Än Salomon Fos (Proferpis)
Kapas akom
I. Iten ei puk: Än Salomon Fos, pun mine a mak lon, än Salomon kewe mwiitun. Wewen Proferpis mwiitun.
II. Chon makei ei puk: Salomon a makei arapakan unusen ei puk. Sopun 30 makeen Akur, nge sopun 31 makeen Lemuel.
III. Itelapemongen ei puk: Ach niuokusiti ewe Samol mi Lapalap iei pupun silelap (1.7).
IV. Kapas aüchean ei puk: Kapasen öüröür seni läng fän iten ach manau won fanüfan.
V. Masouen ei puk Än Salomon Fos: Lon ei puk a chufengen sokopaten kapasen kait, pwe aramas repwe tongeni alefila lefilen mine a pwüng me mine a pwüngingau, pwal kapasen kait fän iten lamalam. Ekei kapas ra towu lon ititin fosun mwiitun. Chomong ekei mwiitun ra fos usun manauen aramas won ei fanüfan. Lepoputän a achema ngenikich pwe ach niuokusiti ewe Samol mi Lapalap iei popun silelap. Mürin a kapas usun mirit me manauöch lon pekin aramas, nge sap chök lon pekin lamalam. Ekei chomong mwiitun mi mochomoch ra pwärätä usun mine ekewe chon Israel me lom ra aiti ngeni ekewe aramas mine eman mi mirit epwe föri lon ekoch sokun lapalap. Ekoch mwiitun ra fos usun pwüngün lefilen chon eu famili, nge ekoch usun pwüngün chon amömö. Ekoch mwiitun ra fos usun än aramas repwe süfölfengen, nge pwal ekoch ra fos usun aüchean än eman epwe püsin nemeni inisin. Chomong me leir ra kapas usun aüchean tipetekison, mosonotam, meniniti ekewe mi wöüngau me allükülük lon chiechifengen.
VI. Tettelin masouen ei puk:
Kapasen mwareiti tipachem 1.1–9.18
Än Salomon kewe mwiitun 10.1–29.27
Än Akur kewe kapas 30.1-33
Än Lemuel kapas me sokopaten mwiitun 31.1-31
1
Aüchean fosun ekewe mwiitun
1.1-7
1 Ikkei ekewe fos Salomon nöün Tafit we mwän ewe kingen Israel a eäni mwiitun: ✡1.King 4.32 2 Ren ekei mwiitun aramas repwe tipachem o silei öüröürer, repwe weweiti ekewe kapas mi alolol, 3 repwe angei öüröürer seniir pwe repwe mirititi mine repwe föri, repwe eäni pwüng, let o wenechar. 4 Iwe, mirit epwe tori chokewe mi wewemang, nge silelap me mirit epwe tori ekewe säräfö. 5 Ekewe chon tipachem repwe rongorong ngeniir pwe repwe fefeitä lon ar sile, nge ekewe chon silelap repwe weweöch, 6 pwe repwe weweiti ekewe mwiitun me ekewe pworausen awewe, repwe pwal weweiti än ekewe chon tipachem kapas me ar kewe fos monomon.
7 Ach niuokusiti ewe Samol mi Lapalap iei popun silelap. Nge ekewe chon tiparoch ra oput tipachem me ekewe kapasen öüröür. ✡Hiop 28.28; Kölf 111.10; SalF 9.10
Ekewe kapasen fön me amirit
1.8-19
8 Nei kopwe aüselinga än semom kewe kapasen öüröür, nge kosap aleasolap ngeni mine inom a aiti ngonuk. 9 Ekewe kapas repwe aöchü manauom usun chök epa mwärämwär won mökürom, ika epa mwärämwär fän üom epwe alingöchü inisum. 10 Nei, are ekewe chon tipis ra atupuk, kosap tipeeu ngeniir. 11 Are repwe apasa, “Kopwe etikem, ousipwe op lon eu lenien op pwe sipwe niela aramas. Ousipwe rawangauei chokewe esap wor ar mwäl. 12 Ousipwe oromanauerela usun ewe lenien sotup a oromala aramas pwe repwe usun chokewe mi feitiu lon peias. 13 Sipwe küna chomong sokopaten pisek mi aüchea, sipwe amasoua imwach ren liapach. 14 Kopwe etikem, nge sipwe inetöchfengen won mine sa soläni.” 15 Nei, kosap chiechi ngeni ei sokun aramas, kosap etiir lon ar föför. 16 Pun ra pwapwaiti le föri föför mi ngau, ra müttir ngeni nimanauei aramas. 17 A solap om kopwe oletala eu cheew pwe kopwe liapeni eman machang, ngei mi küna. 18 Nge ekei mwän ra chök op lon lenien op pwe repwe püsin atoto feiengau wor, ra rawangauei püsin manauer. 19 Ei epwe fis ngeni chokewe meinisin ra angei ar win ren angangen mwänewüs. Ei sokun win a angeala manauen ätewe mi föri ei sokun föför.
Än tipachem kökkö
1.20-33
20 Tipachem a osomong le kökkö lon ewe al, a alapatä mwelian lon ekewe lenien amwicheich, 21 a köwu seni lepwokukun ekewe al, a kapas seni lon ekewe asamalapen ewe telinimw, ✡SalF 8.1-3 22 “Ämi chon wewemang, ifa ükükün fansoun ämi oupwe efich le nonom lon ämi wewemang? Ämi chon turunufas, ifa ükükün fansoun ämi oupwe pwapwaiti ämi turunufas? Ämi chon tiparoch, ifa ükükün fansoun ämi oupwe oput silelap? 23 Are oupwe aüselinga ai kewe kapasen fön, ngang üpwe pwärätä ngenikemi ai ekiek, üpwe asile ngenikemi ai kewe kapas. 24 Üa fen körikemi, nge ousap mochen aüseling, üa äkänipökemi, nge ousap afäli. 25 Oua asarongorong ngeni ai kewe kapasen öüröür meinisin, nge ousap ekieki ai kewe kapasen fön. 26 Iei mine üpwe takirikemi, lupwen oupwe tolong lon feiengau. Üpwe takirin ämängauakemi, lupwen niuokus watte epwe torikemi, 27 lupwen niuokus watte epwe torikemi usun eu mölümöl, nge ämi feiengau epwe torikemi usun eu ewiniär, lupwen oupwe tolong lon weires me riaföü. 28 Mürin, oupwe kökköriei, nge ngang üsap pälüenikemi, oupwe tiliken le küttaei, nge ousap künaei. 29 Pokiten oua oput silelap, nge ousap mochen aleasochisi ewe Samol mi Lapalap, 30 ousap pwal mochen angei ai kewe kapasen öüröür, nge oua oput ai kewe kapasen fön meinisin, 31 iei mine oupwe kini uän ämi föför, oupwe notä ren mine oua püsin ekiekietä. 32 Pun ekewe chon wewemang repwe mäla ren ar kul seniei, nge ekewe chon tiparoch repwe feiengau ren püsin ar tümwününgau. 33 Nge eman mi aüselingaei epwe manau fän kinamwe, esap öürek, esap pwal niueiti och feiengau.”