1 Ousipwe mwareiti ewe Samol mi Lapalap.

A feiöch ewe aramas mi niuokusiti ewe Samol mi Lapalap,

mi pwapwaiti an epwe aleasochisi an kewe allük.

2 Nöün kana repwe nemenem lon ewe fanü.

Mwirimwirin kana mi wenechar repwe feiöch.

3 Wöü me chomong pisek ra nom lon imwan,

nge an pwüng a nonom tori feilfeilachök.

4 Saram a tin lon rochopwak fän iten ewe mi wenechar.

Pun ewe Samol mi Lapalap a kirikiröch, a pwal ümöümöch o pwüng.

5 A feiöch eman mwän mi kichiöch o mwütätä mettoch,

eman mi föri an angang fän pwüng.

6 Pun ewe chon pwüng epwe fokun tipepos.

Aramas repwe chechemeni i tori feilfeilachök.

7 Esap niuokusiti pworaus mi ngau,

lelukan a pos, a apilükülükü ewe Samol mi Lapalap.

8 Lelukan a kinamwe, esap niuokus.

Lesopolan epwe pwapwa le küna än chon oputan kuf.

9 A fangafangöch ngeni ekewe chon wöüngau,

an pwüng epwe nonom tori feilfeilachök.

Epwe wor manan me meninin me ren aramas. ✡2.Kor 9.9

10 Ekewe aramasangau ra küna ei o song ren,

ra attina meser, nge mürin resap chüen nom.

Än ekewe aramasangau mochen esap pwönüetä.