1 Iwe, aruuen kinikinin ewe fanü a ainet ngeni chon ewe ainangen Simeon a aükük ngeni ükükün ar kewe famili. Nge fanüer a nom lukalapen fanüen chon ewe ainangen Juta. 2 Iwe, iei inetir me lon ewe fanü ekei telinimw iter: Peer-sepa, Sepa me Molata, 3 Hasar-sual, Pala me Esem, 4 Eltolat, Petul me Horma, 5 Siklak, Pet-markopot me Hasar-susa, 6 Pet-lepaot me Saruhen, ükükür meinisin engol me ülüngat telinimw fiti wisoposopur. 7 Pwal Ain, Rimmon, Eter me Asan, ükükür meinisin rüanü telinimw fiti wisoposopur, 8 me ekewe sop meinisin mi pweli ekei telinimw tori Paalat-peer me Rama lon ewe fanü Nekep. Iei inetin chon ewe ainangen Simeon me lon ewe fanü a aükük ngeni ükükün ar kewe famili. ✡1.Kron 4.28-33 9 Pokiten fanüen chon ewe ainangen Juta a kon watte ngeniir, chon ewe ainangen Simeon ra angei eu kinikin me lukalapen fanüer pwe inetir.

10 Iwe, aülüngatin kinikinin ewe fanü a ainet ngeni chon ewe ainangen Sepulon a aükük ngeni ükükün ar kewe famili. Iwe, ükükün ewe fanü ra angei a tori Sarit. 11 Seni ikenan ewe kiä a pwerela ngeni lotou o feila ngeni Mareal, a akkü Tapeset o tori ewe öüwö mi nom peliötiuen Jokneam. 12 Nge seni Sarit ewe kiä a pwal pwerela ngeni ötiu tori kiännin Chislot-tapor. Seni ikenan a pwerela tori Taperat o feitä tori Jafia. 13 Seni ikenan ewe kiä a pwerela ngeni ötiu tori Kat-hefer me Etkasin, nge lupwen a pwerela tori Rimmon, a pwelila ngeni Nea. 14 Iwe, me peliefeng ewe kiä a pwerela ngeni Hanaton o müchütiu me lemolun Iftahel. 15 Nge lükün ekei telinimw a pwal wor ekoch iter: Katta, Nahalal, Simron, Itala me Petleem *iten fisu telinimw esap mak, ükükün engol me ruu telinimw fiti wisoposopur. 16 Iei fanüen chon ewe ainangen Sepulon, ar kewe telinimw fiti wisoposopur, a aükük ngeni ükükün ar kewe famili.

17 Iwe, arüanün kinikinin ewe fanü a ainet ngeni chon ewe ainangen Isakar a aükük ngeni ükükün ar kewe famili. 18 Iwe, a pachelong lon kiännin fanüer ekei telinimw: Jesreel, Chesulot me Sunem, 19 Hafaraim, Sion me Anaharat, 20 Rapit, Kision me Epes, 21 Remet, En-kanim, En-hata me Pet-pases. 22 Ewe kiä a pwal akkü Tapor, Sahasuma me Pet-semes o müchütiu me arun ewe chanpupu Jortan. A wor ükükün engol me wonu telinimw fiti wisoposopur. 23 Iei fanüen chon ewe ainangen Isakar, ar kewe telinimw fiti wisoposopur, a aükük ngeni ükükün ar kewe famili.

24 Iwe, alimuen kinikinin ewe fanü a ainet ngeni chon ewe ainangen Aser a aükük ngeni ükükün ar kewe famili. 25 Iwe, a pachelong lon kiännin fanüer ekei telinimw: Helkat, Hali, Peten me Aksaf, 26 Alamelek, Amat me Misal. Nge me pelilotou ewe kiä a akkü Karmel me Sihor-lipnat. 27 Mürin, ewe kiä a pwelila ngeni ötiu, a pwerela tori Pet-takon o akkü Sepulon pwal ewe lemolun Iftahel, a pwerela efeng tori Pet-emek me Neier. Mürin a sopwela le pwerela efeng tori Kapul, 28 Epron, Rehop, Hamon me Kana tori Sitonlap. 29 Mürin ewe kiä a pwelila tori Rama pwal tori ewe telinimw mi pöchökül tittin itan Tirus. Mürin, ewe kiä a pwelila tori Hosa o müchütiu me arun ewe mataulap. Iwe, a pwal pachelong ekei telinimw iter: Mahalap me Aksip, 30 Uma, Afek me Rehop, ükükün rüe me ruu telinimw fiti wisoposopur. 31 Iei fanüen chon ewe ainangen Aser, ar kewe telinimw fiti wisoposopur, a aükük ngeni ükükün ar kewe famili.

32 Iwe, awonuen kinikinin ewe fanü a ainet ngeni chon ewe ainangen Naftali a aükük ngeni ükükün ar kewe famili. 33 Kiännin a pwerela seni Helef tori ewe irä ook lon Saananim, a pwal pwerela tori Atami-nekep me Japneel tori Lakum, nge a müchütiu me arun ewe chanpupu Jortan. 34 Mürin ewe kiä a pwelila ngeni lotou tori Asnot-tapor. Nge seni ikenan a pwerela tori Hukok, a akkü Sepulon me peliör o Aser me pelilotou, pwal ewe chanpupu Jortan me peliötiu. 35 Iwe, ar kewe telinimw mi pöchökül tittir iter: Sitim, Ser, Hamat, Rakat me Kineret, 36 Atama, Rama me Hasor, 37 Ketes, Etrei me En-hasor, 38 Jiron, Miktalel, Horem, Pet-anat me Pet-semes, ükükün engol me tiu telinimw fiti wisoposopur. 39 Iei fanüen chon ewe ainangen Naftali, ar kewe telinimw fiti wisoposopur, a aükük ngeni ükükün ar kewe famili.

40 Iwe, afisuen kinikinin ewe fanü a ainet ngeni chon ewe ainangen Tan a aükük ngeni ükükün ar kewe famili. 41 Ikkei iten ekewe telinimw mi nom lon kiännin fanüer: Sora, Estaol me Ir-semes, 42 Sa-alapin, Aijalon me Itla, 43 Elon, Timna me Ekron, 44 Elteke, Kipeton me Paalat, 45 Jehut, Pene-perak me Kat-rimon, 46 Me-jarkon me Rakon, pwal ewe fanü mi sasape ngeni Jopa. 47 Nge lupwen ekewe chon Tan resap tongeni färelong lon ewe fanü, ra feitä o maun ngeni Lesem. Mürin ar liapeni ewe telinimw o niela chon, ra tolong o imweimw lon. Nge ra aita ngeni Lesem iten semelaper we Tan. ✡Souk 18.27-29 48 Iei fanüen chon ewe ainangen Tan, ar kewe telinimw fiti wisoposopur, a aükük ngeni ükükün ar kewe famili.

49 Iwe, lupwen ra wes le aineti ekewe kinikinin fanü ngeni ekewe aramasen Israel pwe fanüer, ekewe aramasen Israel ra ngeni Josua nöün Nun we mwän eu fanü me lein fanüer pwe fanüan. 50 Iwe, fän än ewe Samol mi Lapalap allük ra ngeni Josua ewe telinimw a tüngor seniir. Ra ngeni ewe telinimw Timnat-sera mi nom won chukuchukutän ewe fanü Efraim. Iwe, a aüsefälietä ewe telinimw o imweimw lon.

51 Iwe, ikkei ekewe kinikinin fanü ewe souasor Eleasar me Josua nöün Nun we mwän, pwal souemwenin än semer kewe cho seni ekewe ainangen Israel ra aineti ren üttüt me fän mesen ewe Samol mi Lapalap lon Silo me leasamalapen ewe imwmangaku ia aramas ra churi Kot ie. Iei usun ra wes le aineti ewe fanü.