1 Iwe, ewe Samol mi Lapalap a kapas ngeni Moses me won ewe chuk Sinai o üreni, 2 pwe epwe ngeni ekewe aramasen Israel ekei allük: Lupwen oupwe tolong lon ewe fanü ewe Samol mi Lapalap epwe ngenikemi, epwe fis eu ierin sapat ngeni ewe Samol mi Lapalap won ewe fanü. 3 Lon ükükün wonu ier oupwe fotuki fanüemi. Oupwe pwal pökütolei ämi tanipin wain o kini uan lon ükükün wonu ier. 4 Nge lon ewe afisuen ier epwe fis eu ierin asösö won ewe fanü, eu ierin sapat ngeni ewe Samol mi Lapalap. Ousap fotuki fanüemi ika pökütolei ämi tanipin wain. 5 Ousap kini mine a püsin pwükütä, ousap pwal ionifengeni uän ekewe irän wain resap pökütol. Iwe, epwe fis eu ierin asösö won ewe fanü. 6 Iwe, ewe fanü a fis ewe ierin sapat won epwe awora enemi mongö fän itemi me fän iten nöümi amanau mwän me fefin, fän iten nöümi chon angang mi mö pwal fän iten ekewe chon ekis mi nom remi. 7 Epwe awora enen nöümi pwiin manfesir pwal enen ekewe manmwacho mi nom lon fanüemi, pun meinisin mine a püsin ua epwe fän iten mongö. ✡Eks 23.10-11

8 Iwe, kopwe aleani fisu ierin sapat ika fisu alea ngeni fisu ier, pwe ükükün ekewe fisu ierin sapat repwe faik me tiu ier. 9 Mürin, lon aengolun ränin ewe afisuen maram, lon ewe ränin ächächä, oupwe ettikifeili ewe rappwa mi tikimong lemenen unusen fanüemi. 10 Oupwe apini ewe alimeen ier o asilefeili lemenen unusen fanüemi, pwe aramasan meinisin ra ngasala. Ei ier epwe eu ierin supili fän itemi, lupwen eman me eman leimi epwe angeisefäli püsin fanüan a amömö me lom, nge eman me eman amanau epwe liwiniti en me an famili. 11 Iwe, ewe alimeen ier epwe eu ierin supili fän itemi. Ousap fofot, ousap pwal ionifengeni mine a püsin pwükütä, ousap pwal ionifengeni uän ekewe irän wain resap pökütol. 12 Pun iei eu ierin supili epwe pin me remi. Oupwe chök mongö seni mine a püsin pwükütä me won ewe fanü.

13 Iwe, lon ewe ierin supili eman me eman leimi epwe angeisefäli fanüan. 14 Nge are ka amömöla ngeni chon arum eu fanü ika möni seni chon arum eu fanü, ousap kirikiringaufengen lefilemi. 15 Are kopwe möni seni chon arum eu fanü, kopwe liwini ngeni ükükün fitu ier mürin ewe supili, nge i epwe amömö ngonuk ükükün fitu ier ka tongeni kini uän irän ewe fanü. 16 Iwe, are ekewe ier ra chomong, liwinin ewe fanü epwe pwal watte. Nge are ekewe ier ra chokükün, liwinin epwe pwal kükün, pun chon arum epwe amömö ngonuk ükükün fitu ier ka tongeni kini uän irän ewe fanü. 17 Ousap kirikiringaufengen lefilemi, nge oupwe meniniti ewe Samol mi Lapalap ämi we Kot.

18 Iei mine oupwe aleasochisi än ewe Samol mi Lapalap allük o apwönüetä an kewe pwüüng, pwe oupwe nonom lon ewe fanü fän kinamwe. 19 Iwe, ewe fanü epwe efisätä ua, pwe ämi oupwe mongö o möt, oupwe pwal nonom lon ewe fanü fän kinamwe. 20 Nge are oupwe ais, ‘Meta aipwe eni lon ewe afisuen ier, are aisap tongeni fofot ika ionifengeni uän ekewe irä?’ 21 Ewe Samol mi Lapalap epwe tinato an feiöch womi lon ewe awonuen ier, pwe ewe fanü epwe efisätä ua fän iten ükükün ülüngat ier. 22 Nge are oupwe fofot lon ewe awaluen ier, oupwe chök chüen mongö ekewe uän lom oua kini lon ewe awonuen ier. Tori lon ewe atiuen ier, lupwen oupwe kini ekewe ua mi fö, oupwe chüen mongö ekewe uän lom. 23 Iei mine ousap amömö ewe fanü tori feilfeilachök. Pun ei fanü fanüen Kot, nge ämi oua usun chök chon ekis me chon siamü won. 24 Ei allük a fän iten unusen ewe fanü oua fanüeni, pwe oupwe mwütätä ngeni ätewe a amömöla fanü pwe epwe fanüenisefäli.

25 Iwe, are eman chon Israel a wöüngauala o amömöla eu kinikinin fanüan, eman fitukan epwe feito o mönisefäli mine pwin a amömöla. 26 Nge are esap wor eman fitukan epwe tongeni möni, püsin i a tongeni mönisefäli, lupwen a wor an tufich. 27 Iwe, epwe aleani ekewe ier seni ewe fansoun a amömöla ewe fanü o liwini ngeni ätewe a möni ewe fanü me mwan ükükün liwinin ekewe lusun ier tori ewe ierin supili. Mürin a tongeni fanüenisefäli fanüan. 28 Nge are esap naf liwinin pwe epwe mönisefäli fanüan, ätewe mi möni epwe chök fanüeni tori ewe ierin supili. Iwe, lon ewe ierin supili ätewe mi amömöla ewe fanü me mwan epwe fanüenisefäli fanüan.

29 Are eman aramas a amömöla imwan mi nom lon eu telinimw mi tit, a tongeni mönisefäli lon ünükün unusen eu ier mürin an amömöla. 30 Nge ika esap mönisefäli lon ükükün unusen eu ier, ätewe mi möni ewe imw mi nom lon ewe telinimw mi tit epwe imweni, i me mwirimwirin kana seni eu täppin aramas tori eu täppin. Iwe, lon ewe ierin supili ewe imw esap liwiniti mine kaimwan. 31 Nge ekewe imw mi nom lon sop resap tit repwe usun chök fanü. Iwe, aramas ra tongeni mönisefäliir, nge lon ewe ierin supili repwe liwiniti mine kaimwer. 32 Nge chon ewe ainangen Lefi ra tongeni mönisefäli imwer mi nom lon ar kewe telinimw fansoun meinisin. 33 Iwe, are eman chon ewe ainangen Lefi esap mönisefäli imwan, ewe imw a amömöla lon ar ewe telinimw epwe liwinsefäl ngeni lon ewe ierin supili. Pun ekewe imw mi nom lon ekewe telinimwen chon ewe ainangen Lefi wesewesen imwer lein ekewe aramasen Israel. 34 Nge ekewe fanü mi nom pwelin ünükün ar kewe telinimw resap fokun tongeni amömöla, pun ekei fanü fanüer tori feilfeilachök.

35 Are eman pwiüm chon Israel a wöüngauala pwe esap chüen wor püsin an tufich, en kopwe atufichi, usun ka atufichi eman chon ekis ika eman wasöla, pwe epwe tongeni nomomola reöm won ewe fanü. ✡Tut 15.7-8 36 Iwe, kosap angei manauen an liwinimang ngonuk. Nge kopwe niueiti om we Kot o mwüt ngeni pwiüm we chon Israel an epwe nonomola reöm won ewe fanü. 37 Kosap ngeni pwiüm we chon Israel noum moni pwe kopwe angei seni manauan, kosap pwal amömö ngeni anom mongö pwe kopwe angei winom ren. 38 Ei allük än ewe Samol mi Lapalap ämi we Kot mi emwenikemiiwu seni ewe fanü Isip, pwe epwe ngenikemi ewe fanü Kanaan, epwe pwal ämi Kot. ✡Eks 22.25; Tut 23.19-20

39 Are eman pwiüm chon Israel mi nom reöm a wöüngauala pwe a amömöla püsin inisin ngonuk, kosap anganga usun eman noum amanau. 40 Epwe nom reöm usun eman chon angang mi mö ika usun eman wasöla. Epwe angang ngonuk tori ewe ierin supili. 41 Mürin epwe feila senuk fiti nöün kana. Epwe liwiniti püsin an famili o liwinsefäliti fanüen saman. 42 Pun ekewe chon Israel nöün ewe Samol mi Lapalap chon angang i a emwenirewu seni ewe fanü Isip. Kosap amömömörela pwe aramas repwe nöüniir amanau. 43 Kosap nemeni pwiüm we chon Israel fän pöchökül, nge kopwe niueiti om we Kot. 44 Nge are oua mochen kamö mwän me fefin pwe oupwe nöüniir amanau, oua tongeni möniir seni ekewe mwü mi nom ünükümi. 45 Oua pwal tongeni kamö nöümi chon angang me lein ekewe chon ekis mi wasöla remi, chokewe mi uputiu lon fanüemi. Ikkei ir oua tongeni nöüniir amanau. 46 Iwe, oua tongeni eäniir amwirinimä ngeni nöümi kewe mwän pwe repwe nöüniir amanau tori ar mäla. Ikkei ir oua tongeni nöüniir amanau, nge pwimi kewe chon Israel ousap nemeniir fän pöchökül. ✡Eks 21.2-6; Tut 15.12-18

47 Are eman chon ekis ika eman wasöla mi nom reöm a pisekisekila, nge pwiüm we chon Israel a wöüngauala pwe a amömöla püsin inisin ngeni ewe chon ekis ika ngeni eman eterekesin ewe chon ekis, 48 eman epwe tongeni mönisefäli mürin an amömöla püsin inisin. Iwe, eman me lein pwin kana a tongeni mönisefäli. 49 Pwal pwin saman ika nöün pwin saman ika eman märärin seni an famili a tongeni mönisefäli. Nge are a pisekiseksefälila, a pwal tongeni püsin mönisefäli inisin. 50 Iwe, repwe pwüngüpwüngfengen i me ätewe mi möni o alea seni ewe ier a amömöla püsin inisin ngeni tori ewe ierin supili. Iwe, liwinin an epwe ngasala epwe aükük ngeni iteiten ekewe ier. Nge ränin an nonom ren ätewe mi nöüni amanau repwe usun chök ränin eman chon angang mi mö. 51 Are mi chüen wor chomong ier tori ewe ierin supili, ewe mi ngasala epwe mönätiu och kinikin mi watte me lon ewe moni, ewe eman mi nöüni amanau a püngütiu fän itan. 52 Nge are ra chokükün ekewe ier tori ewe ierin supili, repwe pwüngüpwüngfengen me ätewe mi möni. Pun ükükün ekewe ier a angang ngeni epwe pwal kisikisila ewe moni epwe mönätiu fän iten an epwe ngasala. 53 Iwe, epwe usun chök eman chon angang mi mö lon eu me eu ier. Ätewe mi nöüni amanau esap tongeni nemeni fän pöchökül. 54 Nge are esap mö lon ekei sokun lapalap, i me nöün kewe repwe ngasala lon ewe ierin supili. 55 Pun ekewe aramasen Israel ir nöün ewe Samol mi Lapalap chon angang. Ir nöün chon angang a emwenirewu seni ewe fanü Isip: I ewe Samol mi Lapalap ar Kot.