Sekaraia
Kapas akom
I. Iten ei puk: Sekaraia, pun mine a mak lon künaan, an kewe afalafal me an kewe kapasen osuni. Wewen ei it Sekaraia: Ewe Samol mi Lapalap a chechemeni.
II. Chon makei ei puk: Sekaraia
III. Itelapemongen ei puk: Ach angang esap fis ren pöchökül, esap pwal fis ren manaman, nge epwe fis ren Ngünün Kot.
IV. Kapas aüchean ei puk: Kot a nemeni fanüfan, iei mine ekewe chon Juta mi chüen manau repwe apilükülüköch.
V. Masouen ei puk Sekaraia: Ei puk Sekaraia a kinikinitiu lon 2 kinikin:
1. Sopun 1-8: Än ewe soufos Sekaraia kapasen osuni me künaan lon ewe fansoun seni ewe ier 520 tori 518 mwen Kraist (B.C.). A pwärätä usun kaüsefälin ewe telinimw Jerusalem me ewe imwenfel, usun än nöün Kot kewe aramas repwe limöch, pwal usun ewe fansoun ewe Chon Amanau epwe feito.
2. Sopun 9-14: Kochufengenin ekoch pworaus usun ewe Chon Amanau ra witiwiti, me ewe apwüngün lesopolan.
VI. Tettelin masouen ei puk:
Ekewe kapasen fön me apilükülüköch 1.1–8.23
Kot epwe apwüngü chon ekewe mwü mi nom ünükün Israel 9.1-8
Än ekewe aramas feiöch me nonom fän kinamwe lon ekewe fansoun repwe feito 9.9–14.21
1
Kapasen tüngor pwe aramas repwe liwin ngeni Kot
1.1-6
1 Iwe, lon aruuen ierin mwün Tarius, lon ewe awaluen maram, ewe Samol mi Lapalap a kapas ngeni ewe soufos Sekaraia nöün Perekia we mwän, nge Perekia nöün Ito. ✡Esr 4.24–5.1; 6.14 2 Iwe, ewe Samol mi Unusen Manaman a tini Sekaraia pwe epwe üreni ekewe aramas, “Ngang ewe Samol mi Lapalap üa fokun song ngeni ämi kewe lewo. 3 Nge iei üpwe ürenikemi: Oupwe liwin ngeniei, nge ngang üpwe liwin ngenikemi. 4 Ousap apirü ämi kewe lewo. Ekewe soufos me lom ra üreniir fän aloi pwe repwe ükütiu seni ar kewe lapalapangau me föför mi ngau. Nge ir resap aüselinga ika aleasochisiei. Ngang ewe Samol mi Lapalap üa kapas. 5 Ikafa ir ämi kewe lewo? Ifa usun, ekewe soufos ra manau tori feilfeilachök? 6 Ifa usun, ai kewe kapas me ai kewe allük üa allük ngeni nei kewe chon angang ekewe soufos resap küw ämi kewe lewo? Iei mine ra ekieksefäl o üra: Usun mine ewe Samol mi Unusen Manaman a ekiekietä pwe epwe föri ngenikem fän iten äm kewe lapalap me föför, iei usun a föri ngenikem.”
Künään ewe soufos usun ekewe oris
1.7-17
7 Iwe, lon aruuen ierin mwün Tarius, lon rüe me rüanün ränin ewe engol me aeuin maram, iei ewe maram Sepat, ewe Samol mi Lapalap a kapas ngeni ewe soufos Sekaraia. Iwe, Sekaraia a üra, 8 “Lepwin ewe a wor künaei. Üa küna eman mwän mi wawa eman oris mi par. A nom lein ekewe mwoosor lon ewe lemol mi chökis. Nge lükisökürün a wor pwal ekoch oris mi par, tiketikepar me pwech. ✡Pwär 6.4; 6.2 9 Mürin üa ais, ‘Met wewen ekei oris, ai samol?’ Nge ewe chon läng mi kapas ngeniei a üreniei, ‘Üpwe aiti ngonuk met wewen.’ 10 Mürin ewe mwän mi nom lein ekewe mwoosor a pälüeni, ‘Ikkeiir ekewe ewe Samol mi Lapalap a tinireto pwe repwe raunei fanüfan.’ 11 Iwe, ra üreni nöün ewe Samol mi Lapalap we chon läng mi nom lein ekewe mwoosor, ‘Äm aia raunei fanüfan o küna pwe unusen fanüfan a mosonoson o kinamwe.’ 12 Mürin, nöün ewe Samol mi Lapalap we chon läng a üra, ‘Ai Samol mi Unusen Manaman, inet kopwe eäni ümöümöch ngeni Jerusalem me ekewe telinimwen Juta, pun ka song ngeniir lon ekei fik ier?’ 13 Iwe, ewe Samol mi Lapalap a kapas pwetete me aururu ewe chon läng mi piin kapas ngeniei. 14 Mürin, ewe chon läng a üreniei pwe üpwe asilefeili alon ewe Samol mi Unusen Manaman, ‘Ngang üa fokun echeni o ekimongei Jerusalem me Sion. 15 Nge üa fokun song ngeni chon ekewe mwü mi nom fän kinamwe. Pun lupwen üa ekis song ngeni nei aramas, ir ra alapala ar afeiengaueer. 16 Iei mine üa liwinla Jerusalem pwe üpwe pwäri ai tong ngeni. Imwei epwe kaüsefäl lon, pwal Jerusalem epwe kaüksefäl,’ iei alon ewe Samol mi Unusen Manaman. 17 Kopwe pwal asilefeili alon ewe Samol mi Unusen Manaman, ‘Ai kewe telinimw repwe ursefäl ren wöü, nge ngang ewe Samol mi Lapalap üpwe aururusefäli Sion o filisefälietä Jerusalem.’ ”
Künään ewe soufos usun ekewe mächän man me ekewe chon angang ngeni mächä
1.18-21
18 Mürin a pwal wor künaei. Üa küna fofoch mächän kow. 19 Iwe, üa aisini ewe chon läng mi piin kapas ngeniei, “Met wewen ekei mächä?” Nge i a pälüeniei, “Ikkei ekewe mwün fanüfan ra atoropasafeili chon Juta, chon Israel me chon Jerusalem.” 20 Mürin, ewe Samol mi Lapalap a aküna ngeniei föman chon angang ngeni mächä. 21 Iwe, üa ais, “Met ir repwe föri?” Nge a pälüeniei, “Ekewe mwü ra atoropasafeili chon Juta, pwe esap wor eman aramas a tongeni chimwetä. Nge ekei chon angang ngeni mächä ra feito pwe repwe eniwa o ataela ekewe mwü mi ü ngeni ewe fanü Juta o atoropasa aramasan.”