Ikkei ekewe fos Salomon a eäni mwiitun. 1 Eman alüal mi tipachem a apwapwai saman, nge eman alüal mi tiparoch a atoto letipeta won inan. 2 Eman mi wöümong pokiten an angangen atuputup esap feiöch ren, nge pwüngüöch a amanaua eman aramas seni mäla. 3 Ewe Samol mi Lapalap esap mwüt ngeni ekewe chon pwüng pwe repwe echik, nge a alichipüngü ekewe aramasangau pwe resap angei mine ra mwäräkichiti. 4 Eman mi chipwang epwe wöüngau, nge eman mi achocho le angang epwe wöümong. 5 Eman mwän mi mirit a ionifengeni uän an tanipi lupwen fansoun räs, nge eman mwän mi annut lupwen fansoun kinikin epwe säw. 6 Feiöch a tori eman chon pwüng, nge än eman aramasangau kapas a pwärätä an mwänewüs. 7 Aramas ra chechemeni eman chon pwüng, pun i popun ar feiöch, nge repwe manlükala iten eman aramasangau. 8 Eman mi tipachem a etiwa kapasen öüröür, nge eman mi kapaspat lon an tiparoch epwe küna feiengau. 9 Eman aramas mi wenechar epwe manau fän kinamwe, nge eman mi rikirik epwe pwäpwäla an föför, epwe pwal angei chappan. 10 Eman mi ächiki mesan a afisätä osukosuk, nge eman mi pwora le apwüngü mine a ngau a afisätä kinamwe. 11 Än eman chon pwüng kapas eu puächen kolukun manau, nge än eman aramasangau kapas a pwärätä an mwänewüs. 12 Oput a afisätä anini, nge tong a pwölüela ekewe pupungau meinisin. ✡Jas 5.20; 1.Pet 4.8 13 Eman mi silelap a apasawu kapasen tipachem, nge eman mi tiparoch epwe küna apwüng fän wichiwich. 14 Ekewe mwän mi tipachem ra akangei chök silelap, nge än eman chon tiparoch kapas a akanato feiengau. 15 Än ekewe chon pisekisek wöümong iei ar leni mi pöchökül, nge än ekewe chon mwelele wöüngau iei ar feiengau. 16 Liwinin än ekewe chon pwüng angang epwe atoto ngeniir manau, nge winnen ekewe aramasangau a atoto ngeniir apwüng. 17 Eman mi aleasochisi ekewe kapasen fön epwe manau, nge eman mi pöütala ekewe kapasen emirit epwe tolong lon feiengau. 18 Eman mi aopala an oput i eman chon chofana, nge eman mi luapas i eman chon tiparoch. 19 Anaie a wor chomong kapas ie, a pwal tongeni fis tipis, nge eman mi fanafanala a mirit. 20 Än eman chon pwüng kapas a usun silifer mi mürina, nge än eman aramasangau ekiek esap wor aüchean. 21 Än eman chon pwüng kapas a afeiöchü chomong, nge eman chon tiparoch a mäla, pun esap wor an mirit. 22 Feiöch seni ewe Samol mi Lapalap a awöüükich, nge i esap apacha och riaföü ngeni. 23 Eman chon tiparoch a pwapwa are a föri mine a mwäl, nge eman mwän mi weweöch a pwapwa ren an tipachem. 24 Mine eman aramasangau a niueiti epwe fis ngeni, nge mine eman chon pwüng a aläläei epwe tori. 25 Wesin än ewe mölümöl enito, ekewe aramasangau resap chüen nom, nge ekewe chon pwüng ra nüküchar tori feilfeilachök. 26 Usun finikar a amwona ngich, nge ötüöt a aweiresi mesach, iei usun eman chon chipwang a aweiresi ätewe mi akünöü. 27 Ach niokusiti ewe Samol mi Lapalap a alangatama manauach, nge ierin manauen ekewe aramasangau epwe mochomoch. 28 Än eman chon pwüng apilükülüköch a sopolong lon pwapwa, nge mine eman aramasangau a witiwiti esap fis. 29 Ewe Samol mi lapalap a tümwünüöchü chokewe mi wenechar, nge a afeiengaua ekewe chon föföringau. 30 Eman chon pwüng esap fokun mwöküt seni lenian, nge eman aramasangau esap nonometiu lon ewe fanü. 31 Kapasen tipachem ra towu seni awen eman chon pwüng, nge chönawen eman chon atuputup epwe üttüwu. 32 Eman chon pwüng a silei mine epwe eäni fos mürina, nge eman aramasangau a chök silei kapas mi aweiresi letipen aramas.