20
Ekewe engeröü ier
20.1-6
Mürin üa küna eman chon läng a feitiu seni läng, nge a amwöchü lepöün efoch kien ewe pwang mi alolol, pwal efoch selimächä mi fokun chou. Iwe, a turufi ewe trakon, ewe serepenitin lom, iei i ewe Tefil ika Satan, a föti pwe epwe föfö lon ükükün engeröü ier. Ken 3.1 Iwe, ewe chon läng a aturalong i lon ewe pwang mi alolol, a lokeela o pwauni, pwe esap chüen tongeni tufichin atupu chon ekewe mwü tori ekewe engeröü ier repwe sopola. Mürin ei, ewe trakon epwe fokun musala lon ekis chök fansoun mochomoch.
Mürin üa küna ekoch lenien motun king, nge chokewe mi mot wor ra angei ewe pöchökül pwe repwe tongeni eäni kapwüng. Üa pwal küna ngünün chokewe mi ninnila pokiten ar arongafeili ewe let Jesus a pwärätä me än Kot kapas. Ir chokewe resap fel ngeni ewe manmwacho ika uluulun we, resap pwal angei asisilen ewe manmwacho won chamwer ika won pöür. Ra manausefäl o eti Jesus le nemenem lon ükükün engeröü ier. Tan 7.9,22 (Nge ekewe lusun mi mäla resap manausefäl tori ekewe engeröü ier repwe sopola.) Iei ewe aeuin manausefäl. A feiöch o pin iö a eti ewe aeuin manausefäl. Ewe aruen mäla esap wor an nemenem wor, nge repwe nöün Kot me nöün Kraist souasor, repwe pwal eti Jesus le nemenem lon ükükün engeröü ier.
Satan a kuf
20.7-10
Iwe, wesin ekewe engeröü ier, Satan epwe musala seni an fötek. Epwe feila pwe epwe atupu chon ekewe mwü won unusen fanüfan, ekei mwü Kok me Makok. Satan epwe achufengeniir meinisin pwe repwe maun, iteiter meinisin ra usun iteiten föün pien aroset. Is 7.2; 38.2,9,15 Ra chöfetal won fanü o rongeela lenien ewe mwichen chon pin me ewe telinimw Kot a echeni. Nge ekkei a feitiu me läng o keniirela. 10 Mürin ewe Tefil mi atupur a koturulong lon ewe nomun ekkei me primston ia ewe manmwacho me ewe soufos chofona ra fen koturula ie. Iwe, repwe küna riaföü lerän me lepwin tori feilfeilachök.
Ewe kapwüngün lesopolan
20.11-15
11 Mürin üa küna eu lenien motun king mi watte o pwechepwech me ewe eman mi mot won. Fanüfan me läng ra süla seni mwen mesan, nge esap chüen wor leni fän iter. 12 Iwe, üa küna ekewe mi mäla, ekewe aramas tekia me aramas kis, ra ütä me mwen ewe lenien motun king. Iwe, ekewe puk ra sukula. Mürin pwal eu puk a sukula, iei ewe puken iten chon manau. Iwe, ekewe mi mäla ra küna kapwüng won mine ra föri usun a makketiu lon ekewe puk. Tan 7.9-10 13 Mürin ewe matau a fangewu ekewe mi mäla ra nom lon, pwal mäla me ewe lenien sotup ra fangewu ekewe mi mäla ra nom lor. Iwe, ir meinisin ra küna kapwüng won meinisin mine ra föri. 14 Mürin mäla me ewe lenien sotup ra koturulong lon ewe nomun ekkei. Ei nomun ekkei, iei ewe aruen mäla. 15 Iö esap mak itan lon ewe puken iten chon manau a koturulong lon ewe nomun ekkei.

20:2: Ken 3.1

20:4: Tan 7.9,22

20:8: Is 7.2; 38.2,9,15

20:12: Tan 7.9-10