1 Iwe, ewe Samol mi Lapalap a kapas ngeni Moses, 2 pwe epwe üreni ekewe aramasen Israel: Are eman a tipisin chechengau le föri mine ewe Samol mi Lapalap a allük pwe esap föri, iei usun mine epwe föri: 3 Are ewe souasor mi lap a tipis o ren an tipis a atoto tipis won ekewe aramas, epwe uwato ngeni ewe Samol mi Lapalap eman nienifön ätemwänin kow esap wor terin, pwe epwe eäni asor fän iten an tipis. 4 Iwe, epwe uwato ewe ätemwänin kow leasamalapen ewe imwenfel seni mangaku, epwe anomu pöün won möküran o niela me fän mesen ewe Samol mi Lapalap. 5 Mürin, ewe souasor mi lap epwe angei ekis chan ewe ätemwänin kow o uwato lon ewe imwenfel seni mangaku. 6 Epwe atukalong aütün lon ewe cha o äsupu fän fisu ekis seni ewe cha mwen chechen lon ewe leni mi pin fän mesen ewe Samol mi Lapalap. 7 Ewe souasor epwe pwal tofätä ekis seni ewe cha won mächän ewe rongen asoren ötüöt mi nom lon ewe imwenfel seni mangaku fän mesen ewe Samol mi Lapalap. Nge lusun chan ewe ätemwänin kow epwe ninätiu lepopun ewe rongen asoren kek mi nom leasamalapen ewe imwenfel seni mangaku. 8 Iwe, seni ei asoren tipis epwe angei kirisin ewe ätemwänin kow meinisin, ewe kiris mi pwölüela pisekin lon inisin meinisin, 9 ekewe ruoföü föün lon fiti kirisin wor mi kükü ngeni fitukesaran wänüükün pwal mwärekeon ammünün. 10 Iwe, ewe souasor epwe keniir won ewe rongen asoren kek, usun chök mine a föri ngeni ewe mönün asoren kinamwe. 11 Nge silin ewe ätemwänin kow me fitukan meinisin, pwal möküran me pechen, pisekin lon inisin fiti taran, 12 unusen ewe ätemwänin kow epwe uwawu lon eu leni mi limöch lükün ewe ia ra nonom ie. Iwe, epwe keni won ekkei seni mwüch, ia ra ninala ie ewe falang.

13 Iwe, are unusen ewe mwichen aramasen Israel epwe tipisin chechengau, nge resap mefi pwe ra föri mine ewe Samol mi Lapalap a allük ngeniir pwe resap föri, ra atoto tipis wor. 14 Nge are ra mefi pwe ra tipis, ewe mwichen aramas epwe emwenato mwen ewe imwenfel seni mangaku eman nienifön ätemwänin kow fän iten asoren tipis. 15 Iwe, ekewe souakomwen ewe mwich repwe anomu pöür won möküren ewe ätemwänin kow o niela me fän mesen ewe Samol mi Lapalap. 16 Mürin, ewe souasor mi lap epwe uwato ekis seni chan ewe ätemwänin kow lon ewe imwenfel seni mangaku. 17 Epwe atukalong aütün lon ewe cha o äsupu fän fisu mwen chechen lon ewe leni mi pin fän mesen ewe Samol mi Lapalap. 18 Iwe, ewe souasor epwe pwal tofätä ekis seni ewe cha won mächän ewe rongen asoren ötüöt mi nom fän mesen ewe Samol mi Lapalap lon ewe imwenfel seni mangaku. Nge lusun ewe cha epwe ninätiu lepopun ewe rongen asoren kek mi nom leasamalapen ewe imwenfel seni mangaku. 19 Mürin epwe angei kirisin ewe mönün asor meinisin o kenala me won ewe rongen asor. 20 Usun mine a föri ngeni ewe mönün asoren tipis, iei usun epwe pwal föri ngeni ei ätemwänin kow. Ren ei ewe souasor epwe föri asoren amusamusen tipis fän iten ekewe aramas, pwe ar tipis epwe musala. 21 Mürin epwe uwala ewe ätemwänin kow lükün ewe ia ra nonom ie o kenala, usun a kenala ewe ätemwänin kow fän iten an tipis. Iei eu asoren tipis fän iten ewe mwichen aramas.

22 Iwe, are eman samol a tipisin chechengau le föri mine an we Kot ewe Samol mi Lapalap a allük ngeni pwe esap föri, a atoto tipis won. 23 Iwe, are a mefi pwe a tipis, epwe uwato eman ätemwänin kuuch esap wor terin fän iten an asor. 24 Epwe anomu pöün won möküren ewe kuuch o niela me lon ewe leni ia ra ni ie ekewe mönün asoren kek fän mesen ewe Samol mi Lapalap. Iei eu asoren tipis. 25 Mürin, ewe souasor epwe angei ekis chan ewe mönün asoren tipis o tofätä won mächän ewe rongen asoren kek, nge lusun ewe cha epwe ninätiu lepopun ewe rongen asoren kek. 26 Nge kirisin meinisin epwe kenala me won ewe rongen asor, usun a kenala kirisin ewe mönün asoren kinamwe. Iei usun ewe souasor epwe föri asoren amusamusen tipis fän iten ewe samol, pwe an tipis epwe musala.

27 Iwe, are eman me lein ekewe aramas a tipisin chechengau le föri mine ewe Samol mi Lapalap a allük ngeni pwe esap föri, a atoto tipis won. 28 Nge are a mefi pwe a tipis, epwe uwato eman liafefinin kuuch esap wor terin, pwe an asor fän iten an tipis. 29 Epwe anomu pöün won möküren ewe mönün asoren tipis o niela me lon ewe leni ia ra niela ie ekewe mönün asoren kek. 30 Mürin, ewe souasor epwe angei ekis chan ewe mönün asoren tipis o tofätä won mächän ewe rongen asoren kek, nge lusun ewe cha epwe ninätiu lepopun ewe rongen asor. 31 Mürin, epwe aserala kirisin meinisin, usun a aserala kirisin ekewe mönün asoren kinamwe. Iwe, ewe souasor epwe keni me won ewe rongen asor, pwe ewe Samol mi Lapalap epwe efich pwoon. Iei usun ewe souasor epwe föri asoren amusamusen tipis fän iten ewe aramas, pwe an tipis epwe musala. ✡Num 15.27-28

32 Iwe, are eman aramas a uwato eman sip pwe an asoren tipis, epwe uwato eman liafefin esap wor terin. 33 Epwe anomu pöün won möküren ewe mönün asor o niela me lon ewe leni ia ra niela ie ekewe mönün asoren kek, pwe eu asoren tipis. 34 Mürin, ewe souasor epwe angei ekis chan ewe mönün asor o tofätä won mächän ewe rongen asoren kek, nge lusun ewe cha epwe ninätiu lepopun ewe rongen asor. 35 Iwe, epwe aserala kirisin meinisin, usun a aserala kirisin ewe sip a ninnila fän iten asoren kinamwe. Mürin, ewe souasor epwe kenala ewe kiris won ewe rongen asor asen ewe asoren kek ngeni ewe Samol mi Lapalap. Ren ei ewe souasor epwe föri asoren amusamusen tipis fän iten ewe aramas, pwe an tipis epwe musala.