101
Eu pwon usun manau fän pwüng
101.1-8
Echö än Tafit Köl.
Üpwe köl usun allükülük me pwüng.
Üpwe köl ngonuk, ai Samol mi Lapalap.
Üpwe afäliei pwe üsap föri tipis.
Inet kopwe feito rei?
Üpwe manaueni eu manau mi limöch me lein chon leimwei.
 
Üsap anomu ai ekiek won mettoch mi ngau.
Üa oput föförün ekewe chon tipis.
Ar föför esap fokun fitipacheitiei.
Eman mi ulöförea lelukan epwe toau seniei.
Üsap fokun efich föför mi ngau.
Eman mi aitengaua chon arun lemonomon
üpwe niela.
Eman aramas mi wolamalamtekia o sikesik
üsap etiwa.
Üpwe filätä chokewe mi allükülük lon ewe fanü
pwe repwe nom rei.
Chokewe mi fokun wenechar
repwe angang ngeniei.
 
Esap wor eman mi föri föförün atuputup epwe nom lon imwei,
nge eman mi kapas chofana esap tongeni nonom fän mesei.
Iteiten lesosor üpwe niela
ekewe aramasangau lon ewe fanü,
üpwe ärala meinisin mi föri mine a ngau
me lon telinimwen ewe Samol mi Lapalap.