21
Än ewe fefin mi mä pwülüan asor
21.1-4
(Mark 12.41-44)
1 Iwe, Jesus a nenefeil o küna ekewe chon pisekisek ra püngülong ar asor lon ewe lenien asor me lon ewe imwenfel. 2 A pwal küna eman fefin mi wöüngau a mä pwülüan, a püngülong ruoföü kükün moni seni kapa. 3 Iwe, Jesus a üra, “Üpwe ürenikemi pwe än ei fefin mi wöüngau a mä pwülüan asor a watte seni än ekewe aramas meinisin. 4 Pun ir meinisin ra püngülong somwen wöür, nge neminei, seni an wöüngau a püngülong meinisin mine a wor ren, a fangala meinisin mine a manau seni.”
Jesus a afalafal usun talan ewe imwenfel
21.5-6
(Mat 24.1-2; Mark 13.1-2)
5 Iwe, ekoch me lein ekewe chon kaiö ra kapas usun ewe imwenfel, usun lingöchün ren ekewe fau mi mürina, pwal ren ekewe lifang aramas ra eäni asor ngeni Kot. Nge Jesus a apasa, 6 “Iei oua küna ekei mettoch meinisin. Nge epwe war ewe fansoun, lupwen esap fokun wor eföü fau epwe chüen nom lon lenian. Meinisin ekei fau repwe toropasetiu.”
Riaföü me ninni
21.7-19
(Mat 24.3-14; Mark 13.3-13)
7 Iwe, ekewe chon kaiö ra aisini Jesus, “Sense, inet ekei mettoch ka fos usun repwe fis? Meni asisil epwe pwärätä pwe a tori ewe fansoun an epwe fis ekei mettoch?” 8 Jesus a üreniir, “Oupwe mamasa, pwe esap wor eman epwe atupukemi. Chomong aramas repwe feito fän itei o apasa, ‘Ngang ewe Kraist,’ pwal ‘Ewe fansoun an epwe war a arap.’ Ousap tapwela mürir. 9 Ousap fokun niuokus lupwen oupwe rongorong pworausen maun me fitikoko. Ekei mettoch repwe akomwen fis, nge esap tori mwo fansoun sopolan.”
10 Mürin a pwal üreniir, “Ekewe fanü repwe fiufengen, ekewe mwü repwe maunfengen. 11 Epwe wor watten chechen fanü, pwal lengita me mätter ekis meinisin. Epwe pwal wor asisil mi watte o eniweniw seni fän läng. 12 Nge me mwen ekewe mettoch meinisin repwe fisitä, repwe turufikemi o ariaföüükemi, repwe etekinikemiila pwe oupwe kapwüng lon ekewe imwen felikis o atolongakemi lon imwen fötek. Repwe pwal emwenikemiila mwen ekewe king me kepina pokiten itei. 13 Ei fansoun epwe eu fansoun mi fich ngenikemi ämi oupwe apworausa ewe Pworaus Allim. 14 Iei mine oupwe anomu lon lelukemi pwe ousap öüreki me mwan mine oupwe apasa, 15 pun üpwe fang ngenikemi ekewe kapas me tipachem, pwe esap wor eman chon oputakemi epwe tongeni ü ngenikemi ika öpölüakemi. ✡Luk 12.11-12 16 Sememi mwo me inemi, pwimi, aramasemi me chiechiemi nge repwe afangamäkemi, nge ekoch leimi repwe ninnila. 17 Aramas meinisin repwe oputakemi pokitei. 18 Nge esap wor emet meten möküremi epwe turula. 19 Ren ämi likitü oupwe püsin amanauakemi.
Jesus a kapas usun talan Jerusalem
21.20-24
(Mat 24.15-21; Mark 13.14-19)
20 “Iwe, lupwen oupwe küna pwe sounfiu ra pwelifeili Jerusalem, mürin oupwe silei pwe a arapoto fansoun an epwe tala. 21 Mürin chokewe mi nom lon Jutea repwe sütä won ekewe chuk. Chokewe mi nom lon ewe telinimw repwe towu seni, nge chokewe mi nom lemäl resap tolong lon ewe telinimw. 22 Pun iei ekewe ränin apwüng, nge epwe popuetä meinisin mine a mak lon ekewe Toropwe mi Pin. ✡Os 9.7 23 Riaföün ekewe fefin mi pwopwo me ekewe inelap mi oupwu nöür lon ekewe rän, pun epwe wor riaföü mi lapalap lon ei fanü o än Kot song epwe tori ekei aramas. 24 Ekoch repwe ninnila ren ketilas, nge pwal ekoch repwe oola lon ekewe fanü meinisin. Iwe, ekewe chon lükün Israel repwe purätiu Jerusalem tori fansoun än chon lükün Israel nemenem a wes.
Liwinsefäliton Nöün Aramas
21.25-28
(Mat 24.29-31; Mark 13.24-27)
25 “Iwe, epwe wor ekoch lapalap epwe fis ngeni akkar, maram me fü kana. Nge won fanüfan chomong fanü repwe nom lon watten riaföü, repwe niuokus ren ngüngün matau me püngüpüngün no. ✡Ais 13.10; Is 32.7; Sow 2.31; Pwär 6.12-13 26 Aramas repwe masarochola ren ar niuokus, lupwen ra witiwiti mine epwe fis won fanüfan, pun ekewe manamanen läng repwe mwöküt seni lenier. 27 Lon ena fansoun repwe küna Nöün Aramas, epwe feito won kuchu fän manaman me ling mi lapalap. ✡Tan 7.13; Pwär 1.7 28 Lupwen ekei mettoch repwe popuetä le fis, ämi oupwe ütä o awenatä möküremi, pun ämi küna manau a arapoto.”
Ekewe kapasen kait seni ewe irä fiik
21.29-33
(Mat 24.32-35; Mark 13.28-31)
29 Iwe, mürin Jesus a apworausa ngeniir eu pworausen awewe: “Oupwe nenengeni ewe irä fiik me ekewe irä meinisin. 30 Lupwen oua küna pwe chör ra pwüküwu, oua silei pwe a arap fansoun räs. 31 Iei usun, lupwen oupwe küna pwe ekei mettoch repwe le fis, oupwe silei pwe Mwün Kot a arapoto. 32 Enlet, üpwe ürenikemi, pwe ei pilon aramas resap mäla tori an epwe fisitä ekei mettoch meinisin. 33 Läng me fanüfan repwe morola, nge ai kapas kana resap fokun morola.
Oupwe mamasa
21.34-38
34 “Oupwe afälikemi, pwe lelukemi esap chouchou ren mongömong me ünüpuch, pwal ren öürekin manauen ikenai, pwe ewe rän esap müttiritikemi usun eu sär. 35 Pun ewe rän Nöün Aramas epwe war lon, epwe tori aramas meinisin won unusen fanüfan. 36 Oupwe mamasa o iotek fansoun meinisin, pwe epwe wor ämi pöchökül pwe oupwe tongeni sü seni ekei mettoch meinisin lupwen repwe fisitä o oupwe tongeni ütä me mwen Nöün Aramas.”
37 Iwe, iteiten rän Jesus a afalafal lon imwenfel, nge lupwen a pwinila, a feila lükün ewe telinimw o pwinipwin won ewe Chukun Olif. ✡Luk 19.47 38 Iwe, lesosorusich ekewe aramas meinisin ra feito lon imwenfel, pwe repwe aüseling ngeni an afalafal.