36
Än Kot tong ellet
36.1-12
Ngeni ewe mi emweni chon köl: Echö köl än Tafit nöün ewe Samol mi Lapalap chon angang.
1 Tipis a nom lon leluken eman aramasangau o kapas ngeni.
Esap wor an meniniti Kot. ✡Rom 3.18
2 A lamalamtekia won inisin o ekieki
pwe Kot esap tongeni küna o oput an tipis.
3 An kewe kapas ra mwäl me chofana.
Esap chüen föri föför mi mirit me mürina.
4 Lupwen a kon won an peet, a ekiekietä mine a ngau.
Esap mwo nge föri mine a mürina,
esap pwal oput mine a ngau.
5 Ai Samol mi Lapalap, om tong ellet a tori ekewe läng,
om allükülük a tori ekewe kuchu.
6 Om pwüng a tekia usun chök ekewe chuk,
nge om kapwüng a usun chök matau mi alolol.
Ai Samol mi Lapalap, ka tümwünü aramas me man.
7 Ai Kot, om tong ellet a fokun aüchea.
Aramas meinisin ra op fän nürün poum.
8 Ra kametip won somwen mongö lon imwom.
Ka aünüür koluk seni ewe chanpupun om pwapwa.
9 Pun en ewe lepopun manau meinisin,
nge ren om saram äm aia küna saram.
10 Kose mochen kopwe sopwela om tong ellet ngeni chokewe mi sileek,
kopwe pwal sopwela om amanaua chokewe mi wenechar leluker.
11 Kosap mwüt ngeni ekewe chon lamalamtekia pwe repwe afeiengauaei.
Kosap pwal mwüt ngeni ekewe aramasangau pwe repwe asüeila.
12 Nengeni ia ekewe chon föföringau ra turutiu ie.
Ikenan ra konola, nge resap chüen tongeni pwätäsefäl.