7
1 En nöün king föpwül,
a fokun öch pecheöm lon ipwom sus.
Sengesengen wänükum a usun chök chipwechipwen fau aüchea,
förien eman mi silelap.
2 Iwe, pwuom a wewe ngeni eu kap mi ur ren wain mi anö,
nge lukom a wewe ngeni eu chukun föün wiich,
kiop ra nom pwelin ünükün.
3 Oupwum kewe ra usun chök apanen chia lippwe.
4 Iwe, üom a usun chök eu imw tekia a för seni ngiin äläfan,
nge mesom ra usun chök ekewe nomun Hespon
arun ewe asamalapen Pat Rappim.
Pwötum a wewe ngeni ewe imw tekia won Lepanon
mi nom awenewenen Tamaskus.
5 Mökürom a wenetä usun chök ewe chuk Karmel,
meten mökürom a sapwilitiu, nge anüan a usun chök parachol.
Iwe, ewe king a fif ren meten mökürom.
Ewe mwän apwüpwülü söfö me ewe fin apwüpwülü söfö ra pwapwafengen
7.6–8.4
6 En mi wor tongom me rei, en ka fokun liöch,
a fokun mürina amwararen om tong.
7 Iwe, ka üwenewenetä usun chök efoch nü,
nge oupwum ra wewe ngeni uan.
8 Iwe, üpwe tötä won ewe irä palm o kini uan.
Oupwum a usun chök umwun föün wain me rei,
nge pwonnen ngasangasom a usun chök pwonnen apel.
9 Awom a usun chök wain mi mürina a mitimit le oromala,
lupwen a achöchönü tinawei me ngii.
Fefin
10 Aüküki me ren ätewe mi wor tongan me rei ngang nöün,
nge i a chök positiei.
11 Kopwe etto, en mi wor tongom me rei,
pwe sipwe feila lemäl o pwinipwin lon ekewe sop.
12 Lesosorusich sipwe feila ren ekewe tanipin wain
pwe sipwe nengeni ika ekewe irän wain ra sot,
ika sotur ra sukula,
ika ekewe apel ra ua.
Ikenan üa mochen pwäri ngonuk ai tong.
13 Ekewe apelin omung ra pwokus,
nge arun asamen imwach a wor chomong sokun uän irä mi mürina,
ua mi fö pwal ua minen lom.
Iwe, üa iseniir fän itom, en mi wor tongom me rei.