4
Nengeni, ka fokun liöch, en mi wor tongom me rei,
nengeni, ka wesewesen liöch.
Föün mesom fän pwölüpwölün won mesom ra usun chök ekewe lisom,
nge meten mökürom a wewe ngeni epwi pwiin kuuch
ra tötiu me won ekewe chukun Kiliat.
Ngiim ra pwech usun chök epwi pwiin sip ra wes me fich,
ra feitä seni ar lenien tütü.
Ir meinisin a wor nöür lippwe,
esap wor eman me leir a aemanüla.
Tinawom a wewe ngeni efoch riri mi parapar,
nge awom a fokun öch.
Sapom ra woparapar fän pwölüpwölün won mesom,
usun chök pekin apel.
Üom a wewe ngeni ewe imw tekia imwen Tafit,
a kukumos o motoutou,
fän üom a wor epa mwärämwär mi wewe ngeni engeröü tittin maun ra itiuetä won.
Oupwum kewe ra usun chök apanen chia lippwe
mi mongö lein ekewe kiop.
Üpwe feitä won ewe chukun säfei mi aüchea itan mör,
pwal won ewe chukun apach mi pwokus,
o nonom ie tori epwe ränila
o lerochen mettoch repwe morola.
En mi wor tongom me rei, ka wesewesen liöch,
esap fokun wor och terum.
Kofoti, kopwe etiei le feitiu me won Lepanon,
kopwe etiei le feitiu me won Lepanon.
Kopwe feitiu me won ungen ewe chuk Amana,
pwal me won ungen Senir me Hermon,
seni ekewe lenien laion me lepart.
Kofoti, en mi wor tongom me rei, ka fokun liapeni lelukei.
Ka fokun liapeni lelukei ren nennen mesom ngeniei,
pwal ren mwärum fän üom.
10 Kofoti, en mi wor tongom me rei,
om tong a arar ngeniei,
a mürina seni wain,
nge om lö a pwokus seni ekewe lö me nofitin mongö meinisin.
11 Kofoti, tinawom a sup ren chönün ächi,
nge chönün chunen me milik ra nonom fän chönawom.
Iwe, pwonnen üfom a wewe ngeni pwonnen Lepanon.
12 Kofoti, en mi wor tongom me rei, ka usun chök eu tanipi mi köpüng,
ewer, eu tanipi mi köpüng pwal eu puächen koluk mi tittila.
13 Om kewe irä mi märitä lon ra wewe ngeni eu tanipin apel
ra uäni sokun uän irä mi mürina.
Ra pwal mär lon ekewe irä mi pwokus iter henna me nart,
14 ekewe irä äfän, säpük me sinamon,
pwal sokun irän apach mi pwokus meinisin,
ekewe irä mi pwokus iter mör me aloes
me nofitin mongö mi anö.
15 En ka usun chök eu puächen koluk mi achöchönü ewe tanipi,
pwal usun chök eu chönüttu mi ur ren koluk mi manau.
Ka pwal wewe ngeni ekewe chanpupu mi puputiu seni ewe chuk Lepanon.
Fefin
16 Kopwe pwätä asepwälin efeng, etto asepwälin ör.
Oupwe eniti tanipii we pwe pwoöchün epwe pwopwonfeil.
Amwo ätewe mi wor tongan me rei epwe feito ren tanipin we
o mongö seni uän ekewe irä mi mürina.
Mwän