1 Iwe, Moses a üreni ekewe mwänirelan ainangen ekewe aramasen Israel, “Iei usun mine ewe Samol mi Lapalap a allük: 2 Are eman mwän a eäni eu pwon ngeni ewe Samol mi Lapalap, pwe epwe fang ngeni och, ika a akapel pwe epwe pölüküela och, ätei esap tongeni atai an pwon. Epwe chök apwönüetä meinisin mine a apasawu seni awan. ✡Tut 23.21-23; Mat 5.33 3 Nge are eman föpwül mi chüen nom lon imwen saman a eäni eu pwon ngeni ewe Samol mi Lapalap, pwe epwe fang ngeni och, ika a pwon pwe epwe pölüküela och, 4 are saman a rongorong an pwon me an akapel, nge esap apasa och ngeni, mürin ewe föpwül epwe föri meinisin mine a eäni pwon. 5 Nge are saman we esap tipeeu ngeni lon ewe rän, lupwen a rongorong usun, ewe föpwül esap wisen föri mine a eäni pwon. Iwe, ewe Samol mi Lapalap epwe amusala an tipis, pun saman we esap tipeeu ngeni. 6 Nge are neminewe epwe pwüpwülü, lupwen a chüen nom fän an pwon ika fän mine a awakai won, 7 are pwülüan epwe rong usun, nge esap apasa och ngeni lon ewe ränin, mürin ewe föpwül epwe föri meinisin mine a eäni pwon. 8 Iwe, are pwülüan we esap tipeeu ngeni lon ewe rän, lupwen a rongorong usun, epwe atai än ewe fefin pwon, pwal mine a awakai won. Iwe, ewe Samol mi Lapalap epwe amusala an tipis. 9 Nge eman fefin mi mä pwülüan ika eman mi mwü seni pwülüan epwe fokun apwönüetä an kewe pwon meinisin. 10 Iwe, are eman fefin a eäni eu pwon me lon imwen pwülüan, ika a pwon pwe epwe pölüküela och, 11 are pwülüan a rongorong, nge esap apasa och, esap pwal pälüeni, mürin ewe fefin epwe fokun apwönüetä an kewe pwon meinisin. 12 Nge are pwülüan a atai ekewe pwon lon ewe rän, lupwen a rongorong usun, meinisin mine ewe fefin a apasawu fän iten an kewe pwon pwal fän iten an akapel esap wisen apwönüetä. Iwe, pwülüan a atai ekewe pwon, nge ewe Samol mi Lapalap epwe amusala än ewe fefin tipis. 13 Iteiten pwon me iteiten akapel eman fefin a eäni, pwülüan a tongeni anüküchara ika atai. 14 Nge are pwülüen ewe fefin esap apasa och ngeni lon ekoch rän, mürin a anüküchara än ewe fefin we pwon me an we akapel meinisin ra nom won. Pwülüan we a anüküchareer, pun esap apasa och ngeni lon ewe rän, lupwen a rongorong usun. 15 Nge are a ataar ekoch fansoun mürin an rong usur, epwe mwärelong fän än neminewe tipis.” 16 Ikkei ekewe allükün pwon ewe Samol mi Lapalap a allük ngeni Moses usun lefilen eman mwän me pwülüan, pwal usun lefilen eman sam me nöün föpwül, lupwen a chüen nom lon imwen saman.