18 Mürin a amwenato eman me eman mwän seni ewe familien Sapti, nge Akan nöün Karmi we mwän a siil. Karmi nöün Sapti, nge Sapti nöün Sera seni ewe ainangen Juta. 19 Mürin Josua a üreni Akan, “Nei, kopwe kapas wenechar fän mesen ewe Samol mi Lapalap ewe Koten Israel o pwärätä meinisin. Iei kopwe üreniei met ka föri, nge kosap aopala och seniei.” 20 Iwe, Akan a üreni Josua, “Ellet üa tipis ngeni ewe Samol mi Lapalap ewe Koten Israel. Iei usun mine ngang üa föri: 21 Lupwen üa küna me lein liapach kewe echö owokot mi ling minen Papilon, pwal limu paun silifer me efoch fochun kolt ükükün choun rüe aunus, üa mocheniaitiir o angeer. Üa aopeer fän pwül lon imwei imw mangaku, nge ewe silifer a nom far.”

22 Iwe, Josua a tinala ekoch chon künö. Ra sä ngeni imwen Akan we o küna ekewe mettoch ra kaop lon, nge ewe silifer a nom far. 23 Iwe, ra angeer seni lon ewe imw mangaku o uweerela ren Josua me ekewe aramasen Israel meinisin. Iwe, ra iseniretiu fän mesen ewe Samol mi Lapalap. 24 Mürin, Josua me chon Israel meinisin ra angei Akan nöün Sera we mwän, ewe silifer, ewe owokot me ewe fochun kolt, pwal nöün mwän me fefin, nöün ätemwänin kow, nöün aas me sip, imwan imw mangaku me meinisin mine a eäni. Iwe, ra uweeretä ren ewe lemolun Akor. 25 Iwe, Josua a üreni, “Pwota ka atoto woch feiengau? Ewe Samol mi Lapalap epwe atoto womw feiengau ikenai.” Iwe, chon Israel meinisin ra monei fau ngeni Akan me aramasan tori ra mäla. Mürin ra keniir. 26 Iwe, ra achukuchukätä wor eu ioien fau mi tekia a nom tori ikenai. Mürin ewe Samol mi Lapalap a ükütiu le song. Iei mine ewe leni a iteni lemolun Akor *wewen Akor feiengau tori ikenai.