1 Ngüni, kopwe mwareiti ewe Samol mi Lapalap,

leuti meinisin, kopwe mwareiti itan mi pin.

2 Ngüni, kopwe mwareiti ewe Samol mi Lapalap,

kosap manlükala an kirikiröch ngonuk.

3 A amusala ai tipis meinisin

o amoela ai apwangapwang meinisin,

4 a angasaei seni peias

o ämwärämwära ngeniei tong ellet me ümöümöch,

5 a amasoua manauei ren mettoch mi mürina,

pwe üpwe liwiniti pöchökülen le säräföi usun eman ikel.

6 Ewe Samol mi Lapalap a pwüng lon an föför,

a eäni kapwüng fän pwüng ngeni chokewe meinisin mi küna riaföü.

7 A pwäri ngeni Moses an kewe akot

o aküna ngeni ekewe aramasen Israel an kewe föför.

8 Ewe Samol mi Lapalap a lukpwetete o kirikiröch,

a songomang o wöün tong ellet. ✡Jas 5.11

9 Esap apwüngü aramas fansoun meinisin,

esap pwal amwöchü an song tori feilfeilachök.

10 Esap föri ngenikich ükükün ach tipis,

esap pwal liwini ngenikich ükükün ach föföringau.

11 Pun usun ekewe läng ra tekia seni fanüfan,

iei usun an we tong ellet a tekia ngeni chokewe mi niuokusiti i.

12 Pun usun meserän a toau seni epilen,

iei usun a atoauala ach pupungau senikich.

13 Usun eman sam a tongei nöün kana,

iei usun ewe Samol mi Lapalap a tongei chokewe mi niuokusiti i.

14 Pun a silei sokosokuch,

a chemeni pwe kich pwül echök.

15 Iwe, ränin manauen aramas a wewe ngeni fetil,

a sol usun epö pöön irän lemäl.

16 Are asepwäl a eniti, a ässala,

nge esap chüen wor eman epwe künasefäli.

17 Nge än ewe Samol mi Lapalap tong ellet a nom seni me lomlom tori feilfeilachök won chokewe mi niuokusiti i,

nge an pwüng a tori nöür me nöün nöür,

18 ir chokewe mi apwönüetä an we pwon

o chechemeni ar repwe aleasochisi an kewe allük.

19 Iwe, ewe Samol mi Lapalap a anüküchara an lenien motun king me lon ekewe läng,

mwün a nemeni unusen fanüfan.

20 Oupwe mwareiti ewe Samol mi Lapalap, ämi nöün chon läng kana,

ämi mi pwora o aleasochisi an kapas,

ämi mi aüselinga alon.

21 Oupwe mwareiti ewe Samol mi Lapalap, ämi chon an kewe mwich meinisin lon läng,

ämi nöün kewe chon angang mi föri letipan.

22 Oupwe mwareiti ewe Samol mi Lapalap, ämi förian kana meinisin

lon ekewe leni meinisin mi nom fän nemenian.

Ngüni, kopwe mwareiti ewe Samol mi Lapalap.