11
1 Kopwe suki asamalapom kewe, en Lepanon,
pwe ewe ekkei epwe kenala om kewe setar.
2 Oupwe ngüngüres, ämi kewe irä saipires,
pun ekewe setar ra turula,
nge ekewe irä mi pöchökül ra tala.
Oupwe ngüngüres, ämi kewe irä ook lon Pasan,
pun ewe wöllap a pöküpöküla.
3 Oupwe aüseling ngeni än ekewe chon mas ngüngüres,
pun fanüer mi mürina, ia a wor ie enen man, a tala.
Oupwe aüseling ngeni
wörüwörün ekewe laion,
pun ewe wöllapen Jortan a tala.
Ekewe chon mas mi lomotongau
11.4-17
4 Iei alon ewe Samol mi Lapalap ai we Kot, “Kopwe chon masen ekewe pwiin sip mi amol ngeni ar repwe ninnila. 5 Chokewe mi möniir repwe chök nirela, nge esap wor eman a apwüngüür. Nge chokewe mi amömörela ra apasa, ‘Ousipwe mwareiti ewe Samol mi Lapalap, pun sa pisekisekila.’ Iwe, püsin ar kewe chon mas resap tongeer. 6 Iei alon ewe Samol mi Lapalap, “Üsap chüen tongei chon ei fanü. Üpwe föri pwe eman me eman aramas epwe tolong fän nemenien chon arun, pwal fän nemenien an king. Iwe, ir repwe ataela ewe fanü, nge ngang üsap angaseer seni lepöür.”
7 Iwe, ngang eman mi wisen masa ewe pwiin sip mi amol ngeni ar repwe ninnila fän iten chokewe mi kamö o amömöla sip. Iwe, üa angei ruofoch wok, efoch üa aita ngeni Ümöümöch, nge ewe efoch üa aita ngeni Tipeeufengen. Iwe, üa foleni ekewe sip. 8 Mürin, üa niela ülüman chon mas lon eu chök maram, pun üsap chüen tongeni engila ngeniir, nge pwal ir ra oputaei. 9 Mürin üa üreni ekewe pwiin sip, “Üsap chüen ämi chon mas. Mine a kan ngeni mäla, epwe mäla. Mine epwe ninnila, epwe ninnila. Nge chokewe mi chüen manau repwe nifengeniir.” 10 Iwe, üa angei woki we itan Ümöümöch o kupi. Ren ei üa ataela ewe pwon ewe Samol mi Lapalap a eäni ngeni chon ekewe mwü meinisin. 11 Iei usun ewe pwon a tala lon ewe rän. Nge ekewe chon kamö me amömö sip mi nenengeniei ra silei pwe iei alon ewe Samol mi Lapalap. 12 Mürin üa üreniir, “Are a pwüng me remi, oupwe ngeniei liwini, nge are esap, oupwe chök amwöchü.” Iwe, ra ngeniei ükükün ilik föün moni silifer pwe liwini. 13 Iwe, ewe Samol mi Lapalap a üreniei, “Kopwe uwalong ewe silifer ren ewe chon för sepi seni pwül, ewe liwin mi fokun mürina ra aükü ngeni pwe ina ükükün aücheai.” Iei mine üa angei ekewe ilik föün moni silifer o moneelong lon imwen ewe Samol mi Lapalap ren ewe chon för sepi seni pwül. ✡Mat 27.9-10 14 Mürin üa kupi aruofochun woki we itan Tipeeufengen. Ren ei üa ataela ewe pwipwifengen lefilen Juta me Israel.
15 Iwe, ewe Samol mi Lapalap a üreniei, “Kopwe wisenisefäli wisen eman chon mas, nge lon ei fansoun kopwe eman chon mas mi lomotongau. 16 Pun nengeni, üpwe seikätä eman chon mas won nei pwiin sip, eman esap ekieki chokewe mi pöütüla, ika kütta chokewe mi malechela, esap apöchöküla chokewe mi feiengau, ika amongöü chokewe mi chüen manau. Nge epwe ochei fituken chokewe mi kitinup o aserala küün pachapacher. 17 Feiengauen ei chon mas mi lomotongau a likitala ewe pwiin sip. Amwo ewe ketilas epwe pökü pöün me pelifichin mesan. Pöün epwe fokun pwasala, nge pelifichin mesan epwe wesewesen chunela.”