1 Sno esap öchiti lon fansoun pwichikar, ika püngün üt esap öchiti lon fansoun kinikin, iei usun iteüöch esap öchiti eman chon tiparoch. 2 Usun eman nichok ika eman ekiek ra äkkäs, iei usun ekewe kapasen anümamau repwe ässila senuk, are kosap tipis. 3 Epwe wor efoch wichiwich seni silin man mi ken fän iten eman oris, efoch mächä fän iten lon awen eman aas, pwal efoch wokun wichiwich fän iten lükisökürün ekewe chon tiparoch. 4 Kosap pälüeni eman chon tiparoch lon fosun umwes, pwe kosap wewe ngeni lon an tiparoch. 5 Nge kopwe pälüeni eman chon tiparoch lon ükükün an tiparoch, pwe esap ekieki pwe a tipachem. 6 Eman mi tinngeni eman chon tiparoch eu pworaus a usun chök pwe a püsin pökü pechen o atolonga lon feiengau. 7 Eu fosun mwiitun seni lon awen eman chon tiparoch a usun chök eman mi mä pechen, esap wor lomotan. 8 Eman mi asamolu eman chon tiparoch a wewe ngeni eman mi rietä eföü fau ngeni an aülün. 9 Eman chon tiparoch mi eäni eu fosun mwiitun a usun chök eman chon sakau a weires le üttawu efoch fölün irä lon pöün. 10 Eman aramas mi möni eman chon tiparoch ika eman chon sakau pwe epwe angang ngeni a usun chök eman chon likapich mi akinasa meinisin mi pwerela ünükün. 11 Eman chon tiparoch mi liwiniti an föförün tiparoch a usun chök eman kolak mi enisefäli musan. ✡2.Pet 2.22 12 Ka küna eman mwän mi ikeetä pwe a tipachem? A wor watten apilükülük fän iten eman chon tiparoch lap seni ätewe mi püsin ikeetä. 13 Eman chon chipwang a apasa, “Mi wor eman laion won ewe al, mi wor eman laion mi rochongau won ekewe alelap.” 14 Usun eu asam a kul won insesin, iei usun eman chon chipwang a kul won an peet. 15 Mi wor aramas ra kon chipwang, ra atolonga pöür lon eu sepien mongö, ra mwo nge chipwang ar repwe uwalong ewe mongö lon awer. 16 Eman chon chipwang a püsin ikeetä pwe a tipachem lap seni füman aramas mi tongeni pälüeni kapas ais fän mirit. 17 Eman mi fosolong lon eu anini, nge esap fän itan, a usun chök eman mi fetal won al o turufi selingen eman kolak. 18 Eman mi atupu chon arun, mürin a apasa pwe a chök urumot, 19 a usun chök eman mi fokun umwes, a urumot won pisekin afeiengau. 20 Are esap wor mwüchün eu ekkei, ewe ekkei a kunula. Nge are esap wor eman mi luapas, anini a ükütiu. 21 Usun mooch a sarara me amwüch a angetengeta ekkei, iei usun eman mwän mi souanini a afisätä fitikoko. 22 Än eman chon luapas kapas ra usun chök mongö mi annö, ra tolong leutun eman aramas. 23 Kapasen tinaw mi motoutou me eu leluk mi ngau ra usun chök motoutoun me misin lükün eu sepi mi för seni pwül. 24 Eman mi oput aramas a eäni kapasen amichimich o amwöchü ekiekin atuputup lon lelukan. 25 Lupwen a eäni kapasöch ngonuk, kosap lükü, pun lelukan a urela ren ekiek mi anioput. 26 Inamwo ika an oput aramas a pwölüla ren an kapas atuputup, nge an föför mi ngau epwe pwäla lein aramas meinisin. 27 Eman mi tuw eu pwang epwe püsin turutiu lon. Nge eman mi amwökütükütü eföü fau, ewe fau epwe püsin söküniti. 28 Eman mi eäni kapas chofana a oput chokewe a ariaföüür, nge kapas motoutou ra chök afisätä feiengau.