1 Iwe, ewe Samol mi Lapalap a kapas ngeni Moses, 2 “Kopwe üreni ekewe aramasen Israel pwe repwe uwato engol me ruofoch wok, epwe efoch nge fän iten souemwenin eu me eu ar kewe ainang. Kopwe ruputi iten eman me eman won en me wokun. 3 Nge kopwe ruputi iten Aaron won wokun Lefi we. Epwe wor efoch wok fän iten eman me eman souemwenin eu me eu ainang. 4 Mürin, kopwe isenirelong lon ewe imw mangaku ia aramas ra churiei ie mwen ewe pworofel, ewe ia üa churuk ie. 5 Iwe, wokun ätewe üa filätä epwe fasar. Iei usun üpwe aükätiu än ekewe aramas lal ngonuk.” 6 Iwe, Moses a apworausa ngeni ekewe aramasen Israel ekei kapas. Iwe, nöür kewe souemwen ra ngeni Moses engol me ruofoch wok, efoch wok nge eman souemwenin ar kewe ainang. Nge wokun Aaron we a pwal nom leir. 7 Iwe, Moses a isenalong ekewe wok lon ewe imwenfel seni mangaku mwen än ewe Samol mi Lapalap we pworofel.

8 Iwe, sorotän ewe rän Moses a tolong lon ewe imwenfel seni mangaku. A küna wokun Aaron we fän iten ewe ainangen Lefi pwe a fasar, a et, a pwal wor pöön irä won o uani föün almont mi maaw. ✡Ipr 9.4 9 Mürin, Moses a uwawu ekewe wok seni mwen än ewe Samol mi Lapalap we pworofel o appii ngeni ekewe aramasen Israel meinisin. Iwe, ra küna mine a fis, nge eman me eman souemwen a angei wokun. 10 Iwe, ewe Samol mi Lapalap a üreni Moses, “Kopwe aliwinalong wokun Aaron we mwen ewe pworofel, pun epwe nom pwe eu asisilen fön ngeni ekewe chon ü ngeniei. Ren ei epwe wes ar lal ngeniei, pwe resap mäla.” 11 Iei usun Moses a föri mine ewe Samol mi Lapalap a allük ngeni.

12 Nge ekewe aramasen Israel ra üreni Moses, “Nengeni, äm aia rosola. Äm aipwe mäla, äm meinisin aipwe mäla. 13 Eman me eman mi kan ngeni än ewe Samol mi Lapalap imwenfel seni mangaku epwe mäla. Ifa usun, äm meinisin aipwe mäla?”