9
Chon Israel ra föri ewe Pasofer
9.1-14
Iwe, lon aeuin maramen ewe aruuen ier mürin än chon Israel towu seni ewe fanü Isip, ewe Samol mi Lapalap a kapas ngeni Moses me lon ewe fanüapön Sinai, “Kopwe üreni ekewe aramasen Israel pwe repwe föri ewe Pasofer lon fansoun mi filitä. Lekuniolupwinin ewe engol me rüanün ränin ei maram repwe föri ewe Pasofer, repwe pwal föri pwüngün me allükün meinisin.” Iei mine Moses a üreni ekewe aramasen Israel pwe repwe föri ewe Pasofer. Iwe, lekuniolupwinin ewe engol me rüanün ränin ewe aeuin maram ra föri ewe Pasofer lon ewe fanüapön Sinai. Ekewe aramasen Israel ra föri meinisin mine ewe Samol mi Lapalap a allük ngeni Moses. Nge mi wor ekoch mwän ra limengau ren ar atapa eman somä, iei mine resap tongeni eti ewe pasofer lon ewe rän. Iwe, ra feito ren Moses me Aaron lon ewe ränin o üreniir, “Äm aia limengau ren äm atapa eman somä. Pwota äm aisap tongeni eäni ewe asor ngeni ewe Samol mi Lapalap fiti ekewe lusun aramasen Israel lon ewe fansoun mi filitä?” Iwe, Moses a üreniir, “Oupwe mwo ekis witiwit tori üpwe silei mine ewe Samol mi Lapalap epwe allük usumi.” Iwe, ewe Samol mi Lapalap a kapas ngeni Moses, 10 “Kopwe üreni ekewe aramasen Israel: Are eman mwän seni leimi ika seni mwirimwirimi kana a limengau ren an atapa eman somä ika a toau seni fanüan, ätewe epwe pwal tongeni föri ewe Pasofer ngeniei. 11 Ekei sokun aramas repwe tongeni föri ewe Pasofer lekuniolupwinin ewe engol me rüanün ränin ewe aruuen maram. Repwe ochoch ewe lamen Pasofer o mongö pilawa esap wor iis lon fiti chön irä mi kipwin. 12 Nge resap likiti och tori lesosor, resap pwal kupi efoch chün. Iwe, repwe chök föri pwüngün allükün ewe Pasofer meinisin. 13 Nge eman mwän mi limöch, esap pwal toau seni fanüan, are i esap mochen föri ewe Pasofer, epwe käriwu me lein aramasan, pun esap eäni ewe asor ngeniei lon ewe fansoun mi filitä. Iwe, ewe aramas epwe angei chappen an tipis. 14 Nge are eman chon ekis mi nom remi a mochen föri ewe pasofer ngeniei, epwe chök föri lon pwüngün me allükün ewe Pasofer. Iwe, epwe chök wor eu allük fän iten chon ekis me chon wilipos.”
Ewe kuchu asen ewe imwenfel seni mangaku
9.15-23
(Eks 40.34-38)
15 Iwe, lon ewe rän ewe imwenfel seni mangaku a kaütä, iei ewe ia ekewe allük ra nom ie, ewe kuchu a pwölüela. Nge seni lekuniol tori lesosor ewe kuchu asen ewe imwenfel seni mangaku a usun chök ekkei. 16 Iei usun a fis fansoun meinisin. Ewe kuchu a pwölüela ewe imwenfel seni mangaku lerän, nge lepwin a usun chök ekkei. 17 Iwe, iteiten fansoun, lupwen ewe kuchu a wiitä seni won ewe imwenfel seni mangaku, ekewe aramasen Israel ra sai. Nge ewe ia ewe kuchu a üla ie, ekewe aramasen Israel ra aüetä imwer. 18 Iwe, ekewe aramasen Israel ra sai fän än ewe Samol mi Lapalap allük, ra pwal aüetä imwer fän an allük. Ükükün fansoun än ewe kuchu nom asen ewe imwenfel seni mangaku, pwal iei ükükün fansoun ra nonom lon ewe leni. 19 Iwe, are ewe kuchu a nonomotam asen ewe imwenfel seni mangaku lon chomong rän, ekewe aramasen Israel resap sai, pun ra aleasochis ngeni ewe Samol mi Lapalap. 20 Lon ekoch fansoun ewe kuchu a nom asen ewe imwenfel seni mangaku ekoch chök rän. Iwe, fän än ewe Samol mi Lapalap allük ra nom lon ewe leni, nge fän an allük ra pwal sai. 21 Iwe, lon ekoch fansoun ewe kuchu a chök üla seni lekuniol tori lesosor. Nge lesosor, lupwen ewe kuchu a wiitä, ra sai. Ika mwo lerän ika lepwin, lupwen ewe kuchu a wiitä, ra sai. 22 Ese lifilifil are ewe kuchu a üla asen ewe imwenfel seni mangaku ruu rän ika eu maram ika eu ier, ekewe aramasen Israel ra chök nonom lon lenier, nge resap sai. Nge lupwen ewe kuchu a wiitä, ra chök sai. 23 Iwe, fän än ewe Samol mi Lapalap allük ra nonom lon lenier, nge fän an allük ra pwal sai. Ra chök aleasochis ngeni än ewe Samol mi Lapalap allük Moses a ngeniir.