48
Öchün me lingen Sion
48.1-14
Echö köl än nöün Kora kewe mwän.
Ewe Samol mi Lapalap a tekia, nge aramas meinisin repwe fokun mwareiti i
me lon ewe telinimwen ach Kot,
me won chukun mi pin.
Ewe chuk Sion a tekia o fokun lingöch,
chon fanüfan meinisin ra pwapwaiti.
Lepekin ewe chuk kükü ngeni efeng a nom telinimwen ewe king mi lap. Mat 5.35
Kot a nom lon ekewe imwen king.
A pwärätä pwe i ewe lenien op mi pöchökül.
 
Ekewe king ra mwichefengen,
ra mwinepöküto le feito pwe repwe maun ngeni ewe telinimw.
Nge lon ewe otun, lupwen ra küna ewe telinimw, ra weitifengeniir,
ra niuokus o süla.
Ikenan niuokus a toriir, cheuch a cheriir
usun eman fefin a tori an cheuchen famw.
Ka aroserela usun asepwälin ötiu a ataela ekewe sipen Tarsis.
Usun mine sa rongorong,
iei usun sa pwal küna me lon ewe telinimwen ewe Samol mi Unusen Manaman,
me lon ewe telinimwen ach Kot.
I a anüküchara ewe telinimw tori feilfeilachök.
 
Ai Kot, äm aia ekieki usun om we tong ellet
me lon ewe imwenfel.
10 Ai Kot, usun aramas won unusen fanüfan ra silei itom,
iei usun ra pwal mwareituk.
Ka nemenem fän pwüng.
11 Ekewe aramasen Sion repwe pwapwa.
Ekewe telinimwen Juta repwe mweireir
pokiten ka eäni kapwüng fän pwüng.
 
12 Ämi aramasen Kot, oupwe fetalfeil lon Sion o pwelifeili,
oupwe aleani ekewe imw tekia lon.
13 Oupwe nenengenöchü tittin mi pöchökül o katolfeil ekewe imwen king,
pwe oupwe tongeni apworausa ngeni ekewe pilon aramas repwe feito,
14 “Iei i Kot, ach Kot tori feilfeilachök.
I epwe emwenikich tori feilfeilachök.”

48:2: Mat 5.35