10
Mơnih Glăng Abo Lơnguh-Siàm
“Iơŭ biă, Kơu đờm sơ̆ng buơl guhã, mơnih lơi 'buh kơyoa bơh 'băng bloh tơma lăm wàr abo, bloh đì tơma sơ̆ng jơlàn pơkơ̆n, mơnih nư̆n la mơnih klĕ blơ̆. Bloh aràng sơi kơyoa bơh 'băng bloh tơma, la mơnih glăng abo. Mơnih kraŭ-khiă bơh 'băng pơh bơh 'băng tơ mơnih glăng tơma; abo mơhư̆ săp mơnih glăng; mơnih glăng iơu mơta abo drơi, sơ̆ng ba guñu tơbiă tơ agàh. Tŭ hũ brơi abo tơbiă abih bơjơ, mơnih glăng nau dơlhơu sơ̆ng abo nau tui hơdơi, kơyoa abo mừng-lơđăp săp mơnih glăng. Abo 'buh nau tui mơnih c̆rih; tơrblơ̆ wơ̆, rơŭ đuaĭ dơŭ, kơyoa guñu 'buh kràn-thơu săp mơnih c̆rih.” Yàng Jêsu đờm pơnuaĭ pơgăp-pơmơyơu ni tơ buơl guñu, bloh buơl guñu 'buh wờng Pô khiăng đờm hơgĕ.
Kơyoa nư̆n, Yàng Jêsu đờm wơ̆: “Iơŭ biă, Kơu đờm sơ̆ng buơl guhã, Kơu la bơh 'băng tô abo tơma tơbiă. Abih tơgrơ̆ mơnih truh dơlhơu Kơu la buơl klĕ blơ̆, sơ̆ng abo 'buh păng tui guñu. Kơu la bơh 'băng. Yah aràng sơi kơyoa Kơu bloh tơma, nư̆n rơŭ hũ dŏng-pơklàh. Buơl guñu rơŭ tơma tơbiă sơ̆ng păp 'blàng rơ̆. 10 Mơnih klĕ mĭn truh tô tămblah-mă, pơmơtai, sơ̆ng pơluĭ-pơlơhiă. Pơ-ơnah Kơu, Kơu truh tô abo hũ pơnuaĭ hơdiŭ, sơ̆ng hũ pơnuaĭ hơdiŭ dơlah-dơlài. 11 Kơu la mơnih glăng lơnguh-siàm, mơnih glăng lơnguh-siàm kơyoa tơrpuơl abo drơi prah luơi pơnuaĭ hơdiŭ drơi. 12 Mơnih glăng tồ-apah 'buh iơŭ la mơnih glăng, kơyoa tơrpuơl abo 'buh găm sơ̆ng ñu, nư̆n tŭ 'buh du asơu sĭng truh, ñu luơi abo bloh đuaĭ dơŭ. Du asơu sĭng brồ mă abo sơ̆ng ngă tơ abo c̆ơrlah-c̆ơrlờp. 13 Kơyoa la mơnih glăng tồ-apah, nư̆n ñu 'buh sơnư̆ng kơ-ù hơgĕ truh tơrpuơl abo. 14 Kơu la mơnih glăng lơnguh-siàm. Kơu thơu abo Kơu, sơ̆ng abo Kơu thơu Kơu; 15 kŭng yơu Ama thơu Kơu, sơ̆ng Kơu thơu Ama rơi. Kơu kơyoa tơrpuơl abo prah-luơi pơnuaĭ hơdiŭ drơi. 16 Kơu dò hũ du abo pơkơ̆n 'buh găm mư̆ng wàr ni. Kơu kŭng păl ba guñu mơrai wơ̆ rơi. Abo nư̆n rơŭ mơhư̆ săp Kơu, bloh nư̆n rơŭ mĭn hũ sa tơrpuơl abo sơ̆ng sa aràng mơnih glăng soh. 17 Ni, kơđa hơgĕ Ama rơnăm Kơu, nư̆n la kơyoa Kơu prah-luơi pơnuaĭ hơdiŭ drơi, tô hũ đồ-mă wơ̆. 18 'Buh aràng sơi suă-mă pơnuaĭ hơdiŭ Kơu jiơ̆ng, bloh rùp-phŭn Kơu sờh hơtai-hơtiàn prah-luơi pơnuaĭ hơdiŭ drơi. Kơu hũ gơnuăr prah-luơi pơnuaĭ hơdiŭ drơi, sơ̆ng Kơu hũ gơnuăr mă ñu wơ̆. Kơu hũ đồ-mă gơnuăr-pơđăr ni mư̆ng anih Ama Kơu.”
19 Kơyoa mư̆ng tơgrơ̆ pơnuaĭ ni, du mơnih Juđa 'brŏ pơc̆ơrlah krơi gơŭ wơ̆. 20 Lô mơnih lăm buơl guñu đờm: “Ñu kơđòng kơmlài ngă sơ̆ng mòih-hơnrui bơjơ! Kơđa hơgĕ buơl guhã dò păng ñu ngă hơgĕ?” 21 Du mơnih pơkơ̆n nư̆n đờm: “Mơnih kơđòng kơmlài ngă hơyơu đờm jiơ̆ng yơu nư̆n! Kơmlài hũ rơgơi pơh mơta tơ mơnih bồm jiơ̆ng rơi?”
Mơnih Juđa Kơmlah-Luơi Yàng Jêsu
22 Tơ plơi-prŏng Jerusalem hũ pơnuaĭ pơjŭm 'bơ̆ng sơdơ̆r wơ̆ bruă pơyă sàng duh-dơlbăt. Tŭ nư̆n la blàn mơrềt. 23 Yàng Jêsu nau tơkai lăm sàng duh-dơlbăt, tơ ala sơndờp bơh 'băng Salômôn. 24 Mơnih Juđa pơgùm gơŭ tòmdăr Pô sơ̆ng đờm: “Pô-Pơto luơi buơl dơlhă sơnư̆ng wĭ-wơ̆ mĭt tơ̆l truh tơ tŭ lơi? Yah Pô-Pơto la Pô Krist, yòng đờm loh-làng bĕ tơ buơl dơlhă thơu!” 25 Yàng Jêsu đờm: “Kơu hũ đờm sơ̆ng buơl guhã bơjơ, bloh buơl guhã 'buh păng-tui. Tơgrơ̆ bruă Kơu mă angăn Ama Kơu bloh ngă hũ ngă grơh tơ Kơu. 26 Bloh buơl guhã 'buh păng-tui, kơyoa buơl guhã 'buh iơŭ la tơrpuơl abo Kơu. 27 Abo Kơu mơhư̆ săp Kơu, Kơu thơu guñu, sơ̆ng guñu tui Kơu. 28 Kơu brơi tơ guñu pơnuaĭ hơdiŭ rài pơdò rài. Guñu rơŭ 'buh tŭ lơi mơtai lơhiă, sơ̆ng 'buh hũ aràng sơi tămblah-mă guñu jiơ̆ng mư̆ng tơngàn Kơu. 29 Ama Kơu, la Pô prŏng rơlau abih, hũ brơi tơ Kơu du abo nư̆n, sơ̆ng 'buh hũ aràng sơi tămblah-mă guñu jiơ̆ng mư̆ng tơngàn Ama. 30 Kơu sơ̆ng Ama la sa.”
31 Du mơnih Juđa duơ̆n pơtơu tô prah pơmơtai Pô. 32 Yàng Jêsu đờm sơ̆ng buơl guñu: “Kơu hũ ngă tơ anaŭ buơl guhã lô bruă siàm Ama hũ jào tơ Kơu ngă. Yơu nư̆n, kơyoa pơnuaĭ hơgĕ bloh buơl guhã khiăng prah pơtơu pơmơtai Kơu?” 33 Du mơnih Juđa đờm: “'Buh iơŭ buơl dơlhă prah pơtơu pơmơtai Pô-Pơto kơyoa mư̆ng du bruă siàm Pô-Pơto hũ ngă, bloh kơyoa Pô-Pơto đờm sơk-sơrbĭl truh Yàng Pô Lơngì: Pô-Pơto mĭn la mơnih bơhiàn, bloh đờm angăn rùp-phŭn drơi la Yàng Pô Lơngì.” 34 Yàng Jêsu đờm lài: “Lăm pơnuaĭ adăt-adia buơl guhã 'buh hũ wă pơnuaĭ ni ơu: ‘Kơu hũ đờm: buơl guhã la du yàng,’? * 10:34 Pơđik Adoh Mơyòm 82:6. 35 Yah pơnuaĭ adăt-adia angăn du mơnih đồ-mă pơnuaĭ Yàng Pô Lơngì la ‘yàng,’ sơ̆ng pơnuaĭ 'Bồn Bơ-àr Sơc̆ih-Sri 'buh rơgơi klà luơi jiơ̆ng, 36 nư̆n Kơu ni, la Pô hũ Ama pioh krơi sơc̆ih-sri, sơ̆ng pơđăr truh lăm dun-ya, đờm: ‘Kơu la Anà Yàng Pô Lơngì,’ nư̆n kơđa hơgĕ buơl guhã đờm yă Kơu la đờm khĭn-dơmĭn sơk-sơrbĭl? 37 Yah Kơu 'buh ngă du bruă Ama Kơu, nư̆n buơl guhã juơi păng-tui Kơu. 38 Bloh yah Kơu ngă, nư̆n yah buơl guhã 'buh păng-tui Kơu, păng-tui bĕ du bruă Kơu ngă, tô buơl guhã hũ rơgơi thơu sơ̆ng wờng lài Ama dò lăm Kơu sơ̆ng Kơu dò lăm Ama.” 39 Buơl guñu duah pơnuaĭ tô mă Pô, bloh Pô pleh klàh tơngàn buơl guñu.
40 Mư̆ng nư̆n, Yàng Jêsu gài nau tơ gah dih ia sơdờng Jôđăn, la anih dơlhơu thrơi Jăng hũ ngă 'baptem, sơ̆ng dò tơ anih nư̆n. 41 Hũ lô mơnih truh sơ̆ng Pô. Buơl guñu đờm lài: “Jăng 'buh ngă sa nàl-c̆rih lơi, bloh abih tơgrơ̆ pơnuaĭ Jăng hũ đờm mư̆ng mơnih ni la iơŭ tơpă biă!” 42 Tơ anih nư̆n hũ lô mơnih păng-tui Pô.

*10:34 10:34 Pơđik Adoh Mơyòm 82:6.