94
Eu iotek pwe Kot epwe liwini ngeni ekewe aramasangau chappen ar föföringau
94.1-23
1 Ai Samol mi Lapalap, en ewe Kot mi ngeni aramas chappen ar föföringau,
en ewe Kot mi ngeni aramas chappen ar föföringau, kopwe pwärukela.
2 En soukapwüngün fanüfan,
kopwe ütä o liwini ngeni ekewe chon lamalamtekia ükükün ar föför.
3 Ai Samol mi Lapalap, ifa ükükün fansoun än ekewe aramasangau repwe tunosikesik?
4 Ekewe chon föföringau meinisin ra atowu kapasen lamalamtekia,
ra aingaing won ar föför mi ngau.
5 Ai Samol mi Lapalap, ra atatakisi noum kewe aramas
o ariaföüü noum kana.
6 Ra niela ekewe fefin mi mä pwülüer me ekewe chon ekis
o nimanauei ekewe mi mäsen.
7 Iwe, ra apasa, “Ewe Samol mi Lapalap esap küna,
ewe Koten Israel esap silei.”
8 Ämi mi fokun tipate me lein ekewe aramas, oupwe weweöch.
Ämi mi tiparoch, inet oupwe tipachemela?
9 Ifa usun, ewe mi förätä seling, esap püsin rongorong?
Ifa usun, ewe mi föri mas, esap püsin küna?
10 Ifa usun, ewe mi apwüngü chon ekewe mwü esap pwal apwüngüür?
Ifa usun, ewe chon kait ngeni aramas esap silelap?
11 Ewe Samol mi Lapalap a silei ekiekin aramas,
a silei pwe ra pön chök. ✡1.Kor 3.20
12 Ai Samol mi Lapalap, a feiöch ewe mwän en ka amiriti,
ätewe ka aiti ngeni om allük.
13 Kopwe angasa seni an kewe riaföü,
tori eu pwang a tu fän iten ekewe aramasangau.
14 Iwe, ewe Samol mi Lapalap esap likitala nöün aramas,
esap pwal pöütala chokewe a nöüniir.
15 Angangen kapwüng epwe longolongsefäl won pwüng,
nge meinisin mi wenechar lon leluker repwe tipeeu ngeni.
16 Iö epwe ütä fän itei o ü ngeni ekewe aramasangau?
Iö epwe nom won peki o ü ngeni ekewe chon föföringau?
17 Are ewe Samol mi Lapalap esap alisiei,
ngang üpwe müttir feila lon lenien sotup.
18 Lupwen üa apasa, “Üpwe turula,”
om tong ellet a amwöchüei, ai Samol mi Lapalap.
19 Lupwen a wor chomong ai öürek,
en ka achipaei o apwapwai lelukei.
20 En kosap fokun tipeeu ngeni ekewe soukapwüng mi ngau,
chokewe mi föri mine a pwüngingau, nge ra aita ngeni pwe iei pwüngün allük.
21 Ra chufengen pwe repwe rawangauei ekewe chon pwüng
o atipisi chokewe esap wor ar tipis, pwe repwe mäla.
22 Nge ewe Samol mi Lapalap i imwei imwen maun,
i ai Kot, ewe achau üa op fan.
23 I epwe liwini ngeniir liwinin ar tipis
o aroserela pokiten ar föföringau.
Ewe Samol mi Lapalap ach Kot epwe aroserela.