51
Eu iotekin tüngor amusamusen tipis
51.1-19
(2.Sam 12.1-15)
Ngeni ewe mi emweni chon köl: Echö än Tafit köl, lupwen ewe soufos Natan a feito ren mürin än Tafit kon ren Patsipa.
1 Ai Kot, kopwe kirikiröch ngeniei lon om tong ellet,
kopwe amoela ai pupungau
lon om ümöümöch mi lapalap.
2 Kopwe fokun talü seniei ai föföringau
o limetiei seni ai tipis.
3 Pun üa mefi ai pupungau,
nge ai tipis a nonom fochofoch fän mesei.
4 Üa tipis ngonuk, fokun ngonuk echök,
o föri mine a ngau me fän mesom.
Iei mine a pwüng om kopwe apwüngüei,
esap pwal wor om mwäl, lupwen ka eäni kapwüng. ✡Rom 3.4
5 Ellet ngang eman chon tipis seni ai uputiu.
Ngang üa uren tipis seni ewe fansoun inei a nöünieitiu.
6 Ellet, ka pwapwaäsini letip wenechar.
Kopwe aiti ngeniei ewe tipachem mi monomon.
7 Kopwe limetiei ren ülün ewe irä isop pwe üpwe limöch,
kopwe talü seniei ai tipis pwe üpwe pwech seni snow.
8 Kopwe mwüt ngeniei pwe üpwe rongorong mweireiren pwapwa me meseik.
Kopwe pwal mwüt ngeniei ai üpwe pwapwa,
inamwo ika ka kupi chüi.
9 Kosap nenengeni ai kewe tipis, nge kopwe amoela ai föföringau meinisin.
10 Ai Kot, kopwe föri loi eu leluk mi limöch
o fangelong loi eu ngün mi fö o pos.
11 Kosap asüeila seni fän mesom,
kosap pwal angei seniei Ngünum mi pin.
12 Kopwe aliwinisefäli ngeniei ewe pwapwa mi nom rei, lupwen ka amanauaei,
kopwe atufichiei pwe üpwe aleasochis ngonuk.
13 Mürin üpwe aiti ngeni ekewe chon tipis om kewe allük.
Iwe, ir repwe kulituk.
14 Ai Kot, kopwe angasaeila seni mäla,
en Kot ai Chon Amanau.
Üpwe pwapwa le köl usun om pwüng.
15 Ai Samol, kopwe amwelieliaei
pwe üpwe mwareituk.
16 Pun en kosap efich asor, ika ngang üpwe uwato reöm.
En kosap pwapwa ren asoren kek.
17 Ai Kot, üa asor ngonuk eu letip mi tipetekison,
eu leluk mi tipetekison o liamam, en kosap oput.
18 Ai Kot, kopwe kirikiröch ngeni Sion fän pwapwan letipom.
Kopwe aüsefälietä tittin Jerusalem.
19 Mürin kopwe pwapwa ren ekewe asor mi fis fän pwüng,
pwal ren äm kewe asoren kek.
Mürin, ekewe ätemwänin kow repwe kekila won om rongen asor.