88
Eu iotekin tüngor ngasala seni mäla
88.1-18
Echö köl än nöün Kora kewe mwän. Ngeni ewe mi emweni chon köl Ei köl usun ngingin ewe sokun köl mi mang. Echö kölün kait än Heman eman mwirimwirin Esra.
1 Ai Samol mi Lapalap, ai Kot mi amanauaei lerän me lepwin,
üa siö ngonuk pwe kopwe alisiei.
2 Amwo kopwe etiwa ai iotek,
kopwe aüselinga ngeni ai siö.
3 Pun chomong riaföü ra toriei,
pwe üa arap ngeni ai üpwe mäla.
4 Üa alealong lein chokewe mi tolong lon peias.
Ngang eman mwän esap wor ai pöchökül.
5 Üa usun eman mi pöütüla me lein ekewe somä,
usun ekewe mi ninnila ra kon lon peias,
pwal usun chokewe en kosap chüen chechemeniir,
pun ka ärirewu seni om tütümwün.
6 Ka aturueilong epin ewe peias,
lon ewe leni mi rochopwak o alolol.
7 Om lingeringer a chouitiei,
üa pwölüla fan usun chök ai pwölüla fän no.
8 Ka föri pwe chiechiei kewe ra likitieila.
Ka föri pwe ngang och mettoch mi anioput me rer,
üa mwöchülong lon fötek pwe üsap tongeni süla.
9 Mesei ra toputopula ren ai riaföü.
Iteiten rän üa kökköruk, ai Samol mi Lapalap,
üa aitietä pei ngonuk lon ai iotek.
10 Ifa usun, en ka föri manaman fän iten sotup?
Ifa usun, ir repwe tongeni ütä o mwareituk?
11 Ifa usun, repwe apworausa om we tong ellet me lon peias,
ika om allükülük me lon ewe leni mi ta?
12 Ifa usun, ra silei usun om kewe manaman me lon lenien rochopwak,
ika usun om kewe föförün pwüng me lon fanüen chokewe mi manlüküla?
13 Nge ngang, ai Samol mi Lapalap, üa siö ngonuk,
iteiten lesosor üa iotek ngonuk.
14 Ai Samol mi Lapalap, pwota ka pöütieila,
pwota ka aopa mesom seniei?
15 Üa apwangapwang o kan ngeni mäla seni lesäräföi,
üa riaföü ren om kewe eniweniw o apilükingau.
16 Om lingeringer a pwölüeila,
om kewe eniweniw ra afeiengauwaei.
17 Ra pwelifeiliei usun no iteiten rän,
ra pweliei o rongeila.
18 Ka föri pwe atongeei me chienei ra likitieila,
nge rochopwak chiechiei we mi fokun kan ngeniei.